To Tali Fēfē e Koe?
1. Ko e ha kua lata ia tautolu ke onoono ke he fifitakiaga ha Iesu ka fai hūhū mai?
1 Ke hoko mai ke he mogonei kua ofomate e tau tagata ke he puhala lauia mitaki ha Iesu he fehagai ke he tau hūhū mo e tau manako. Ka feleveia mo e tau vahega hūhū kehekehe he gahua ha tautolu ke he fonua, kua lata ia tautolu ke fifitaki e puhala ne taute e Iesu.—1 Pete. 2:21.
2. Ko e heigoa ka lagomatai a tautolu ke tali lauia mitaki ke he hūhū?
2 Fanogonogo Fakamua: Ne manamanatu a Iesu ke he manatu he tagata hūhū. He falu magaaho kua lata e mena nei ke hūhū ke iloa e kakano mooli he tagata. Hūhū mai e taha, “Talitonu nakai a koe ki a Iesu?” ne liga manamanatu ko e ha ne nakai fakamanatu e koe e Kirisimasi. Ka iloa mooli e koe e manatu he tagata hūhū, maeke ia koe ke fakamaama fakamitaki ki a ia.—Luka 10:25-37.
3. Ko e heigoa kua fakaatā mai ke lagomatai a tautolu ke moua e tau tali faka-Tohi Tapu kua atihake?
3 Tali Aki e Kupu he Atua: Kua fa mitaki lahi mahaki ke fakakite e puhala ne tali he Tohi Tapu e hūhū. (2 Timo. 3:16, 17; Hepe. 4:12) Ko e tohi Reasoning mo e “Bible Topics for Discussion” he New World Translation of the Holy Scriptures ne fakamooli ai ke aoga lahi he foaki e tali hako. Pete he nakai talia he tagata hūhū ko e Tohi Tapu e pule, maeke ia koe ke tala age fakailoilo e mena ne fakaako he Tohi Tapu. Fakamafana ke he tagata ke manamanatu fakahokulo ke he pulotu hakotika ne moua i loto he Tohi Tapu. He fifitaki e koe a Iesu, to eke e tau tali haau ke “tuga ne tau fua moli auro ia ke he tau kato ario kua lakuina”—kua lilifu, fulufuluola, mo e aoga.—Fakatai 25:11.
4. He tau magaaho fe kua mitaki lahi mahaki ke nakai lali ke tali e tau hūhū oti?
4 Lata Kia ia Tautolu ke Tali e Tau Hūhū Oti? Ka nakai iloa e koe e tali ke he hūhū, ua fuafuakelea ke pehē: “Ai iloa au, ka e maeke ia au ke kumikumi ke he hūhū haau ti liu mai mo e tau tali ke he kumikumiaga haaku.” Ko e fakatokolalo mo e fiafia fakatagata pihia ka fakalagalaga e tagata he kaina ke uiina a koe ke liu age. Ka mailoga e koe ko e hūhū he tau tagata totoko kua liga lali ke kamata e taufetoko, fifitaki a Iesu he ua tali atu tumau. (Luka 20:1-8) Pihia foki, ka lali e tagata ne nakai fiafia ke he kupu mooli ke putoia a koe ke he taufetoko, fakaoti fakatotonu e fakatutalaaga ti fakaaoga e magaaho haau ke kumi a lautolu ne loto mooli.—Mata. 7:6.
5. Ko e heigoa e fifitakiaga ne fakatoka e Iesu he tali e tau hūhū?
5 Na iloa e Iesu kua aoga lahi e falanaki ki a Iehova ke taute aki e matagahua haana ke ‘talahau e kupu mooli’ ne putoia e tali ke he tau hūhū fakalagalaga mai he loto. (Ioane 18:37) Ko e lilifu mooli ke fifitaki a Iesu he foaki e tali ki a lautolu “ne kotofa ke he moui tukulagi”!—Gahua 13:48.