Kupu he Atua ma Tautolu Puhala ia Ieremia
1. Tatai fēfē e tau manako he vahā nei ke tuga ha lautolu he tau Iutaia he vahā a Ieremia?
1 He vahā ha Ieremia, laulahi e tau Iutaia he motu ha Isaraela ne toka e Atua mooli. (Iere. 5:20-22) Ne lata a lautolu ke hiki ke talia e tapuakiaga ki a Iehova. Pihia foki, tokologa e tagata he vahā nei kua lata ke fakaako ke matakutaku ki a Iehova mo e tutuli e tapuakiaga mooli. Maeke fēfē a tautolu ke fifitaki a Ieremia he mena nei?
2. He fonua ha tautolu, maeke fēfē a tautolu ke fifitaki e puhala ha Ieremia?
2 Kavi ke he hogofulu e tau kua mole ato moumou a Ierusalema, ne fakaaoga e Iehova a Ieremia ke fakamaama e amaamanakiaga ma lautolu ne fakapaea ki Papelonia. Totou e tautolu: “To hagao atu au kia lautolu ke mitaki ai, mo e liuaki mai e au a lautolu ke he motu nai; to ati hake e au a lautolu, ka e nakai ulu ki lalo; to to e au a lautolu ka e nakai taaki.” Maeke a Ieremia ke pehē ki a lautolu ia: “To fai mena foki ke amaamanaki ki ai a koe ke he hau a fakahikuaga.” (Iere. 24:6; 26:3; 31:17) Ne taute e Ieremia e onoonoaga he tau tagata ke he Atua ko e haana ni. Ne taute e ia haana gahua he fonua mo e manamanatuaga mooli, he tala age e tau tomatomaaga ha Iehova: “Kia liliu mai ā mutolu takitaha e tagata mai he puhala kelea hana, kia taute e mutolu ha mutolu a mahani ke mitaki.”—Iere. 35:15.
3. Ko e heigoa e onoonoaga kua lata ia tautolu ke tiaki he fakamatala e tautolu e tala mitaki?
3 Ko e fakaalofa hokulo ha Ieremia ke he tau tagata kua nakai galo. He moumouaga i Ierusalema, ne fakatumau a ia ke fakaalofa hofihofi noa ki a lautolu. (Aue 2:11) Ko e tau Iutaia ni ka tukumale ke he ha lautolu a matematekelea. Ka e nakai pehē a Ieremia, ‘Na tala atu pihia e au.’ Ka e logona e ia e momoko lahi ha ko e mena ne tupu ki a lautolu. Pihia foki, ko e gahua he fonua ha tautolu kua nakai lata ke gahua teao, he taute noa ni ko e matagahua. Ko e tau laliaga ha tautolu he fakamatala kua lata ke fakakite kua lahi mahaki e fakaalofa ha tautolu ke he Atua homo ue atu ti pihia mo e tau tagata ne kua tufugatia ke he haana fakatai.
4. Ko e heigoa e aga ha Ieremia kua lata ke moua e tautolu?
4 Nakai fai kotofaaga po ke tuaga he lalolagi nei ka mua atu he fakamatala ke lata mo e Atua mooli. Ne logona hifo pihia e Ieremia, he tohi: “Ne moua hau a tau kupu, ti kai ai e au; ti eke hau a tau kupu kia au mo mena ke olioli ai mo e fiafia ia haku loto; ha kua ui au ke he hau a higoa, Iehova na e.” (Iere. 15:16) He fakamatala e tautolu e tala mitaki, tokologa atu foki ne liga o mai ke iloa mo e ofania a Ia kua foaki e tau momoui ha tautolu ki ai. He fekafekau mo e fakamakutu mo e fakaalofa, he fifitakiaga ha Ieremia, to lafi atu foki a tautolu ki ai.