Ko e Tohi Mai he Kau Fakatufono
Tau Matakainaga Fakahele he Tau Fakamoli ha Iehova:
Ko e tau tagata lilifu a tautolu he fua e higoa ha Iehova, ko e Pule Katoatoa he Lagi mo e Lalolagi! Ko e higoa ia kua nakai fai fakaotiaga, nakai galo, mo e nakai fakatatai. Ko Iehova ne foaki ki a tautolu e higoa haana ke fakailoa, ti kua kitia a tautolu ke he higoa mua ue atu ia tali mai he tau 1931. (Isaia 43:10) Kua matalahi a tautolu ke eke a tautolu mo Tau Fakamoli a Iehova.
Kua lali fakamakamaka e Tiapolo ke utakehe e higoa he Atua. I lalo he pule haana, kua tiaki he tau motu e higoa a Iehova. Ko Papelonia Lahi, ko e lotu fakavai he tau kautu he lalolagi ne vihiatia e higoa faka-Atua mo e utakehe mai ai he tau fakaliliuaga loga he tau Tohi Tapu. Kehe mamao, ne fakatokoluga e Iesu e higoa he Matua haana, he kamata aki he liogi fakatai ne fakaako e ia ke he tau tutaki haana. Ne tala age e ia: “Kia liogi pehe a mutolu, Ha mautolu a Matua na e, ha ha he lagi, kia tapu hau a higoa.” (Mata. 6:9) Fakamui, he liogi mafanatia ke he haana a Matua, ne pehē a ia: “Kua fakakite atu e au hau a higoa ke he tau tagata ne foaki mai e koe kia au mai he lalolagi.” (Ioane 17:6) He muitua ke he fifitakiaga mitaki a Iesu, kua eketaha fakalahi a tautolu ke fakatokoluga mauokafua e higoa a Iehova ke he lalolagi katoa.
Ko e lauga he tau ma e 2009, ‘Kia talahau fakatonu atu e tala mitaki,’ ne fakalagalaga a tautolu ke fakalataha katoatoa ke he gahua fakamatala ha tautolu. (Gahua 20:24) Kua fakamonuina lahi mooli e Iehova e tau laliaga ha tautolu he tau he fekafekauaga kua mole. Ko e fakamatala lahi mahaki kua taute ke he lalolagi katoa ke fakaheke mo e fakatokoluga e higoa a Iehova. Ko e tapunu foou he tau tagata fakailoa ne 7,313,173 ne matutaki auloa e tau leo he fakamatala ke he tau tagata, ti pihia mo e fakaako a lautolu hane loto fakamooli hane kumi tuluiaga ke he tau lekua loga nukua fehagai mo lautolu he tau aho takitaha. Ko lautolu e 18,168,323 ne o atu ke he Fakamanatuaga he mate he Keriso kua fakakite kua totou miliona agaia ne nakaila ui ke he higoa a Iehova ato fakaotioti e fakatokaaga kelea nei.
He fakaatā agaia e Iehova, to matutaki a tautolu ke fakamatala fakamakutu e tala mitaki he Kautu, he fakaaoga e tau puhala oti ke hokotia ke he tau tagata he tau matakavi ha tautolu. (Mata. 24:14; Mare. 13:10) He fakamatala he taha gutuhala ke he taha gutuhala, he tau puhalatū, he tohitohi mo e telefoni, po ke fakamatala he ha magaaho, kia eketaha a tautolu ke fakailoa e higoa mo e finagalo a Iehova ke he tau tagata tokologa ka maeke ia tautolu.
Ha ha ia tautolu e tau kakano oti ke talitonu to nakai leva ti fakatapu e Iehova e higoa haana. (Eseki. 36:23) Kua tata lahi mai e magaaho ke fakanono a lautolu oti ne ekefakakelea e higoa ia. Ko e aho homo ue atu mooli ma e tau fekafekau fakamooli oti a Iehova, ne fakailoa e higoa a Iehova mo e fakatokoluga haana pule katoatoa he lagi mo e lalolagi!
Ko e leveki fakaalofa a Iehova ma e tau tagata haana kua kitia maali ke he Fonoaga he Faahimotu mo e he Lalolagi Katoa “Kia Mataala!” ne fakahoko ke he falu vala he lalolagi he 2009. Kua eke e tau fonoaga ia mo lakaaga he fakamauaga tala fakateokarasi ha tautolu, he fakalagalaga a tautolu ke mataala lahi ke he aho a Iehova.—Mare. 13:37; 1 Tesa. 5:1, 2, 4.
Mooli, kua mitaki a Iehova ki a tautolu; kua fakapuke e ia e tau loto ha tautolu aki e fiafia. Kua fakatakoto e ia a tautolu ke he tau vao mui mo e takitaki a tautolu ke he tapa he tau vai ke okioki ai.—Sala. 23:1, 2; 100:2, 5.
Kia mafanatia ke he monuina tumau a Iehova ki luga haau he matutaki a koe ke he gahua he Kautu he tau mahina i mua!
Mo e fakaalofa mafanatia faka-Kerisiano ke he tau matakainaga oti ha mautolu he lalolagi katoa,
Ha mutolu a tau matakainaga,
Kau Fakatufono he Tau Fakamoli a Iehova