Fekafekau Nakai a Koe he Magaaho Fakamua? Maeke Nakai ia Koe ke Liu Fekafekau Foki?

KUA fekafekau nakai a koe he tuaga kotofa he fakapotopotoaga Kerisiano he magaaho fakamua? Liga ko koe ko e fekafekau lagomatai po ke motua. Kua liga fekafekau a koe he taha gahua mau. Nakai fakauaua kua olioli mo e fiafia lahi a koe ke he tau kotofaaga haau, ka e fai kakano ni ati lata ia koe ke toka ai.

Liga talia e koe ke toka e kotofaaga haau ka e leveki e tau tagata he magafaoa haau. He taha faahi, liga kua fuakau po ke nakai malolō e tino. Ko e tau fifiliaga pihia kua nakai ko e fakamailoga he kaumahala. (1 Timo. 5:8) He senetenari fakamua, ne eke a Filipo mo misionare, ka ko e mogo fakamui ne nofo a ia i Kaisaria, mo e leveki ai ke he haana magafaoa. (Gahua 21:8, 9) He vahā motua he Patuiki ko Tavita i Isaraela i tuai, ne fakatokatoka e ia ma e tama taane haana ko Solomona ke hukui a ia ke he nofoaiki. (1 Patu. 1:1, 32-35) Ka kua ofania mo e loto fakaaue agaia a Iehova ki a Filipo mo Tavita ti fakalilifu ke hoko mai ke he aho nei.

Kua liga utakehe foki e kotofaaga mai ia koe. Kakano kia ha ko e mahani goagoa? Po kua lauia he tau lekua fakamagafaoa? (1 Timo. 3:2, 4, 10, 12) Liga kua nakai talia foki e koe e kakano ne taute e mena nei, mo e logonaaga hukia kua liga heleaki agaia ke hoko mai ke he aho nei.

Maeke ia Koe ke Foli he Liu Fekafekau

Maeke nakai e kotofaaga ne utakehe ke liuaki atu? Nakai ke he tau tuaga oti. Ke liu fekafekau foki mogoia, kua lata ia koe ke foli atu. (1 Timo. 3:1) Ko e ha mogoia ne manako ai ke he mena nei? Ma e kakano taha ne tukulele e koe a koe ke he Atua—ko e fakaalofa ki a Iehova mo lautolu kua fekafekau ki a ia. Ka makai a koe ke fakakite e fakaalofa ia he liu fekafekau, to fakaatā he mena nei a Iehova ke fakaaoga e lotomatala haau he mogo fakamua mo e he mole e utakehe e kotofaaga haau.

Liu manatu e fakamafanaaga ne age e Iehova ke he tau Isaraela he mole e utakehe e tuaga pauaki po ke, kotofaaga ha lautolu. Pehē e Kupu Haana: “Ko au ko Iehova nakai ni hiki e au haku mahani; ko e mena ia kua nakai fakaoti ai a mutolu ko e fanau a Iakopo.” (Mala. 3:6) Ne ofania e Iehova e tau Isaraela mo e manako ke fakaaoga fakalahi a lautolu. Ti fiafia pihia foki a ia he amanaki ke fakaaoga ia mutolu. Ko e heigoa ka taute e koe he tau tuaga haau mogonei? Ko e taute e tau matagahua fakateokarasi kua fakavē ke he lahi he malolō fakaagaaga ka e nakai ke he lotomatala pauaki. He nakai fai kotofaaga lafi ki luga a koe he fakapotopotoaga, hagaaki ke fakamalolō e tuaga fakaagaaga haau.

Ke “fakamalolo” ke he tua, kua lata ia koe ke ‘kumi kia Iehova mo e hana malolo.’ (1 Kori. 16:13; Sala. 105:4) Ko e taha puhala ka taute e koe e mena nei ko e liogi mai he loto. Ka talahau e koe e tuaga haau ki a Iehova, fakakite e tau logonaaga haau ki a ia ti ole ke he haana agaaga. He taute e mena nei, to fakatata lahi a koe ki a Iehova, mo e to taute he mena nei a koe ke tumau. (Sala. 62:8; Filipi 4:6, 13, NW) Ko e taha puhala foki ke fakamalolō e tuaga fakaagaaga haau ko e fakaholo ki mua e kumikumi ke he Kupu he Atua. Mo e nakai loga e tau matagahua he mogonei, kua liga maeke ia koe ke lahi e mena ka taute hagaao ke he kumikumiaga fakatagata mo e fakamagafaoa, he liga liu fakatoka e fakaholoaga ne uka ke taute tumau he mogo fakamua.

Mooli, kua hukui agaia e koe a Iehova he eke mo taha he Tau Fakamoli haana. (Isaia 43:10-12) Ko e kotofaaga mitaki lahi mahaki ne maeke ia tautolu oti ke moua he eke mo taha he ‘tau ekegahua he Atua.’ (1 Kori. 3:9) Ko e fakalahi e matagahua he gahua he fonua ko e puhala homo ue atu ke fakahokulo e tuaga fakaagaaga haau mo e pihia foki e tau hoa haau ke he gahua he fonua.

Fahia ke he Tau Logonaaga Haau

He utakehe e kotofaaga kua liga fakatupu e logonaaga fakamā po ke tokihala. Liga hihiga a koe ke talahau e tau gahua haau. Ka e kua ka fanogonogo e tau matakainaga taane momotua ke he talahauaga haau ka e logona agaia e lautolu kua nakai lata ke atu e falu kotofaaga ki a koe? Ko e tau fatuakiloto kelea ne liga heleaki, he fakalavelave a koe mai he foli atu po ke taute a koe ke uka he fakaako mai he mena ne tupu. Kia fakatutala la tautolu ke he tau mena ne tutupu ki a Iopu, Manase, mo Iosefa ka lagomatai e tagata ke fahia ke he tau fatuakiloto kelea.

Ne hukui e Iopu e falu ki mua a Iehova ti nofo ai a ia ko e motua mo e fakafili ke he matakau he tau tupuna. (Iopu 1:5; 29:7-17, 21-25) Ti ko e magaaho uka lahi mahaki he moui ha Iopu, ne galo haana tau monuina, tau tama, mo e malolō tino. Fakalataha mo e tau mena nei, ne galo foki e tuaga mitaki haana ki mua he falu. “Kua feki mai kia au a lautolu ne fakamui kia au,” he talahau e Iopu.—Iopu 30:1.

Kua logona e Iopu kua nakai hala a ia ti manako ke papale a ia ki mua he Atua. (Iopu 13:15) Ka e makai a Iopu ke tatali ki a Iehova, ti moua mai ai he mena nei e fua mitaki. Ne iloa e ia kua latatonu a ia ke moua e fakatonuaga, mua atu ke he puhala ne tali atu a ia ke he kamatamata ne hoko ki a ia. (Iopu 40:6-8; 42:3, 6) Fakahiku ai e mahani fakatokolalo a Iopu ke he fakamonuinaaga lahi mahaki mai he Atua.—Iopu 42:10-13.

Ka utakehe e kotofaaga haau ha ko e mahani kelea ne taute e koe, kua liga manamanatu a koe to liu nakai a Iehova mo e tau matakainaga taane Kerisiano haau ke fakamagalo mooli mo e fakanimonimo ai. Manamanatu la ke he mena ne tupu ke he Patuiki ko Manase i Iuta. Ne “eke ai e ia e tau mahani kelea loga ki mua a Iehova, ke fakahogohogomanava ai.” (2 Patu. 21:6) Ka e mate a Manase ko e tagata mahani fakamooli, he pule ko e patuiki. Tupu fēfē e mena nei?

Ne talia e Manase e akonakiaga he magaaho fakamui. He mole e fakaheu e ia e tau hatakiaga, ne totoko e Iehova a ia he tamai e tau Asuria, mo e līlī a ia ti uta fakapaea ai ke he motu mamao ko Papelonia. I ai, ne “olelalo atu ai a [Manase] kia Iehova hana Atua, mo e fakatokolalo lahi ni a ia ki mua he Atua he hana tau matua. Ne liogi foki a ia kia [I]a.” Ko e tokihala mai he loto ne moua mai ai e fua he tau gahua mitaki, ti fakamagalo ai a Manase.—2 Nofo. 33:12, 13.

Lavea ke liuaki age oti he taha e magaaho e tau kotofaaga ne utakehe. Ka e he fai magaaho he mole, to liga liuaki atu fakahaga e falu matagahua nukua fakakaupā ki a koe. He talia e tau matagahua nei mo e taute e tau mena oti kua maeke ia koe kua fa mahani ke takitaki atu ke he falu kotofaaga. Nakai pehē e mena nei kua mukamuka e puhala. Kua liga ha ha i ai e tau mena ne toho tua. Ka kua tamai he fakamakai mo e fakamanava lahi e fua mitaki.

Manamanatu ke he fakataiaga he tama taane a Iakopo ko Iosefa. He 17 e tau he moui, ne fakafua fakakelea he lafu a Iosefa a ia ke he fakatupaaga. (Kene. 37:2, 26-28) Mooli, nakai ko e tauteaga mitaki anei ne amanaki a ia mai he tau tama taane he matua taane haana. Ka e makai a ia ke fakafehagai mo e tau tuaga nei, ti fakalataha mo e monuina a Iehova ne “ha he fale a ia he hana iki.” (Kene. 39:2) Fakamui, ne tuku a ia he fale puipui. Ka e tumau ni e mahani fakamooli haana, ti fakalataha a Iehova mo ia, ati fakahiku a ia ke pule ke he tau mena oti he fale puipui.—Kene. 39:21-23.

Ne nakai iloa e Iosefa ko e fai kakano e tau mena oti nei ne tupu. Ne fakatumau ni a ia ke taute e tau mena kua maeke ia ia. Kua maeke ia Iehova ke fakaaoga a ia ke fakahao e ohi ne takitaki ke he Tega ne mavehe. (Kene. 3:15, NW; 45:5-8) Nakai fai ia tautolu ka amanaki ke taute e matagahua pauaki tuga ne taute e Iosefa, ne fakakite he tala omoomoi kua putoia e lima a Iehova ke he tau kotofaaga ne moua he tau fekafekau Haana. Matutaki ke hafagi e puhala he fifitaki a Iosefa.

Ako Mai he Tau Mena Uka ne Tutupu

Ne tutupu e tau mena fakalolelole ki a Iopu, Manase, mo Iosefa. Ne talia oti he tau tagata taane tokotolu e mena ne fakaatā e Iehova, ti igatia a lautolu mo e ako mai he tau fakaakoaga aoga ia. Ko e heigoa haau ka liga ako mai ai?

Onoono ke he mena kua liga lali a Iehova ke fakaako ki a koe. He taufetului a Iopu mo e fakaatukehe, ne hagaaki a ia ki a ia ni ti galo e tau lauiaaga ne mua atu e aoga. Mo e fakatonuaga fakaalofa ha Iehova, ne liu a Iopu moua e lagotataiaga, ti talahau: “Kua vagahau atu au mo e nakai manamanatu.” (Iopu 42:3) Ka hukia a koe he utakehe e tau kotofaaga, ‘aua neke homo e manatu haau ke he mena kua lata ke manatu ai, ka kia manamanatu fakatekiteki.’ (Roma 12:3) Kua liga lali a Iehova ke hikihiki e puhala haau ka e nakaila iloa katoatoa e koe.

Talia e akonakiaga. Liga logona mua e Manase kua nakai lata ia ia ke moua e fakatonuaga malolō. Ka e talia e ia, fakatokihala, ti tiaki e puhala hehē haana. Pete ni e puhala ne logona hifo e koe ke he akonakiaga ne moua e koe, ‘kia fakatokolalo a koe ki mua a Iehova, to fakamatalahi e ia a koe.’—1 Pete. 5:6; Iako. 4:10.

Kia fakauka mo e fakamakai. Ko e tau mena ne tutupu ki a Iosefa ka liga mukamuka lahi ke takitaki a ia ke fakafualoto he vihiatia mo e taui atu. Ka e feaki e ia e lotomatala mo e fakaalofa noa. (Kene. 50:15-21) Ka hogohogomanava a koe, kia fakauka. Kia makai ke fakamahani e Iehova.

Kua fekafekau nakai a koe he tuaga kotofa he fakapotopotoaga Kerisiano he magaaho fakamua? Fakaatā a Iehova ke liu foaki atu e tau kotofaaga ki a koe. Fakamalolō e tuaga fakaagaaga haau. Tautaofi e tau logonaaga haau he fakauka mo e mahani fakatokolalo. Talia fakamakai e ha kotofaaga ka hafagi atu ki a koe. Kia iloa mooli to “nakai lamakai a [Iehova] ke he taha mena mitaki kia lautolu kua hakohako ha lautolu a puhala.”—Sala. 84:11.

[Blurb he lau 30]

Fakamalolo ke he tua he liogi mai he loto

[Fakatino he lau 31]

Ko e fakalahi e matagahua he gahua he fonua ko e puhala homo ue atu ke fakahokulo e tuaga fakaagaaga haau

[Fakatino he lau 32]

Fakaatā a Iehova ke liu tuku atu e tau kotofaaga ki a koe