Puha Hūhū

◼ Kua lata ke kamata fēfē, mo e taute e hai e lologo hafagi he Aoga Fekafekau Fakateokarasi, Feleveiaaga Fekafekau, Feleveiaaga ma e Tau Tagata, mo e Fakaakoaga Kolo Toko?

Ko e lologo hafagi kua fitā e fifili ma e tau faahi tapu takitaha he Aoga Fekafekau Fakateokarasi ne tohi he Setulu he Aoga Fekafekau Fakateokarasi he mahina ha Oketopa i loto he uho he Ha Tautolu a Fekafekauaga he Kautu. Ko e tau lologo hafagi mo e fakaoti ma e Feleveiaaga Fekafekau he tau faahi tapu takitaha kua haia he lau 2 he Ha Tautolu a Fekafekauaga he Kautu. Pihia foki, ko e tau numera lologo ma e Fakaakoaga Kolo Toko fakafaahi tapu kua haia he lau 2 he tau fufuta takitaha he Ko e Kolo Toko. Ko e tau lologo ne kotofa ko e taha vala he feleveiaaga katoa mo e kua lata ke talahau he matakainaga taane ka taute e feleveiaaga ia ka e nakai talahau he tagata nofoa he feleveiaaga fakamua.

Ma e fakatai, ko e leveki he Aoga Fekafekau Fakateokarasi ka fakafeleveia e toloaga, talahau e lologo hafagi, taute e aoga, ti uiina e tagata lauga fakamua he Feleveiaaga Fekafekau ke hake ki mua. Ko e matakainaga taane ia ka fai vala he Feleveiaaga Fekafekau ka talahau e lologo ka hafagi aki e Feleveiaaga Fekafekau.

Ke he puhala taha ia, ko e Feleveiaaga ma e Tau Tagata to hafagi ai he tagata nofoa. To fakafeleveia mafanatia e ia e tau tagata oti he toloaga ti uiina a lautolu ke uhu auloa e lologo hafagi ne fifili he tagata lauga. Ko e tagata nofoa (po ke liga taha matakainaga taane kua lata ne fifili tuai) ka hafagi e feleveiaaga aki e liogi. Ko ia ka fakafeleveia e tagata lauga mo e talahau e matapatu he lauga haana. Ka oti e lauga, kia nakai fakatotō he tagata nofoa e tau mena ne talahau laia he tagata lauga ka e fakaaue fakakū ke he tau fakaakoaga. To fakailoa e ia e mataulu he lauga ma e tau tagata he faahi tapu ka hau, ti uiina mogoia e ia e tau tagata oti he toloaga ke nonofo ma e Fakaakoaga Kolo Toko. Nakai lata he tagata nofoa ke ole ke he toloaga ko e manako nakai ke uta e fakaalofa mo e tau ui feleveia ke he fakapotopotoaga he tagata lauga ne ahiahi mai. Ka mole ia, to uiina he tagata nofoa e takitaki Fakaakoaga Kolo Toko ke hake ki mua.

Ko e takitaki he Fakaakoaga Kolo Toko ka talahau e lologo fakamua ka fakaaoga ma e fakaakoaga. To taute e ia e fakaakoaga fakatatau ke he puhala kua tohi ti fakailoa e lologo fakaoti. Kua fa mahani e takitaki he Fakaakoaga Kolo Toko ke ui ke he matakainaga taane ne taute e lauga ke he toloaga ke taute e liogi fakaoti.

Ko e muitua ke he tau matapatu takitakiaga nei ka lagomatai e fakaholoaga he tau feleveiaaga he fakapotopotoaga ke taute ke he puhala maopoopo.