Puhala ke Tauteute ma e Feleveiaaga Fekafekau
1. Ko e heigoa e kakano he Feleveiaaga Fekafekau, ti liga moua fēfē e tautolu e aoga lahi mai i ai?
1 Kua talaga e Feleveiaaga Fekafekau ke lagomatai a tautolu ke fua mitaki e gahua he fonua. Ko e matapatu ko e fakamatala e tala mitaki he Kautu, taute tutaki, mo e fakailoa e fakafiliaga faka-Atua hane hoko mai. (Mata. 28:20; Mare. 13:10; 2 Pete. 3:7) Kua aoga lahi a tautolu mai he feleveiaaga aoga nei ka tauteute fakamitaki mo e mautali a tautolu ke tali.
2. Tauteute fēfē a tautolu ke fanogonogo ke he lauga?
2 Lauga: Ko e tau tohi fakaaoga ma e lauga kua fa fakakite he tau fakaakoaga ke he tagata lauga. Maeke ia koe ke liu fakamanatu e tohi ne kotofa, putoia e tau kupu tohi ne tutū ai, ti manamanatu ke he puhala ka fakagahua e koe e vala tala he haau a gahua he fonua.
3. Ko e heigoa ka taute e tautolu ke tauteute ma e fakatutalaaga hūhū mo e tali?
3 Fakatutala Hūhū mo e Tali: To taute e vala nei tuga e Fakaakoaga Kolo Toko, he fakakū e kamataaga mo e fakaotiaga. Vate e tau matapatu manatu he tau paratafa takitaha, ti tauteute ke foaki e tau talahauaga kū ne kakano lahi.
4. Liga maeke fēfē ia tautolu ke tauteute ma e fakatutala auloa?
4 Fakatutala Auloa: To taute e vala nei tuga e lauga, ka e to fakailoa he tagata lauga ke fai tali e toloaga. Ka vate e koe e tau matapatu manatu mo e kumi e tau kupu tohi ne tu ai, to maeke ia koe ke tali ka hūhū. Ko e matakainaga taane ka taute e vala nei to eketaha ke putoia e toloaga he taaki mai e tau matapatu manatu.
5. Ko e heigoa ka lagomatai a tautolu ke aoga lahi mai he tau fakatātāaga?
5 Tau Fakatātā: Falu vala to putoia ai e tau fakatātā tutupu mooli ke fakakite e puhala ka fakaaoga e vala tala hane fakatutala ki ai ke he fonua. To kotofa ke he tau motua po ke tau tagata fakailoa lotomatala po ke tau paionia ke lagomatai e vala nei. Ko e tauteuteaga haau ma e vala nei ka putoia e manamanatu ke he puhala ka fakatātā ai. Ka fakatātā e fakafeleveia fakataitai, manamanatu ke he puhala ka fakaaoga mo e hikihiki ai e koe ke he tau tagata kehekehe he kaina. Kia iloa tonu kua ha ha ia koe e tohi po ke mekasini ka fakaaoga he fakatātāaga. He afiafi he Tapuakiaga he Magafaoa, liga moua e mutolu e aoga ke fakataitai falu he tau fakatātāaga nei.
6. Ko e heigoa falu kakano he tauteute ma e Feleveiaaga Fekafekau?
6 Kua olioli lahi e Feleveiaaga Fekafekau ka tauteute mo e manamanatu a tautolu ke he fakaakoaga mitaki ka fakatoka mai. He taute pihia, to fua mai e fefakamafanaaki lahi. (Roma 1:11, 12) Ka fai magaaho a tautolu ke tauteute ma e Feleveiaaga Fekafekau, to mautali mitaki a tautolu ke taute e matagahua ha tautolu.—2 Timo. 3:17.