Tau Feleveiaaga ke Fakalagalaga ke Fakaalofa mo e Tau Gahua Mitaki

Ne feleveia auloa e tau Kerisiano fakamua, ne fa mahani ke he tau loto kaina he taha tagata, ke moua e tau fakatonutonuaga mo e olioli ke he fakalatahaaga fakamatakainaga he ati hakeaga. He vaha nei, kua feleveia lagatolu e tau fakapotopotoaga he Tau Fakamoli a Iehova he fahi tapu. Kua uiina atu ki a koe ke fakalataha atu ke he taha he tau feleveiaaga nei. Kua nakai taute fakalotu pauaki e tau feleveiaaga ha lautolu, ka e tuhi fakalahi a lautolu ke he fakaakoaga mai i luga. Ne hafagi e tau feleveiaaga he fakapotopotoaga mo e fakaoti aki e lologo mo e liogi. Kua nakai totogi ke hu ki loto, mo e nakai uta fano e kapiniu tuku tupe.—Gahua 4:23-31; 14:22; 15:32, 35; Roma 16:5; Kolose 4:15.

Liga to fano fakamua a koe ke he feleveiaaga ne 45 e minuti he lauga ke he tau tagata, kua hagaao ke he tau fakaakoaga he Tohi Tapu, perofetaaga, po ke fakatonutonuaga ke he puhala he moui Kerisiano. Mui mai he lauga nei, kua ha ha i ai e kumikumiaga ke he Tohi Tapu, he fakaaoga e taha tala i loto he Ko e Kolo Toko ne taute pauaki ke kumikumi e fakapotopotoaga ki ai. Ne muitua e kumikumiaga ke he fakatokaaga nei: Kua totou e paratafa he Ko e Kolo Toko, mo e tuku atu he takitaki e tau huhu ke he mena ne tala ki ai, ke maeke ai a lautolu he toloaga ke foaki mai e tau tali he tuku hake e tau lima ha lautolu. Ne fa mahani ke fai tali ne talahau ke he tau paratafa takitaha. Kua taha e tula he loa he feleveiaaga.

He magahala he fahi tapu ia, ne ua e feleveiaaga ne taute foki ke he 45 e tau minuti. Ko e Aoga Fekafekauaga Pule he Atua e taha. Kua foaki mai e fakamahaniaga ke fakapotopoto fefe e tau vala tala ke he tau tala Tohi Tapu mo e ke fakaako atu ke lauia mitaki lahi. He mole atu e tau minuti 21 he tau fakaakoaga pauaki, kua taute he tau tagata aoga ne kua kotofa tuai e tau fakatataaga kuku. He mole atu e tau fakatataaga takitaha, ne foaki he tagata ne takitaki e aoga e fakatonutonuaga ke fakakite ko e maeke fefe e tagata aoga ke fakaholo atu ki mua. Kua ha ha i ai e falu tohi fakaako ne tauteute pauaki ke fakaaoga i loto he aoga nei. Kua maeke a lautolu ne fakalataha tumau ke he tau feleveiaaga ke hu he fakamau hifo ki ai, kaeke kua momoui a lautolu ke he puhala kua tatai mo e tau mahani Kerisiano.

Kua ui e feleveiaaga ne muitua ki ai ko e Feleveiaaga Lagomatai. Kua katoatoa ke tolu po ke fa e tau valavala kua gahua ki ai ke foaki atu e tala mitaki ke he taha fale mo e ke he taha fale mo e falu vala foki he fekafekauaga. Ne foaki mai e tau maga mena nei ke he tau lauga, tau fakatutalaaga, po ke tau fakataitaiaga, fakalataha mo e falu kau auloa he toloaga ke tali. Kua fakave lahi e fakaholoaga ke he tau vala tala i loto he Our Kingdom Ministry (Ha Tautolu a Fekafekauaga he Kautu), ko e lau pepa ne fa e atu tohi ke he tau fakaakoaga ne lolomi lagataha he Kaufakalatahaaga Kolo Toko he tau mahina takitaha.

Kua taha foki e feleveiaaga kumikumi he fahi tapu ne taute he tau matakau ikiiki, ne fa mahani ke taute ke he tau loto kaina nonofo i loto he fonua ne kotofa ke he fakapotopotoaga. Ne fakave e kumikumiaga ke he Tohi Tapu mo e taha tohi fou ne lolomi he Kaufakalatahaaga. Ha kua tote e matakau, kua ha ha i ai e tau magaaho mitaki ma lautolu oti kana ke kau auloa ke he fakatutalaaga, mo e kua ha ha i ai e tau magaaho mitaki ma lautolu ne fakalataha ki ai ke feiloaaki mitaki e taha ke he taha.

Kua loga e tau fakapotopotoaga ne taute ha lautolu a tau feleveiaaga i loto he tau Fale he Kautu ne talaga ni he Tau Fakamoli a Iehova. Kua maluia e tau mena fakamole mai he tau mena fakaalofa foaki noa ne moua mai ia lautolu ni ko e Tau Fakamoli, mo e ke he tau mena loga kua taute noa he tau tagata gahua e tau mena ka e nakai fai totogi. Kua ha ha he tau feleveiaaga oti kana e tau puha foaki mena fakaalofa ke fakaaoga e lautolu kua manako ke foaki mena fakaalofa.

Kua lagomatai he tau feleveiaaga e Tau Fakamoli a Iehova ke mumuitua ke he fakatonutonuaga ia Heperu 10:24, 25: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e [tautolu] kua tata tuai e aho.”

• Ko e heigoa e tau maga mena he feleveiaaga Kerisiano fakamua kua maeke ke kitia i loto he tau feleveiaaga he Tau Fakamoli a Iehova?

• Kia talahau fakapapale e tau mena ne foaki mai he tau feleveiaaga lima ne taute tumau he Tau Fakamoli?

• Ne moua fefe e tau fale he feleveiaaga?

[Tau Fakatino he lau 14]

Ko e motua ne takitaki e Kumikumiaga Kolo Toko, he Tau Fahi Kaufakalataha

Fakatino ne moua mai he Aoga Fekafekauaga Pule Atua, he Tau Aelani Faeroe

Matakau kumikumi he loto kaina nonofo i Iapa

Ko e Fale he Kautu, i New Braunfels, Texas, F.K.A., ne talaga he Tau Fakamoli a Iehova he ua e tau aho

[Tau Fakatino he lau 15]

Tau Fale he Kautu he tau motu kehekehe

Sapani

Ausetalia

Ausetia

Sepania