Aua Neke Fakahukia e Agaga Tapu a Iehova

“Aua foki neke fakahukia e [a]gaga [t]apu he Atua, kua fakamau fakamailoga ai a mutolu.”—EFESO 4:30.

1. Ko e heigoa ne taute e Iehova ma e tau tagata tokologa lahi, ti ko e heigoa e matagahua kua moua e lautolu?

KUA fai mena uho lahi ne taute e Iehova ma e tau tagata tokologa lahi ne momoui he lalolagi lekua nei. Ne taute e ia ke maeke ai a lautolu ke fakatata atu ki a ia puhala he haana Tama fuataha, ko Iesu Keriso. (Ioane 6:44) Ko koe taha he tau tagata nei kaeke kua taute e koe e tukuleleaga ke he Atua ti moui fakatatau ki ai. Ko e tagata nukua papatiso ke he higoa he agaga tapu, kua ha ha ia koe e matagahua ke moui fakatatau ke he agaga ia.—Mata. 28:19.

2. Ko e heigoa e tau hūhū ka fakatutala a tautolu ki ai?

² Ko tautolu “kua gana e tau mena ke lata mo e [a]gaga” kua tapulu ke he tagata fou. (Kala. 6:8; Efeso 4:17-24) Ka kua fakatonu mo e hataki he aposetolo ko Paulo a tautolu ke nakai fakahukia e agaga tapu he Atua. (Totou Efeso 4:25-32.) To kumikumi a tautolu mogonei ke he tau fakatonuaga he aposetolo. Ko e heigoa e kakano ha Paulo he talahau e ia hagaao ke he fakahukia e agaga he Atua? Maeke fēfē he ha tagata ne tukulele ki a Iehova ke taute pihia? Ti maeke fēfē ia tautolu ke kalo mai neke fakahukia e agaga a Iehova?

Kakano he Tau Kupu ha Paulo

3. To fakamaama fēfē e koe e kakano he tau kupu ne tohi ia Efeso 4:30?

³ Fakamua, mailoga e tau kupu ha Paulo ne tohi ia Efeso 4:30. Ne tohi e ia: “Aua foki neke fakahukia e [a]gaga [t]apu he Atua, kua fakamau fakamailoga ai a mutolu ia ia ato hohoko ke he aho ke fakamomoui ai [“ha ko e lukutoto,” NW].” Nakai manako a Paulo ke fakahagahaga kelea e tuaga fakaagaaga he tau matakainaga talitonu fakahele haana. Ko e agaga ha Iehova ne kua ‘fakamau fakamailoga ke he aho ke fakamomoui ai ha ko e lukutoto.’ Ko e agaga tapu he Atua ne eke mo e hane fakamau fakamailoga, po ke kua ‘fakamoli e mena ne nakai la hoko mai’ ma e tau tagata fakauku ne mahani fakamooli. (2 Kori. 1:22) Ko e fakamau fakamailoga ne fakakite ko lautolu ko e tau koloa he Atua mo e to moua e lautolu e moui ke he lagi. Ko lautolu ne fakamau fakamailoga ne katoa ai ke 144,000.—Fakakite. 7:2-4.

4. Ko e ha kua aoga ai ke kalo neke fakahukia e agaga he Atua?

⁴ He fakahukia e agaga ka eke mo lakaaga fakamua ke takitaki ke he galo katoa he omoomoiaga he malolō gahuahua he Atua ke he moui he Kerisiano. Kua maeke e mena nei ha ko e fakamooliaga ne talahau e Tavita he mole e agahala haana mo Patesepa. Ne olelalo a Tavita mo e fakatokihala ki a Iehova: “Aua neke tiaki e koe au i mua hāu; aua foki neke uta kehe hāu a [a]gaga [t]apu ia au.” (Sala. 51:11) Ko lautolu ni ne fakauku nukua ‘fakamoli ato hoko ke he mate’ ka moua e “foufou” he moui nakai mate ke he lagi. (Fakakite. 2:10; 1 Kori. 15:53) Ko e tau Kerisiano ne ha ha ai e amaamanakiaga ke he lalolagi kua lata foki mo e agaga tapu ka tumau a lautolu ke mahani fakamooli ke he Atua mo e moua e mena fakaalofa haana he moui ne fakavē ke he tua he poa lukutoto he Keriso. (Ioane 3:36; Roma 5:8; 6:23) Ti kua lata ia tautolu oti ke puipui neke fakahukia e agaga tapu a Iehova.

Maeke Fēfē he Kerisiano ke Fakahukia e Agaga?

5, 6. Maeke fēfē e Kerisiano ke fakahukia e agaga a Iehova?

⁵ Ko e tau Kerisiano tukulele, maeke ia tautolu ke kalo neke fakahukia e agaga. Maeke e mena nei ka ‘mahani mo e momoui a tautolu ke lata mo e agaga,’ ti nakai hufia a tautolu mogoia ke he tau manako he tino mo e to nakai fakakite e tau aga kelea. (Kala. 5:16, 25, 26) Ka e maeke e tau aga ia ke hiki. Maeke ia tautolu ke fakahukia lahi e agaga he Atua he fakaatā a tautolu ke tafea kehe fakahaga, he liga teitei ke nakai mailoga ai, ke hoko atu ke he mahani ne vihiatia he Kupu ne omoomoi he agaga he Atua.

⁶ Ka fakatumau a tautolu ke totoko e takitakiaga he agaga tapu, to fakahukia ai e tautolu ti pihia mo Iehova, ko e Punaaga he agaga ia. Ko e kumikumi ke he Efeso 4:25-32 to fakakite ki a tautolu e puhala kua lata ia tautolu ke mahani, mo e to lagomatai a tautolu ke kalo neke fakahukia e agaga he Atua.

Puhala ke Kalo Neke Fakahukia e Agaga

7, 8. Fakamaama e kakano kua lata ia tautolu ke vagahau fakamooli.

⁷ Lata ia tautolu ke vagahau fakamooli. Hagaao ke he Efeso 4:25, ne tohi e Paulo: “Ha kua tuku kehe tuai e mutolu e vagahau pikopiko, kia vagahau fakamoli a mutolu takitokotaha mo e hana matakainaga, ha ko e tau fahi tino a tautolu ko e taha kia taha.” Ha kua fakalataha a tautolu ko e ‘tau fahi tino ko e taha kia taha,’ kua nakai lata mooli a tautolu ke eke lagatau po ke taute pauaki he lali ke fakahehē e tau matakainaga tapuaki ha tautolu, ha kua tatai e mena ia mo e pikopiko ki a lautolu. Ko e tau tagata ne tumau ke he tau puhala pihia ka fakahiku ke nakai fai fakafetuiaga mo e Atua.—Totou Tau Fakatai 3:32.

⁸ Ko e tau kupu mo e tau gahua fakavai ke moumou e fakalatahaaga he fakapotopotoaga. Ko e mena ia, kua lata ia tautolu ke tuga e perofeta aga fakamooli ko Tanielu, ne nakai moua he falu a mahani kolokolovao ia ia. (Tani. 6:4) Ti kua lata ia tautolu ke tokaloto e fakatonuaga a Paulo ke he tau Kerisiano ne ha ha ai e amaamanakiaga ke he lagi kua fakalataha auloa e tau tagata oti ke he “tino a Keriso” ti kua lata ke fakatumau ke fakalataha mo e tau tutaki fakauku a Iesu ne vagahau fakamooli. (Efeso 4:11, 12) Ka amaamanaki a tautolu ke momoui tukulagi he lalolagi Parataiso, kua lata foki ia tautolu ke vagahau fakamooli, ti lafi ai mogoia ke he kaufakalataha he tau matakainaga ha tautolu he lalolagi katoa.

9. Ko e ha kua aoga lahi ia tautolu ke omaoma ke he manatu ia Efeso 4:26, 27?

⁹ Kua lata ia tautolu ke totoko atu e Tiapolo, he nakai fakaatā ha magaaho ke fakahagahaga kelea e ia e tuaga fakaagaaga ha tautolu. (Iako. 4:7) Lagomatai he agaaga tapu a tautolu ke totoko a Satani. Tuga anei, maeke ia tautolu ke taute pihia he puipui neke nakai taofi e ita. Ne tohi e Paulo: “Ka ita a mutolu, aua neke hala ai; aua foki neke to e la ka e ita agaia a mutolu. Aua foki neke fakaatā e mutolu ha mena ma e [T]iapolo.” (Efeso 4:26, 27) Ka hako mooli e mena ne ita ai a tautolu, kua maeke he fakamafiti ke liogi fakaeneene ke lagomatai a tautolu ke “totonu,” he fakakite e mahani fakalatalata ka e nakai mahani ke he puhala ka fakahukia e agaga he Atua. (Fakatai 17:27) Kia nakai tumau a tautolu ke he tuaga ita ti fakaatā a Satani ke kamatamata a tautolu ke taute e mena ne mua atu e kelea. (Sala. 37:8, 9) Taha puhala ke totoko a ia he fakamafiti ke fakamafola e tau taufetoko ke fakalagotatai mo e fakatonuaga ha Iesu.—Mata. 5:23, 24; 18:15-17.

10, 11. Ko e ha kua nakai lata a tautolu ke kaihā po ke taute e tau mena nakai fakamooli?

¹⁰ Kua nakai lata ia tautolu ke mahala ke he kamatamata ke kaihā po ke mahani nakai fakamooli. Hagaao ke he mahani kaihā, ne tohi e Paulo: “Ko e tagata kaiha aua neke liu kaiha foki, ka e mitaki ke fakamalolo a ia ke gahua ke he tau lima hana ke he mena mitaki, kia moua e ia e falu a mena ke age kia ia kua nofogati.” (Efeso 4:28) Kaeke ke kaihā e Kerisiano tukulele, kua ‘tokutoku teao e higoa he Atua’ he ekefakakelea ai. (Fakatai 30:7-9) Nakai fakagofua foki ke kaihā pete he mativa. Ko lautolu ne fakaalofa ke he Atua mo e katofia ne mailoga kua nakai fakagofua e kaihā.—Mare. 12:28-31.

¹¹ Nakai totoku hokoia e Paulo e tau mena kua nakai lata ia tautolu ke taute ka e fakakite e ia e tau mena kua lata ia tautolu ke taute. Kaeke ke momoui mo e mahani a tautolu ke lata mo e agaga tapu, to gahua fakalahi a tautolu ke leveki e magafaoa ha tautolu mo e pihia foki ke ‘moua e falu a mena ke age kia ia kua nofogati.’ (1 Timo. 5:8) Ne fakaputu e Iesu mo e tau aposetolo haana e tau tupe ke lagomatai a lautolu ne nonofogati, ka ko ia ne afo ko Iuta Isakariota ne kaihā e falu tupe. (Ioane 12:4-6) Ko ia ne nakai takitaki mooli he agaga tapu. Ko tautolu nukua takitaki he agaga he Atua kua “mahani mitaki [po ke, fakamooli] ke he tau mena oti kana,” tuga ne taute e Paulo. (Hepe. 13:18) Ti kalo a tautolu neke fakahukia e agaga tapu a Iehova.

Falu Puhala ke Kalo Neke Fakahukia e Agaga

12, 13. (a) He fakakite ia Efeso 4:29, ko e puhala vagahau fe kua lata ia tautolu ke tiaki? (e) Kua lata ke fēfē e puhala vagahau ha tautolu?

¹² Lata ia tautolu ke puipui ha tautolu a puhala vagahau. Ne fakapuloa e Paulo: “Aua neke hopo mai ha kupu kelea he tau gutu ha mutolu, ka ko e tau kupu mitaki ke ati hake ke he mena ke aoga ai, kia tupu ai e mitaki kia lautolu kua fanogonogo ki ai.” (Efeso 4:29) Liu foki, kua nakai talahau hokoia he aposetolo e tau mena kua nakai lata ia tautolu ke taute ka e talahau e ia ki a tautolu e tau mena kua lata ia tautolu ke taute. I lalo he omoomoiaga he agaga he Atua, to fakalagalaga a tautolu ke ‘talahau e tau kupu mitaki ke ati hake ti tupu ai e mitaki kia lautolu kua fanogonogo.’ Lafi ki ai, kua nakai lata ia tautolu ke hau “ha kupu kelea” he tau gutu ha tautolu. Ko e kupu Heleni ne fakaliliu “kelea” kua fakaaoga ke fakamaama aki e popo, po ke nakai mitaki he fua lakau, ika, po ke vala manu. Tuga ni he fakalialia e tau mena kai pihia ki a tautolu, kua vihiatia e tautolu e puhala vagahau ne talahau e Iehova kua kelea.

¹³ Kua lata e puhala vagahau ha tautolu ke lilifu, totonu, ti “fakamasima ke he masima.” (Kolo. 3:8-10; 4:6) Kua lata he tau tagata ke mailoga kua kehe a tautolu ka logona e lautolu e tau mena ne talahau e tautolu. Kia lagomatai e tautolu e falu ke vagahau e tau mena kua “mitaki ke ati hake.” Kia logona hifo a tautolu tuga e salamo ne lologo: ‘Kia mitaki foki kia koe e tau kupu he haku gutu, mo e tau manamanatu he [haaku] loto, Iehova na e, ko e haku a Maka Tumau mo e haku a Lukutoto.’—Sala. 19:14.

14. Hagaao ke he Efeso 4:30, 31, ko e heigoa kua lata ia tautolu ke tiaki?

¹⁴ Kua lata ia tautolu ke tiaki e tau fakafiu oti, ita, kupu kelea, mo e tau loto kelea oti kana. He mole e hataki neke fakahukia e agaga he Atua, ne tohi e Paulo: “Kia tiaki e mutolu e fakafiu oti mo e vale, mo e ita, mo e miha, mo e kupu kelea, katoa mo e tau loto kelea oti kana.” (Efeso 4:30, 31) Ha ko e tau tagata nakai mitaki katoatoa, kua lata ia tautolu oti ke fakamakamaka ke tautaofi e tau manatu mo e tau gahua ha tautolu. Kaeke ke fakaatā e tautolu e “fakafiu oti mo e vale, mo e ita” ke pule, to fakahukia e tautolu e agaga he Atua. Kua pihia foki ka tokaloto e tautolu e tau hepehepe ne taute mai ki a tautolu, fakakite e aga fakavihia, mo e nakai talia ke fakafeilo mo e tagata ne fakaita mai. Ka kamata foki a tautolu ke fakaheu e fakatonuaga he Tohi Tapu, liga to feaki e tautolu e tau aga ka takitaki atu ke agahala ke he agaga ti liga moua e tautolu e tau fua matematekelea.

15. Ka fai hehē ne taute ki a tautolu, ko e heigoa kua lata ia tautolu ke taute?

¹⁵ Kua lata ia tautolu ke mahani totonu, hofihofi e fakaalofa, mo e fakamagalo. Ne tohi e Paulo: ‘Kia eke mo tau tagata totonu ko e taha ke he taha, kia hofihofi e fakaalofa, mo e fefakamagaloaki; tuga e Atua ha ia Keriso ne fakamagalo noa e ia a mutolu.’ (Efeso 4:32) Pihia foki ka hukia lahi mahaki a tautolu ha ko e tau mena hehē ne taute ki a tautolu, kia fakamagalo atu a tautolu, tuga ne taute he Atua. (Luka 11:4) Liga talahau he taha matakainaga e mena nakai mitaki hagaao ki a tautolu. He lali ke fakahako e lekua, ne o atu a tautolu ki a ia. Kua fakakite e ia e momoko mooli ti ole ma e fakamagaloaga. Ne fakamagalo e tautolu a ia, ka e fai mena foki kua lata ia tautolu ke taute. “Aua neke taui atu e koe, ti ua taofi e koe hau a ita ke he tau tagata he hau a motu,” he talahau ia Levitika 19:18, “ka e fakaalofa atu a koe ke he tagata kua katofia mo koe kia tuga na koe kia koe; ko au ko Iehova.”

Lata ke Mataala

16. Talahau e fakataiaga ke fakakite kua liga lata ia tautolu ke taute e tau hikihikiaga ke nakai fakahukia e agaga a Iehova.

¹⁶ Ke he tau mena galo foki, liga kamatamata a tautolu ke taute e mena ne nakai fiafia e Atua ki ai. Tuga anei, liga fanogonogo e matakainaga ke he tau leo kofe fakateteki. Fakahiku ai, ne lekua e loto manamanatu haana ha kua nakai omaoma ke he fakatonuaga he Tohi Tapu ne fakatoka mai he tau tohi he “fekafekau fakamoli mo e loto matala.” (Mata. 24:45) Liga liogi a ia hagaao ke he lekua nei, ti liga manatu e tau kupu ha Paulo ne tohi ia Efeso 4:30. He eketaha mooli ke nakai taute ha mena ke fakahukia e agaga he Atua, ne fifili e ia ke tiaki e tau leo kofe fakateteki ke kamata atu he magaaho nei. To fakamonuina e Iehova e aga ne fakakite he matakainaga. Ko e mena ia, kia tumau a tautolu ke puipui neke fakahukia e agaga he Atua.

17. Ko e heigoa ka tupu ka nakai mataala mo e liogi a tautolu?

¹⁷ Ka nakai mataala mo e liogi a tautolu, liga to taute e tautolu e mahani nakai meā po ke hehē ka maeke ke fakahukia e agaga. Ha kua fakatupu he agaga tapu e tau mahani ne fakakite he ha tautolu a Matua he lagi, ka fakahukia ai e tautolu to hukia a tautolu, po ke fakamamahi a Ia—ko e mena ne nakai manako mooli a tautolu ke taute. (Efeso 4:30) Ne vagahau fakahehē he tau tohikupu Iutaia he senetenari fakamua e tau mana ha Iesu ko e ha Satani. (Totou Mareko 3:22-30.) Ko e tau fī ia he Keriso ne ‘vagahau kelea ke he agaga tapu’ ti taute e agahala ne nakai fai fakamagaloaga. Ua fakahiku pihia a tautolu!

18. Maeke fēfē ia tautolu ke eketaha kua nakai taute e tautolu e agahala ne nakai fai fakamagaloaga?

¹⁸ Ha kua nakai manako foki a tautolu ke tata lahi ke taute e agahala nakai fai fakamagaloaga, kua lata ia tautolu ke manatu e mena ne talahau e Paulo ke nakai fakahukia e agaga. Ka e kua ka fitā a tautolu he agahala kelea lahi? Kaeke kua tokihala a tautolu ti kua lagomatai he tau motua, kua fakahiku e tautolu kua fakamagalo he Atua a tautolu mo e kua nakai agahala a tautolu ke he agaga tapu. Mo e lagomatai he Atua, maeke foki ia tautolu ke kalo neke liu ke fakahukia e agaga ke he tau puhala oti.

19, 20. (a) Ko e heigoa e falu mena kua lata ia tautolu ke kalo i ai? (e) Ko e heigoa kua lata ia tautolu ke eketaha ke taute?

¹⁹ He puhala he agaga tapu he Atua, ne fakatupu ki mua e ia e fakaalofa, olioli, mo e fakalataha he tau tagata haana. (Sala. 133:1-3) Ko e mena ia, kua lata ia tautolu ke kalo neke fakahukia e agaga he fakalataha ke he loma hagahaga kelea po ke talahau e tau mena ne moumou e lilifu ha lautolu ko e tau leveki ne kotofa he agaga. (Gahua 20:28; Iuta 8) Ka kua lata ia tautolu ke fakatupu ki mua e fakalataha mo e fakalilifu ko e taha ke he taha he fakapotopotoaga. Mooli, kua nakai lata ia tautolu ke fakaohooho e fakatū matakau ki loto he tau tagata he Atua. Ne tohi e Paulo: “Ko e tau matakainaga na e, kua ole atu au kia mutolu ke he higoa he Iki ha tautolu ko Iesu Keriso, kia taha ha mutolu a tau kupu oti kana, neke tupu ai e tau veveheaga kia mutolu; ka kia fakalataha a mutolu ke he loto taha mo e manatu taha.”—1 Kori. 1:10.

²⁰ Kua makai mo e maeke a Iehova ke lagomatai a tautolu ke kalo neke fakahukia e agaga haana. Kia fakatumau a tautolu ke liogi ma e agaga tapu ti eketaha ke nakai fakahukia ai. Kia tumau a tautolu ke “gana e tau mena ke lata mo e [a]gaga,” he kumi fakamakamaka ai e takitakiaga he mogonei mo e tukulagi.

To Tali Fēfē e Koe?

• Ko e heigoa e kakano ke fakahukia e agaga he Atua?

• Maeke fēfē he tagata tukulele ki a Iehova ke fakahukia e agaga haana?

• Ko e heigoa e tau puhala ka kalo e tautolu neke fakahukia e agaga tapu?

[Fakatino he lau 30]

Fakamafiti ke fakamafola e tau taufetoko

[Fakatino he lau 31]

Ha fe e fua ne mua atu e mitaki ne fakakite e puhala vagahau haau?