Tau Hūhū he Tau Tagata Totou
Ha kua nakai fakaatā e Iehova e tapuaki tupua, ti ko e ha ne nakai fakahala a Arona he talaga e punua povi auro?
He magaaho ne talaga e Arona e punua povi auro, kua fakamau he Esoto veveheaga 32, ne moumou e ia e fakatufono he Atua hagaao ke he tapuaki tupua. (Esoto 20:3-5) Ti ko e fua, “ne ita lahi foki a Iehova kia Arona, ke tamate a ia, ti liogi ai [a Mose] foki ma Arona ke he aho ia.” (Teu. 9:19, 20) Ne “aoga lahi” nakai e olelalo he tagata tututonu ko Mose ke lata mo e tuaga ha Arona? (Iako. 5:16) E. Ha ko e ole pihia mo e liga ua foki e kakano, tuga na tali e Iehova e liogi ha Mose ti nakai fakahala a Arona.
Taha kakano ne felauaki mo e fakamauaga tua fakamooli ha Arona. He poaki ki a Mose ke fina atu ki a Farao mo e ke tamai e tau Isaraela i Aikupito, ne kotofa e Iehova a Arona ke fakatauō mo Mose ti eke mo gutuvagahau haana. (Esoto 4:10-16) Ne omaoma e tau tagata tokoua nei ti lagaloga e o atu ke he patuiki ha Aikupito, he fehagai mo e loto maō ha Farao. He haia agaia i Aikupito, ne matutaki atu e fakamauaga he gahua fakamooli, mauokafua ha Arona ki a Iehova.—Esoto 4:21.
Manamanatu foki ke he mena ne takitaki atu a Arona ke talaga e punua povi auro. Ko Mose haia he Mouga ko Sinai ke he 40 e aho. Magaaho ne “kitia he motu kua mule he hifo mai a Mose he mouga,” ne omoomoi e lautolu a Arona ke taute e atua ma lautolu. Ne talia e Arona ti talaga e mena fakatai he punua povi auro. (Esoto 32:1-6) Pete ia, ko e gahua ne taute e Arona he mole e mena ia, ne fakakite kua nakai talia mooli e ia e tapuaki tupua. Maaliali ai, ne kaumahala a ia ke he peehiaga. Ma e fakatai, he magaaho ne fakaotioti e Mose e lekua he tapuaki tupua, ko e tau fanau oti ha Levi—putoia a Arona—ne tutū mauokafua he faahi a Iehova. Tolu e afe he tau tagata tapuaki tupua ne matapatu ki ai e tapuaki tupua ne tamate.—Esoto 32:25-29.
Ne tala age a Mose he magaaho fakamui ke he tau tagata: “Kua hala lahi tuai a mutolu.” (Esoto 32:30) Ti nakai ni ko Arona ne lauia e manamanatuaga agahala he taute e hehē. Ne aoga ki a ia mo e motu e fakaalofa noa lahi ha Iehova.
He mole e mena ne tupu ke he punua povi auro, ne poaki a Iehova ki a Arona ke eke mo ekepoa ne mua. “Ti fakatapulu e koe a Arona ke he tau tapulu tapu, ti fakauku a ia mo e fakatapu a ia,” he tala age he Atua ki a Mose, “kia eke e ia e feua he ekepoa kia au.” (Esoto 40:12, 13) Maaliali ai, ne fakamagalo e Iehova e lolelole ha Arona. He loto, ko Arona ko e tagata tapuaki fakamooli, nakai ko e tagata totoko he tapuaki tupua.