Uiina Mafanatia ki a Koe

LIGA kua fakatemole a koe he Fale he Kautu he Tau Fakamoli a Iehova he maaga haau mo e manamanatu a koe ko e heigoa la ne taute i loto? Iloa nakai e koe na hafagi e tau feleveiaaga ha lautolu he tau faahi tapu takitaha ke he tau tagata? Kua fakafeleveia mafanatia e mautolu e tau tagata ahiahi.

Ka e liga fai hūhū a koe. Ko e ha ne fakapotopoto auloa ai e Tau Fakamoli a Iehova? Ko e heigoa ne taute he tau feleveiaaga ia? Ti ko e heigoa he tau tagata ahiahi, ne nakai ko e Tau Fakamoli a Iehova, ne talahau hagaao ke he tau feleveiaaga?

‘Kia Fakapotopoto e Motu’

Mai i tuai, ne fakapotopoto auloa e tau tagata ke tapuaki mo e fakaako hagaao ke he Atua. Teitei 3,500 e tau kua mole, ne tala age ke he tau Isaraela: “Kia fakapotopoto ai e koe e motu, ko e tau tane, mo e tau fifine, mo e tau tama ikiiki, katoa mo e tau tagata kehe ha ia koe ke he hau a tau maga kia fanogonogo ai a lautolu, mo e ako ai e lautolu, mo e matakutaku ai a lautolu kia Iehova ha mutolu a Atua, mo e taofi e lautolu ke eke ai e tau kupu oti ni he fakatufono nai.” (Teutaronome 31:12) Ti fakaako ai e tau tama ikiiki mo e tau tagata momotua i Isaraela ke tapuaki mo e omaoma ki a Iehova ko e Atua.

Fai senetenari he mole, ne fakatū e fakapotopotoaga Kerisiano, nukua matutaki e tau feleveiaaga ke eke mo vala aoga he tapuakiaga mooli. Ne tohi he aposetolo ko Paulo: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki. Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki.” (Heperu 10:24, 25) Tuga he malolō e pipiaga he magafaoa ka taute mena auloa e tau tagata he magafaoa, kua malolō foki e pipiaga he fakaalofa ha lautolu ne manako ke fekafekau ke he Atua ka fakapotopoto auloa e tau Kerisiano ke tapuaki.

He tatai mo e tau Tohiaga Tapu ia, ne feleveia e Tau Fakamoli a Iehova he ha lautolu a tau Fale he Kautu lagaua he faahi tapu. Ne lagomatai he tau feleveiaaga e tau tagata ne hohoko atu ke loto fakaaue, maama, mo e fakagahua e tau matapatu fakaakoaga he Tohi Tapu. Ka maeke ke taute pihia, kua tatai e fakaholoaga he lalolagi katoa, ti igatia e tau feleveiaaga takitaha mo e foliaga fakaagaaga. Ato kamata mo e hili e tau feleveiaaga, ko lautolu ne hohoko atu kua olioli e “fefakamafanaaki” puhala he tau fakatutalaaga atihake. (Roma 1:12) Ko e heigoa ne taute ke he tau feleveiaaga takitaha nei?

Lauga Tohi Tapu

Ko e feleveiaaga fakamua ne hohoko atu ki ai e laulahi he tau tagata ko e lauga Tohi Tapu ne talaga pauaki ma e tau tagata oti, ne fa fakahoko he matahiku vahā tapu. Ne fa lauga a Iesu Keriso ke he tau tagata—he tau lauga ia ko e Lauga he Mouga ne talahaua. (Mataio 5:1; 7:28, 29) Ne tutala e aposetolo ko Paulo ke he tau tagata i Atenai. (Gahua 17:22-34) He muitua ke he fifitakiaga ia, kua taute he tau feleveiaaga he Tau Fakamoli a Iehova e lauga ne talaga pauaki ma e tau tagata tokologa, falu ne liga hohoko atu ke he feleveiaaga ke he magaaho fakamua.

Ne kamata e feleveiaaga aki e lologo mai he tohi Lologo Fakaheke ki a Iehova.a Ko lautolu ne manako ke tūtū mo e uhu e lologo kua maeke ke taute pihia. He mole e liogi kū, taute he tagata lauga kua latatonu e lauga ne 30 e minuti. (Kikite e puha “Tau Lauga kua Latatonu ma e Tau Tagata.”) Kua fakavē mauokafua e lauga haana ke he Tohi Tapu. Ne fa uiina he tagata lauga e toloaga ke kumi e tau kupu tohi kua aoga mo e ke muitua ke he totouaga he tau kupu tohi ia. Ko e mena ia, liga maeke ia koe ke tamai e Tohi Tapu ni haau, po ke ole ke he taha he Tau Fakamoli a Iehova ma e Tohi Tapu ato kamata e feleveiaaga.

Fakaakoaga he Kolo Toko

Laulahi he tau fakapotopotoaga he Tau Fakamoli a Iehova, ne mui mai he lauga ke he tau tagata e Fakaakoaga he Kolo Toko, ko e fakatutalaaga hūhū mo e tali ne taha e tulā ke he matakupu Tohi Tapu. Ne fakamafana he feleveiaaga nei a lautolu ne hohoko atu ke muitua e fifitakiaga he tau Perea he vahā a Paulo, “kua talia e lautolu e kupu mo e loto makutu, kua kumikumi ke he tau Tohi.”—Gahua 17:11.

Ne kamata e Fakaakoaga he Kolo Toko aki e lologo. Ko e vala tala ne fakatutala ki ai mo e tau hūhū ne talahau he tagata ne takitaki e fakaakoaga kua haia i loto he fufuta fakaako he mekasini nei. Maeke ia koe ke moua e lagaki he fufuta fakaako mai he taha he Tau Fakamoli a Iehova. Ko e tau matakupu ne nakaila leva e fakatutala ki ai, kua putoia e: “Tau Matua—Fakaako e Fanau ha Mutolu mo e Fakaalofa,” “Aua Neke Taui Atu e Kelea ke he Kelea he Taha,” mo e “Kakano ka Nakai Leva ti Fakaoti e Tau Matematekelea Oti Kana.” Pete kua taute e feleveiaaga ke he puhala hūhū mo e tali, kua atāina e toloaga ke fai vala, ti ko e tau talahauaga kua fa foaki e lautolu ne fitā he totou mo e manamanatu ke he vala tala mo e tau kupu tohi kua lalago e manatu. Kua fakaoti e feleveiaaga aki e lologo mo e liogi.—Mataio 26:30; Efeso 5:19.

Fakaakoaga Tohi Tapu he Fakapotopotoaga

Taha e afiafi he tau faahi tapu takitaha, ne liliu fakapotopoto foki e Tau Fakamoli a Iehova ke he Fale he Kautu ma e fakaholoaga ne tolu e vala ke he 1 e tulā mo e 45 e minuti he katoa. Ko e fakaholoaga fakamua ko e Fakaakoaga Tohi Tapu he Fakapotopotoaga, ne 25 e minuti he loa. Ne lagomatai a lautolu ne hohoko atu ke iloa lahi e Tohi Tapu ha lautolu, ke hikihiki e tau manamanatuaga mo e tau aga ha lautolu, mo e ke holo ki mua ko e tau tutaki he Keriso. (2 Timoteo 3:16, 17) Tuga e Fakaakoaga he Kolo Toko, ko e feleveiaaga nei ko e fakatutalaaga hūhū mo e tali ke he matakupu he Tohi Tapu. Kua atāina a lautolu ne manako ke talahau e tali. Ko e tohi fakaako ke he Tohi Tapu kua fa mahani ko e tohi po ke porosua ne taute fakailoa he Tau Fakamoli a Iehova.

Ko e ha ne fakaaoga e tohi ne fakavē ke he Tohi Tapu he feleveiaaga? He vahā Tohi Tapu, ne nakai ni ko e totou hokoia e Kupu he Atua. “[Ne] totou fakatekiteki ai e lautolu . . . mo e fakakite atu ai e lautolu e alito, ti maama ai e tau tagata ke he tau mena ne totou.” (Nehemia 8:8) He tau tau e kua mole, ko e tau pepa ne fakatutala hagaao ke he tau tohi ha Isaia, Tanielu, mo e Fakakiteaga ne lagomatai a lautolu ne hohoko atu ke he feleveiaaga nei ke maama e tau vala nei he Tohi Tapu.

Aoga Fekafekau Fakateokarasi

Mui mai he Fakaakoaga Tohi Tapu he Fakapotopotoaga ko e Aoga Fekafekau Fakateokarasi. Ko e feleveiaaga nei ne 30 e minuti kua talaga ke lagomatai e tau Kerisiano ke feaki e ‘puhala fakaako atu.’ (2 Timoteo 4:2) Ke fakatai ki ai, kua hūhū nakai e tama po ke kapitiga haau ki a koe hagaao ke he Atua po ke Tohi Tapu ti uka ia koe ke foaki e tali mitaki? Maeke he Aoga Fekafekau Fakateokarasi ke fakaako a koe ke foaki e tau tali atihake ne fakavē ke he Tohi Tapu ke he tau hūhū uka. Ti maeke ia tautolu ke taogo e tau kupu he perofeta ko Isaia, ne pehē: “Kua foaki mai he Iki ko Iehova kia au e alelo ha lautolu ne fakaako, ke iloa ai e au ke fakamafana ke he kupu a ia ne matematekelea.”—Isaia 50:4.

Kamata e Aoga Fekafekau Fakateokarasi aki e lauga ne fakavē ke he vala he Tohi Tapu ne fakamafana ki a lautolu ne hohoko atu ke totou he faahi tapu fakamua atu. Mui mai he lauga, ne uiina he tagata lauga e toloaga ke fai manatu kū hagaao ke he tau vala he tohi ne kotofa ke totou nukua aoga ki a lautolu. He mole e fakatutalaaga nei, ko lautolu ne fifili ke hū he aoga kua taute e tau fakataitaiaga kua kotofa ki a lautolu.

Kua kotofa e tau tagata fakaako ke totou e vala he Tohi Tapu mai i mua po ke fakatātā e puhala ke fakaako e matakupu faka-Tohi Tapu ke he taha tagata. Mole e tau lauga takitaha, kua nava he tagata fakatonutonu kua lata e tagata fakaako ke he vala ne taute fakamitaki e ia, he fakavē e talahauaga haana ke he tohi fakaako Benefit From Theocratic Ministry School Education. Fakamui, he fakahalaua, ne liga talahau e ia e tau manatu ke maeke ke holo ki mua e tagata fakaako.

Ko e vala fakatokatoka mafiti nei he fakaholoaga kua talaga ke nakai ni lagomatai e tagata fakaako ka e pihia foki a lautolu oti ne hohoko atu kua manako ke holo ki mua ha lautolu a tau puhala totou, vagahau, mo e fakaako atu. He mole e Aoga Fekafekau Fakateokarasi, ti ko e lologo ne fakavē ke he kupu he Tohi Tapu ka hafagi aki e Feleveiaaga Fekafekau.

Feleveiaaga Fekafekau

Ko e vala fakahiku he fakaholoaga ko e Feleveiaaga Fekafekau. Puhala he tau lauga, tau fakatātāaga, tau hūhū tala, mo e fai vala e toloaga, kua iloa e lautolu ne hohoko atu ke fakaako fakamitaki e kupu mooli he Tohi Tapu. Ato fakafano atu e tau tutaki haana ke fakamatala, ne fakapotopoto e Iesu a lautolu ti tala age ki a lautolu e tau fakaakoaga fakamatafeiga. (Luka 10:1-16) He mautauteute katoatoa mogonei ma e gahua fakamatala, ne olioli e lautolu e tau mena tutupu loga ne atihake. Fakamui, ne hokotaki mai he tau tutaki ha Iesu ki a ia. (Luka 10:17) Ne fa fetutalaaki e tau tutaki ke he tau mena tutupu.—Gahua 4:23; 15:4.

Ko e fakaholoaga ma e Feleveiaaga Fekafekau ne 35 e minuti kua tū he laupepa he tau mahina takitaha ne mataulu Fekafekauaga he Kautu ha Tautolu. Ko e tau mataulu tala foou ne fakatutala ki ai kua putoia e: “Tapuaki ki a Iehova ko e Magafaoa,” “Kakano he Liliu Atu Tumau a Tautolu,” mo e “Fifitaki e Keriso he Fekafekauaga ha Mutolu.” Ko e fakaholoaga kua fakaoti aki e lologo, mo e kotofa e tagata he fakapotopotoaga ke foaki e liogi fakahiku.

Talahauaga he Tau Tagata Ahiahi

Kua eketaha e tau fakapotopotoaga ke taute e tau tagata oti ke logona e mafanatia. Ke fakatai ki ai, ne logona e Andrew loga e tau tala kelea hagaao ke he Tau Fakamoli a Iehova. Ka e hau a ia ke he feleveiaaga fakapā haana, ne ofo a ia ha ko e fakafeleveia ne moua e ia. “Ko e fale mitaki lahi ke fano ki ai,” he talahau e Andrew. “Ne ofo lahi au ke he puhala kapitiga he tau tagata mo e fiafia mai ha lautolu ki a au.” Ko Ashel, ko e fuata mui i Kanatā, ne talahau pihia foki. “Kua fulufuluola lahi e feleveiaaga! Ti mukamuka ke muitua.”

Ko José, ne nofo i Parasili, ne talahaua e aga favale haana ke he maaga. Pete ia, ne uiina a ia ke finatu ke he feleveiaaga he Fale he Kautu he matakavi haana. “Ko lautolu he Fale he Kautu ne fakafeleveia mafanatia au, pete kua iloa e lautolu e aga haaku fakamua,” he talahau e ia. Ko Atsushi, ne nofo i Sapanī, ne talahau: “Tala atu e au, he finatu au ke he feleveiaaga fakamua haaku he Tau Fakamoli a Iehova, ne maimainā au. Pete ia, ne mailoga e au ko e tau tagata agaia anei. Ne lali mooli a lautolu ke taute au ke logona e mafanatia.”

Fiafia ke Hoko Mai a Koe

He fakakite he tau talahauaga i luga, kua eke e hohoko atu ke he tau feleveiaaga he Fale he Kautu mo palepale mitaki. To fakaako a koe hagaao ke he Atua, mo e puhala he fakaakoaga ne fakavē ke he Tohi Tapu ne moua e koe i ai, to fakaako e Iehova ko e Atua a koe ‘ke aoga ai a koe.’—Isaia 48:17.

Nakai totogi, mo e nakai oko tupe e tau feleveiaaga he Tau Fakamoli a Iehova. To manako nakai a koe ke finatu ke he feleveiaaga he Fale he Kautu he maaga haau? Kua uiina mafanatia a koe ke hau.