‘Kia Tapu e Higoa he Atua’
1. Ko e heigoa e matapatu he fakaholoaga he toloaga takaiaga he tau 2012, mo e ko e heigoa e fakavēaga?
1 Ko e monuina ha ia ha tautolu ke fua e higoa he Pule Katoatoa he Lagi mo e Lalolagi, ko Iehova! Ko e Atua ni ne tuku mai ki a tautolu e higoa haana ke fua, mua atu tali mai he tau 1931, ko e Tau Fakamoli a Iehova, kua fakamailoga a tautolu ke he matahigoa tonu ha Iehova. (Isaia 43:10) Ko e tama fuataha ni he Atua ko Iesu ne kua fakatokoluga e ia e higoa he Atua, kua tuku fakamua e ia ke he liogi fakatai haana. (Mata. 6:9) Ko e tau kupu a Iesu kua fakavē ki ai e matapatu he fakaholoaga he toloaga takaiaga ha tautolu ma e tau he fekafekauaga 2012. Ko e “Kia Tapu e Higoa he Atua.”
2. Ko e heigoa e tau uho manatu kua amaamanaki a tautolu ki ai?
2 Tau Mena ka Logona e Tautolu: He Aho Faiumu ko e lauga “Kia Fakapuloa e Higoa he Atua ha ko e Tau Fekafekau Mau” to fakatutala ke he kakano ko e ha e gahua mau ke he fekafekauaga, ko e palepale mitaki he moui. To logona foki e tautolu e fufuta lauga “Kia Fakaeneene Neke Ekefakakelea e Higoa ha Iehova,” to lagomatai a tautolu ke kalo kehe neke mokulu ke he tau matahele ne fā. Ko e tau hūhū, Ko e heigoa ka lagomatai aki a tautolu ke fakamatala fakamalolō kaeke kua tote e fiafia mai he tau tagata? mo e, Ko e heigoa ka lagomatai aki a tautolu ke fai kakano e fekafekauaga? to tali mai he lauga “Ko e Ha kua Latatonu ni ke Fakatapu e Higoa he Atua.” Ko e Aho Tapu to olioli a tautolu ke he fufuta lauga ne fā e vala hagaao ke he fakatapuaga he higoa he Atua ha ko e ha tautolu a tau manamanatuaga, puhala vagahau, tau fifiliaga, mo e tau mahani. To mua atu e loto fakaaue ha lautolu ne foou ke he lauga ke he tau tagata, “To Fakatapu e Iehova Haana Higoa Mua Ue Atu ia Amaketo.”
3. Ko e heigoa e monuina ha tautolu, ti lagomatai fēfē he fakaholoaga a tautolu?
3 Nakai leva to maeke a Iehova ke fakatapu haana higoa. (Eseki. 36:23) Ka e he magaaho nei, ha ha ia tautolu e monuina mua ue atu ke lagaki hake e tau mena oti kua hukui he higoa tapu ha Iehova. Mauokafua a tautolu, ko e fakaholoaga he toloaga takaiaga nei to lagomatai a tautolu takitokotaha ke fakamooli e fakalagoaga uho ke fua e higoa he Atua.