Setulu Foou he Feleveiaaga Fakapotopotoaga
1, 2. Ko e heigoa e tau hikiaga ke he tau feleveiaaga ka kamata ia Ianuari 2009?
1 He faahi tapu ha Aperila 21-27, 2008, ne logona he tau matakainaga he lalolagi katoa e fakailoaaga fiafia. “Ke kamata ia Ianuari 1, 2009, to taute fakalataha e Fakaakoaga Tohi he Fakapotopotoaga mo e Aoga Fekafekau Fakateokarasi mo e Feleveiaaga Fekafekau. Ko e higoa he Fakaakoaga Tohi he Fakapotopotoaga to hiki ke he Fakaakoaga Tohi Tapu he Fakapotopotoaga.”
2 Setulu ma e Feleveiaaga Nei he Vahā Tapu: Ko e katoa he magaaho ma e feleveiaaga nei, putoia e tau lologo mo e tau liogi, to 1 e tulā mo e 45 e minuti. To kamata e feleveiaaga aki e lologo mo e liogi (5 minu.), mui mai e Fakaakoaga Tohi Tapu he Fakapotopotoaga (25 minu.). Ka oti mogoia to taute e Aoga Fekafekau Fakateokarasi (30 minu.). Ti hafagi aki e lologo (5 minu.) e Feleveiaaga Fekafekau (35 minu.). Fakahiku e feleveiaaga aki e lologo mo e liogi (5 minu.). Ke lagomatai a koe ke tauteute ma e tau feleveiaaga nei, ko e setulu ma e Fakaakoaga Tohi Tapu he Fakapotopotoaga, ko e Aoga Fekafekau Fakateokarasi, mo e Feleveiaaga Fekafekau ka taute fakailoa he tau mahina takitaha he Ha Tautolu a Fekafekauaga he Kautu.
3. To taute fēfē e Fakaakoaga Tohi Tapu he Fakapotopotoaga?
3 Fakaakoaga Tohi Tapu he Fakapotopotoaga: To taute e feleveiaaga nei tuga e Fakaakoaga he Kolo Toko. To nakai lata ke kamata aki e liu fakamanatu he vala tala he faahi tapu fakamua. Ka kua lata e feleveiaaga ke fakakū ni e fakafeleveia. To fakaatā he mena nei ke lahi e magaaho ma lautolu oti he toloaga ke foaki e talahauaga kū. To takitaki he leveki fakapotopotoaga ke kotofa e tau motua ke fakafetokaki he taute e feleveiaaga nei, kehe e motua he tau faahi tapu takitaha.
4. To lahi fēfē e hikiaga he Feleveiaaga Fekafekau?
4 Feleveiaaga Fekafekau: To tumau ni e Feleveiaaga Fekafekau ka e kūkū e tau vala. Fa mahani ke lima e minuti he tau Fakailoaaga. Kua lata e lahi he magaaho nei ma e tau fakailoaaga kua aoga mo e tau tohi pauaki mai he la. Ko e tau fakailoaaga pihia, tuga e tau fakaholoaga ma e gahua he fonua, tau fakaholoaga fakameā, tau hokotaki fakatupe, mo e tau tohi tumau mai he la ofisa kua nakai lata ke totou mai i mua, ka e to pine hake he lapa fakailoa ma e tau matakainaga ke totou. Ko lautolu ne fai kotofaaga he fakaholoaga kua lata ke tauteute fakamitaki mo e muitua fakalahi ke he magaaho ne kotofa mo e tau fakatonuaga kua foaki.
5. He faahi tapu he ahiahi mai he leveki takaiaga, ko e heigoa e setulu ma e feleveiaaga he fakapotopotoaga?
5 Ahiahi he Leveki Takaiaga: Ko e setulu he faahi tapu he leveki takaiaga to nakai hiki. He Aho Ua to taute e Aoga Fekafekau Fakateokarasi mo e Feleveiaaga Fekafekau ka oti e lologo. To taute he leveki takaiaga e lauga 30 e minuti. Tuga kua taute mogonei he faahi tapu ka ahiahi mai e leveki takaiaga, to fakatoka taha afiafi kehe ke taute e Fakaakoaga Tohi Tapu he Fakapotopotoaga ka oti e lologo mo e lauga fekafekau he leveki takaiaga. To fakaoti e feleveiaaga aki e lologo mo e liogi.
6. Ko e heigoa e matagahua he leveki matakau?
6 Tau Feleveiaaga ma e Gahua he Fonua: To kotofa he kau he tau motua e tau leveki matakau ke leveki e tau matakau gahua he fonua mo e leoleo a lautolu he matakau. Ka manako ke he fekafekau lagomatai ke taute e matagahua ia, kua lata a ia ke kotofa ko e “fekafekau matakau.”
7. Ko e heigoa ne amanaki a tautolu ke he ha tautolu a setulu foou he feleveiaaga fakapotopotoaga?
7 Tuga ne kua fakatoka, to olioli e tautolu e afiafi he fakaako mo e atihake he tau galue fakaagaaga. To fakamalolō he mena nei a tautolu ke eke mo tau tagata fakamatala mo e tau faiaoga lauia mitaki, ne fakamahani ke fua loga ke he fekafekauaga.—Efeso 4:13, 14; 2 Timo. 3:17.
8. To aoga fēfē e tauteute tuai he tagata ki a tautolu mo e falu foki?
8 He kumikumi tuai ma e tau feleveiaaga nei ka lagomatai a tautolu ke maama mitaki e tau matapatu manatu ne peehi he tau feleveiaaga takitaha. To moua oti e tautolu e magaaho ke talahau e manatu, lafi ke he fefakamafanaaki mitaki. (Roma 1:11, 12; Hepe. 10:24) Ko e foliaga ha tautolu kua lata ke ‘kitia ai he tau tagata oti ha tautolu a mafiti’ he “fakatokatoka fakahako e kupu moli.”—1 Timo. 4:15; 2 Timo. 2:15.
9. Ko e heigoa e fifiliaga ha tautolu mo e ko e ha?
9 Kua fiafia a tautolu ke he hikiaga aoga lahi nei he tau feleveiaaga fakapotopotoaga ha tautolu. Kia fakaaoga e tautolu oti mogoia e takitakiaga he “fekafekau fakamoli mo e loto matala” ne foaki mo e pipiki fakatata ke he ha tautolu a Leveki Mamoe ne Mua he tauteute e ia a tautolu ma e “matematekelea” lahi ne tata lahi mai mogonei.—Mata. 24:21, 45; Hepe. 13:20, 21; Fakakite. 7:14.