Iloa Nakai e Koe e Tau Fifiliaga Haau?
Kua malikiti e numera he tau fale fakaekekafo he lalolagi katoa ne iihi ka e nakai fakaaoga e toto. Maama katoa nakai e koe e tau fifiliaga kua fakaatā ke he faahi he tau vai tului fakaekekafo ka e nakai fakaaoga e toto? Kua lata ia koe ke iloa ke maeke ke taute haau a tau fifiliaga maama hagaao ke he tuluiaga fakaekekafo mo e iihi. Kitekite e vitiō No Blood—Medicine Meets the Challenge. Ka mole ia, liogi hagaao ke he tau mena kua ako e koe mo e lagomatai he tau hūhū i lalo.—Mailoga: Ha kua putoia ke he vitiō e tau vala iihi, kua lata e tau matua ke fakalotomatala ka kitekite e vitiō mo e tau fanau ikiiki.
(1) Ko e heigoa e matapatu kakano ati nakai talia he Tau Fakamoli a Iehova e fagai toto? (2) Ka hoko ke he tau levekiaga fakaekekafo, ko e heigoa e manako he Tau Fakamoli a Iehova? (3) Ko e heigoa e tonuhia pauaki he tau tagata gagao? (4) Ko e ha kua fai kakano mo e fakalagoaga ke fifili falu puhala tului foki? (5) Ka lahi e toto ne galo, ko e heigoa e tau mena ua fakamua he tau ekekafo ka taute? (6) Ko e heigoa e tau matapatu fakaakoaga fā ke he falu puhala tului foki? (7) Liga maeke fēfē he tau ekekafo ke (a) fakatote hifo e toto ne galo, (e) puipui e tau tegatega toto kula, (i) fakalagalaga ke lahi e toto, mo e (o) liu moua ha vala toto ne galo? (8) Fakamaama e tau puhala ne fakahigoa ko e (a) hemodilution mo e (e) cell salvage. (9) Ko e heigoa haau ka manako ke iloa hagaao ke he falu puhala tului foki? (10) Maeke nakai e tau ihiihi hagahaga kelea mo e hala vihi ke taute ka e nakai fakaaoga e tau fagai toto? (11) Ko e heigoa e tau fakalaulahiaga mitaki hane taute he faahi fakaekekafo?
Ko e talia he falu tuluiaga ne fakakite he vitiō ko e fifiliaga fakatagata ke felauaki mo e loto manamanatu he tagata kua fakaako he Tohi Tapu. Kua fifili nakai e koe e tau puhala tului ne nakai fakaaoga e toto kua makai a koe ke talia ma haau mo e fanau haau ti fakapuke e laupepa HCD? Ma e fakatutalaaga katoa ke he tau matakupu nei, liu manamanatu fakamakutu ke he “Tau Hūhū he Tau Tagata Totou” he tau fufuta he The Watchtower ia Iuni 15, 2004 mo e Ko e Kolo Toko ia Novema 1, 2000. Ti fakaaoga e tau laupepa fakamaama he uho he Ha Tautolu a Fekafekauaga he Kautu, ia Novema 2006, “Fēfē e Onoonoaga Haaku ke he Tau Vala Toto mo e Tau Puhala Fakaekekafo ne Putoia e Toto Haaku?,” ke taute e tau manatu fakatagata hagaao ke he tau fifiliaga haau ka talia po ke nakai talia. Fakahiku, kia kitia mooli kua lagaki fakahako haau a tau fifiliaga ke he haau a laupepa HCD. Ko e tau matakau leveki malolō tino ne fifili e koe mo e ha tagata he magafaoa ne nakai ko e Fakamoli kua lata ke iloa katoa e tau fifiliaga haau.
[Puha he lau 3]
• Kua fifili nakai e koe e tau tuluiaga mo e tau puhala fakaekekafo ne makai a koe ke talia ma haau mo e tau fanau haau?
• Kua uta nakai mo koe e laupepa HCD ne oti he fakapuke, neke fai mena fakaofo?