To Kamata Nakai e Koe e Fakaako Tohi Tapu ia Oketopa?
1. Ko e heigoa e foaki ma Oketopa?
1 Ko e foaki ma Oketopa ko e tau mekasini Kolo Toko mo e Awake! Ke liu atu ke fakakia e tagata ne fiafia, kua fakamafana ki a tautolu ke foaki e tuleke Manako Nakai a Koe ke Iloa e Kupu Mooli? ti lali ke kamata e fakaako Tohi Tapu. Maeke fēfē ke taute e tautolu e mena ia he liu aahi atu?
2. Liga fakaaoga fēfē e tautolu e tuleke Iloa e Kupu Mooli ke kamata e fakaako Tohi Tapu ka taute e liu aahi atu ke he tagata ne talia e tau mekasini?
2 Puhala ke Fakaaoga e Tuleke: Liga pehē a tautolu: “Ko e tau mekasini ne toka e au mo koe kua fakamafana e tau tagata he tau feakiaga mo e tau lotu kehekehe oti ke kumikumi e Tohi Tapu. [Age ke he tagata he kaina e tuleke Iloa e Kupu Mooli, ti fakakite e tau hūhū i mua.] Hanei falu hūhū aoga ka foaki he Tohi Tapu e tau tali atihake. Kua hūhū nakai e koe e tau hūhū nei?” He moua e tali he tagata he kaina, fakatutala tokoua ke he tali mai he tuleke ke he taha he tau hūhū, ti totou taha he tau kupu tohi tapu ne tū ai. Ti fakamaama e mena nei ko e fakataiaga tote ne fakaaako he Tohi Tapu, ti age ki a ia e tohi Fakaako he Tohi Tapu. Ti maeke ia tautolu ke fakatutala ke he tau paratafa hafagi he veveheaga ne fifili e ia mai he tau mataulu tala. Po ke liga fifili e tautolu ke fuluhi ke he lahi he vala tala kua moua ke he matakupu ne fakatutala a tautolu mai he tuleke. Hanei e tau tohi ka fakaaoga e tautolu:
● Kua leveki moli kia he Atua a tautolu? (lau 9-11, para. 6-10)
● To fai fakaotiaga nakai e felakutaki mo e matematekelea? (lau 12, para. 12-13)
● Ko e heigoa ka tupu ki a tautolu ka mamate? (lau 59-60, para. 7-8)
● Fai amaamanakiaga nakai ma lautolu ne mamate? (lau 71, para. 13-15)
● Maeke fēfē au ke liogi ti logona he Atua? (lau 166-167, para. 5-8)
● Maeke fēfē au ke moua e fiafia ke he moui? (lau 9, para. 4-5)
3. Maeke fēfē a tautolu ke fakakehekehe e puhala ha tautolu falanaki ke he tau tuaga?
3 Mooli, ka nakai fakaatā he tau tuaga ha tautolu a tautolu ke kamata mo e fakakite e fakaakoaga he tohi Fakaako he Tohi Tapu he liu aahi atu fakamua, maeke ia tautolu ke taute tumau e tau fakatokaaga ke liu aahi atu mo e matutaki ai e fakatutala. Ti falanaki ke he fiafia he tagata, maeke ia tautolu ke fifili ke fakatutala foki ke he falu hūhū he tuleke he tau aahi atu loga ato fakamaama e tohi. Kia fakaaoga fakamitaki e tautolu e tuleke lagomatai lahi nei ia Oketopa ke kamata e fakaako Tohi Tapu ti lagomatai a lautolu ne loto fakamooli ke ‘iloa e mena moli.’—Ioane 8:31, 32.