Lagomatai Nakai a Koe ke he Hokotakiaga Hako?

1. Ko e heigoa e tau fakafifitakiaga mai he Tohi Tapu kua fakakite e aoga he hokotaki?

¹ Loga e tau fakamauaga Tohi Tapu ne kua fakamau e tau numera pauaki, kua lagomatai ke kitia mitaki e fakatino ke he mena ne tupu. Ke fakatai, ne moumou e Kiteona mo e toko 300 kautau haana e heaga api he tau Mitiana. (Fakafili 7:7) He Penetekoso 33 V.N., kavi ke he 3,000 ne papatiso ti nakai leva kua holo hake e numera ha lautolu kua talitonu ke he kavi 5,000. (Gahua 2:41; 4:4) Kua kitia mai he tau fakamauaga nei ko e tau fekafekau he Atua i tuai kua lali fakamalolō ke fakaputuputu mo e fakakatoatoa e tau fakamauaga hako.

2. Fai aoga kia ke he fakatokatokaaga ke hako e tau hokotaki?

² Kua fakaako mai he fakatokatokaaga ha Iehova a tautolu he vahā nei ke hokotaki ha tautolu a gahua he fonua he tau mahina takitaha. Ko e ha tautolu a kaufakalataha mo e fakamooli ke he fakaholoaga nei to lagomatai ke holo mitaki e levekiaga ke he gahua fakamatala. Ko e tau hokotaki kua maeke ke fakakite mai e falu faahi he gahua fakamatala kua lata ke fai lagomatai po ke kua lata ke fai tagata foki ke lagomatai e tau matakavi ia he fonua. Ki loto he fakapotopotoaga, ko e tau hokotaki he fonua ka lagomatai e tau motua ke kitia a lautolu kua maeke ke fakalaulahi e ha lautolu a gahua, fakalataha mo lautolu kua liga lata ke fai lagomatai. Ko e tau hokotaki ke he holo ki mua he gahua fakamatala ke he Kautu kua foaki mai e tau fakamafanaaga ke lata mo e fakapotopotoaga Kerisiano katoa. Kua taute nakai e koe haau a vala ke lafi ke he hokotaki kua hako?

3. Talia fēfē e koe haau a matagahua fakatagata?

³ Ko e Fakalagoaga Fakatagata: Ko e ha kua nakai fakamau ai e koe haau a gahua he tau magaaho oti ka fano he fonua? Falu kua fakaaoga e kalena po ke tohi fakamau fakatagata. Falu kua uta ni e laupepa fakamau hokotaki mo lautolu. He matahiku he mahina kua lata ke age fakamafiti haau a hokotaki ki a ia ne leveki e matakau. Po ke, ka manako a koe, maeke ke tuku haau a hokotaki ki loto he puha hokotaki he Fale he Kautu. Ko e manamanatu tumau ke fakamau haau a gahua ko e fakakiteaga fakalilifu ke he fakaholoaga a Iehova mo e fakaalofa ke he tau matakainaga kua kotofa ke fakamaopoopo mo e fakamaumau e tau hokotaki.​—Luka 16:10.

4, 5. Ko e heigoa e matagahua kua fakalago ke he leveki matakau?

⁴ Matagahua he Tau Leveki Matakau: Ko e leveki mamoe mataala mo e makaukau, kua fiafia lahi e leveki ke he tau gahua he matakau he mahina katoa. (Fakatai 27:23) Kua iloa e ia ka fano tumau e tagata fakailoa, fai kakano mo e fiafia ke he gahua, ti mafiti a ia ke foaki e lagomatai kaeke kua fai ne nakaila putoia ke he gahua he mahina katoa. Ko e kupu fakamafana, ko e tau manatu fakaohooho mitaki, po ke uiina ke fakatauo mo ia he gahua he fonua, fa mahani ko e mena ni a ia kua lata ke taute.

⁵ Ke he fakahikuaga he mahina ko e leveki matakau kua lata ke mailoga mooli kua igatia a lautolu he matakau mo e mumuitua ke he fakalagoaga ke hokotaki e tau gahua, ke maeke he tohi kupu ke fakafano e hokotaki hako he fakapotopotoaga ke he la ofisa. Ka mafiti ke tuku e tau hokotaki ha tautolu kua maeke ke moua e hokotaki mooli mo e hako kua fakaata mai e mena kua taute he fonua. To taute nakai e koe haau a vala ka fakamafiti ke hokotaki haau a gahua he tau mahina takitaha?