Moua e Fiafia he Fakamatala e Tala Mitaki

Kua uka kia a koe ke fakamatala? Tokologa ia tautolu ka talia mo e hūhū ia. Ko e ha? Liga fehagai tumau a tautolu mo e ekefakakelea po ke vale he fonua ha tautolu po ke hopoate ke tutala ke he tau tagata kehe. Mooli, maeke he tau mena nei ke fakalolelole e fiafia ha tautolu. Ka e fekafekau a tautolu ke he Atua fiafia ne manako ki a tautolu ke fekafekau ki a ia mo e fiafia. (Sal 100:2; 1Ti 1:11) Ko e heigoa e tau kakano mitaki ne tolu ke fiafia he fakamatala?

Fakamua, kua fakamatala e tautolu e fekau he amaamanakiaga. Pete kua galo fakahaga e amaamanakiaga he tau tagata mogonei, maeke a tautolu ke fakapuke e tau loto he tau tagata ke he “tala mitaki.” (Isa 52:7) Ka e maeke foki e tala mitaki he Kautu he Atua ke fakafiafia a tautolu. Ato ō ke fakamatala, manamanatu fakahokulo ke he tau monuina ka tamai he Kautu he Atua ke he lalolagi.

Uaaki, ko e tala mitaki ne fakamatala e tautolu kua aoga ke he tau tagata he puhala fakatino mo e fakaagaaga. Fakaako e lautolu ke tiaki e tau gahua hagahaga kelea mo e moua e amaamanakiaga he moui tukulagi. (Isa 48:17, 18; Rom 1:16) Maeke a tautolu ke manamanatu kua taute e tautolu e gahua kumi mo e fakahao. Pete kua nakai manako e falu tagata ke moua e fakahaoaga, fakatumau a tautolu ke kumi a lautolu ne manako.​—Mat 10:11-14.

Toluaki mo e mua atu e aoga, ko e fakamatala ha tautolu kua fakaheke a Iehova. Kua uho lahi ki a ia e gahua fakamatala ha tautolu. (Isa 43:10; He 6:10) Lafi ki ai, foaki fakamakai e ia e agaaga tapu haana ke fakakatoatoa haana gahua. Ko e mena haia, olelalo ki a Iehova ma e fiafia ko e taha fua he agaaga tapu. (Kal 5:22) Mo e lagomatai haana, maeke a tautolu ke kautū mai he tau fakaatukehe ha tautolu ti fakamatala fakamalolō. (Gah 4:31) Pete ne tali he fonua ha tautolu, to moua e tautolu e fiafia ke he kotofaaga ha tautolu ke fakamatala.​—Esk 3:3.

KITEKITE E VITIŌ LIU FIAFIA HE FAKAAKO MO E MANAMANATU FAKAHOKULO, TI FAKATUTALA KE HE TAU HŪHŪ NĀ:

• Ko e ha kua lata ia tautolu ke tuku fakamua e tau puhala kai fakaagaaga ha tautolu, pete ka lahi e magaaho kua fakamatala a tautolu he tau mahina takitaha?

• Ke he puhala fe kua lata a tautolu ke fifitaki a Maria?

• Magaaho fe kua fakatoka e koe ke manamanatu fakahokulo ke he Kupu he Atua?

• Ko e heigoa kua fakafiafia a koe ke fakamatala e tala mitaki?