Fakatumau ke Fakagahua Haau a Loto Manamanatu
KUA fiafia mooli ke kitia e gymnast makaka he fakamavilovilo fakamitaki mo e mafiti! Kua fakamalolō he Tohi Tapu e tau Kerisiano ke fakagahua e loto manamanatu ha lautolu tuga he fakamahani he gymnast a ia.
He tohi he aposetolo ko Paulo ke he tau Heperu, ne tohia e ia: “Ka ko e tau mena kakano, kua lata ia mo e tau tagata motua, ko lautolu ni kua mahani he ako mua ai [po ke fakagahua e loto manamanatu] ke mailoga e tau mena mitaki mo e tau mena kelea.” (Hepe. 5:14) Ko e ha ne tomatoma e Paulo e tau Kerisiano Heperu ke fakagahua e tau loto manamanatu ha lautolu tuga e gymnast ne fakagahuahua e tau lekeleke haana? Maeke fēfē ia tautolu ke fakamahani e tautolu e tau loto manamanatu ha tautolu?
‘Lata a Mutolu ke Eke mo Tau Faiaoga’
He fakamaama e tuaga ha Iesu ko e “ekepoa ne mua ke he kainaga fakalataha mo Mekisateko,” ne tohi e Paulo: “Kua toka ia mautolu e tau kupu loga kia [Iesu] kua uka ke fakamatala atu ai, ha kua eke a mutolu mo tau tagata teligatuli. Ha ko e mena ane mai eke a mutolu mo tau [“faiaoga,” NW] po kua lata ai ha kua leva, ka e aoga ni kia mutolu ke liu foki fakaako e taha kia mutolu ke he tau kupu he kamataaga he kupu he Atua; kua eke a mutolu tuga na lautolu kua kai huhu ka e nakai ko e tau mena kakano.”—Hepe. 5:10-12.
Maaliali ai, falu Kerisiano Iutaia he senetenari fakamua ne nakai maama mo e kaumahala ke tupu ki mua fakaagaaga. Ma e fakatai, ne uka ki a lautolu ke talia e maama kua holo ki mua hagaao ke he Fakatufono mo e peritome. (Gahua 15:1, 2, 27-29; Kala. 2:11-14; 6:12, 13) Ne uka he falu ke toka e tau mahani fakamotu ne matutaki mo e Sapati he tau faahi tapu takitaha mo e Aho he Fakafeiloaga he tau tau takitaha. (Kolo. 2:16, 17; Hepe. 9:1-14) Ati fakamalolō e Paulo a lautolu ke fakamahani ha lautolu a tau loto manamanatu ke maeke ke mailoga e mena mitaki mo e mena kelea ti tala age ki a lautolu ke “hohoko atu ke he katoatoaga [po ke motua fakaagaaga].” (Hepe. 6:1, 2) Ne liga fakaohooho mooli he tomatoma haana e falu ke manamanatu ke he puhala ne fakaaoga e lautolu e loto manamanatu ha lautolu ti liga lagomatai a lautolu ke tupu ki mua fakaagaaga. Ka e kua a tautolu?
Fakagahua e Loto Manamanatu Haau
Maeke fēfē ia tautolu ke fakagahua e tau loto manamanatu ha tautolu ke motua fakaagaaga ai? He ‘fakamahani,’ he talahau e Paulo. Ke tuga e tau gymnast, ne fakamahani e tau lekeleke ha lautolu mo e tino ke taute e tau fakamavilovilo fulufuluola mo e uka, kua lata ia tautolu ke fakagahuahua e tau loto manamanatu ha tautolu ke mailoga e mena mitaki mo e mena kelea.
“Ko e fakagahuahua e taha mena ne mua atu ke taute e koe ma e uho niu haau,” he talahau e John Ratey, ko e porofesa lagomatai fakaekekafo ke he manamanatuaga he Aoga Ekekafo Harvard. Ne talahau e Gene Cohen, ko e takitaki he Center on Aging, Health and Humanities i George Washington University, “ka fakagahua lahi e tautolu e tau uho niu ha tautolu, ko e tau tegatega he uho niu to tupu e tau hokohoko foou ti fakahiku ke fakatupu ki mua e tau vala he uho niu (synapses), po ke matuuta ai e tau manatu.”
Kua pulotu mogoia ki a tautolu ke fakagahua e tau loto manamanatu ha tautolu mo e tupu ki mua ha tautolu a iloilo ke he Kupu he Atua. He taute pihia, to mau amaamanaki a tautolu ke taute e ‘finagalo mitaki katoatoa he Atua.’—Roma 12:1, 2.
Feaki e Manako ke he “Tau Mena Kakano”
Ka manako a tautolu ke “hohoko atu . . . ke he katoatoaga,” kua lata ia tautolu ke hūhū hifo: ‘Holo ki mua nakai e maamaaga haaku ke he kupu mooli he Tohi Tapu?’ Kitia nakai he falu au ko e tagata motua fakaagaaga? Na fiafia e matua fifine ke fagai e tama mukemuke haana aki e huhu mo e fagai aki e tau mena kai he tama mukemuke a ia he tote agaia. Ka e manamanatu la ke he tupetupe haana kaeke kua loga e tau he mole ti nakaila kai mena maō ia e tama. Ke he puhala pihia foki, kua fiafia a tautolu ke kitia e tagata ne fakaako e Tohi Tapu mo tautolu kua holo ki mua ti hoko ke he tukuleleaga mo e papatisoaga. Ka e kua ka kaumahala e tagata ke holo ki mua fakaagaaga he magaaho fakamui? Nakai kia fakalolelole e mena ia? (1 Kori. 3:1-4) Amanaki e faiaoga to nakai leva ti eke foki e tutaki foou mo faiaoga.
He fakaaoga e loto manamanatu ha tautolu ke fakakakano e tau manatu kua lata ke manamanatu fakahokulo ki ai, ti putoia he mena nei e fakamakamaka. (Sala. 1:1-3) Kia nakai fakaatā e tautolu e tau fakatauhele—tuga e kitekite televisoni po ke tau matafeua, ne nakai lahi e fakaaoga he uho niu—ke taofi a tautolu mai he manamanatu ke he tau mena kua aoga lahi mahaki. Ke maeke ke feaki e tau loto manamanatu ha tautolu, kua lata ia tautolu ke moua mo e fiafia he manako ke kumikumi ke he Tohi Tapu mo e tau tohi he “fekafekau fakamoli mo e loto matala.” (Mata. 24:45-47) Lafi ke he fakaholoaga totou Tohi Tapu tumau he tagata, kua aoga ma tautolu ke fakatoka taha magaaho ma e Tapuakiaga he Magafaoa mo e fakaako fakalahi ke he tau vala tala he Tohi Tapu.
Ko Jerónimo, ko e leveki faifano i Mesikō, ne pehē na fakaako e ia e tau fufuta takitaha he The Watchtower he mogoia ni ka moua ai. Ne fakatoka foki e ia e magaaho ke fakaako tokoua mo e hoana haana. Ne pehē a Jerónimo, “Ko e aga ha maua ko e hoa mau ke totou tokoua e Tohi Tapu he tau aho takitaha, ti fakaaoga e maua e tau tohi lagomatai tuga e porosua ‘Good Land.’” Ko e Kerisiano ne higoa ko Ronald ne talahau kua lali tumau a ia ke fakatatau ke he totou Tohi Tapu he fakapotopotoaga. Ne taha po ke ua foki e kumikumiaga fakaako fakatagata haana ne fai magaaho ka taute ai. “Ko e tau kumikumiaga nei ne amaamanaki tumau au ke he tau magaaho fakaako haaku i mua,” he talahau e Ronald.
Ka e kua a tautolu? Lahi nakai e magaaho ha tautolu ne fakatoka ke fakaako e Tohi Tapu mo e manamanatu fakahokulo ke he Kupu he Atua? Hane fakagahua kia e tautolu e loto manamanatu ha tautolu ke moua e lotomatala ke taute e tau fifiliaga fakatatau ke he tau matapatu fakaakoaga he tau Tohiaga Tapu? (Fakatai 2:1-7) Kia taute mo foliaga ha tautolu ke eke mo tau tagata motua fakaagaaga, ne fakamonuina a lautolu aki e iloilo mo e pulotu ne fakamahani e tau loto manamanatu ha lautolu ke mailoga e tau mena mitaki mo e tau mena kelea!
[Fakatino he lau 23]
Fakagahua e tau loto manamanatu ha tautolu he ‘fakamahani’