Manamanatu Fakahokulo ke he Liogi—Lata ma e Tau Fekafekau Fakamakutu
1. Ko e heigoa ne lagomatai a Iesu ke kalo kehe neke tauhele mai he matapatu gahua haana?
1 Na fakaaoga e Iesu e afiafi ke fakamaulu e tau tagata mo e vega e tau temoni. He moua he tau tutaki haana a ia he aho hake, ne pehē a lautolu: “Ha ne kumi he tau tagata oti a koe,” kua fakalagalaga ki a ia ke fakatumau ke he tau gahua malolō lahi haana. Pete ia, nakai tauhele a Iesu mai he matapatu gahua haana he fakamatala e tala mitaki. Tali age a ia: “Kia o a tautolu ke he tau māga ne tata mai, ke fakamatala atu e au ki ai e vagahau mitaki, ha ko e mena ia ne hau ai au.” Ko e heigoa ne lagomatai a Iesu ke fakatumau e onoonoaga haana? Ne uhu matike a ia ke liogi mo e manamanatu fakahokulo. (Mare. 1:32-39) Maeke fēfē e manamanatu fakahokulo ke he liogi ke lagomatai foki a tautolu ke eke mo tau tagata fakamatala fakamakutu?
2. Ko e heigoa he manamanatu fakahokulo ka lagomatai a tautolu ke fakatumau e fakamakutu ma e gahua he fonua?
2 Manamanatu Fakahokulo ke he Heigoa? Ne mailoga e Iesu e tau tagata ne “fakafita a lautolu, mo e tiaki atu ai, tuga e tau mamoe nakai fai leveki a lautolu.” (Mata. 9:36) Pihia foki, maeke ia tautolu ke mailoga e lata lahi he tau tagata ma e tala mitaki. Liga manamanatu a tautolu ke he mafiti he tau magaaho. (1 Kori. 7:29) Maeke ia tautolu ke manamanatu ke he tau gahua mo e tau mahani a Iehova, ko e kotofaaga lilifu ha tautolu ke eke mo Tau Fakamoli a Iehova, mo e tau koloa uho fakaagaaga ne fakaako e tautolu mai he Kupu he Atua kua nakaila iloa he tau tagata he fonua ha tautolu.—Sala. 77:11-13; Isaia 43:10-12; Mata. 13:52.
3. Magaaho fe ka manamanatu fakahokulo a tautolu?
3 Magaaho Fe ke Manamanatu Fakahokulo? Tuga he taute e Iesu, falu ne uhu matike ka mamanofua ai. Kua mitaki lahi mahaki ke he falu ke manamanatu fakahokulo he mogo afiafi ato fano ke mohe. (Kene. 24:63) Pete e lavelave e fakaholoaga, maeke ia tautolu ke kumi magaaho ke manamanatu fakahokulo. Falu ne taute pihia he heke he peleōafi lau tagata. Falu ne fakaaoga e vala he okioki kai laā ha lautolu ke manamanatu fakaeneene. Tokologa ne manamanatu fakahokulo ato o atu he fonua, ke he magaaho kū, kua lagomatai a lautolu ke fakamatala fakamakutu mo e fakamalolō lahi.
4. Ko e ha kua lata ia tautolu ke manamanatu fakahokulo?
4 To fakahokulo he manamanatu ke he liogi e manako ha tautolu ke fekafekau ki a Iehova, fakamatila e onoonoaga ha tautolu, mo e fakamalolō e fifiliaga ha tautolu ke matutaki e fakamatala. Ko Iesu, ko e Iki Fekafekau he Atua, kua aoga mai he manamanatu fakahokulo, ti to pihia foki a tautolu.