Lata ke Fakamalū e Tau Tega Akau ke Maeke ke Tupu
1. Ko e heigoa ka lata ke fakamalū ke maeke ke tupu ai?
1 Ko e tau tega akau ne tō he katene kua lata ke fakamalū ke maeke ke tutupu. Pihia foki hagaao ke he tau tega he kupu mooli ne tō ke he tau loto he tau tagata he ha tautolu a fonua. (1 Kori. 3:6) Lata ia tautolu ke taute e tau liu aahi atu mo e fakamalū e tau tega fakatai nei he fakaaoga e Kupu he Atua ka manako a tautolu ke vakavaka, tutupu, mo e olaola ai.
2. Maeke fēfē a tautolu ke fakatoka e fakavēaga ke liu atu foki?
2 Fakalagā e Hūhū: Ka tauteute e koe e fakataitaiaga haau, ko e ha he tauteute foki e hūhū fakalagalaga atihake ke maeke a koe ke tali ka liu atu? Talahau ai he matahiku he fakatutala fakamua, ti taute e tau fakatokaaga mauokafua ke liu atu. Aoga lahi ke he tokologa ke fifili e taha mena i loto he tohi Fakaako he Tohi Tapu ka fakaatā a lautolu ke fakataitai e fakaako Tohi Tapu.
3. Ko e heigoa foki e vala tala ka fakamau ke lata mo e fiafia?
3 Fakamau Hifo: Fakamafiti ka oti e fina atu fakamua haau ke fakatoka e magaaho ke tohi hifo e tau fakamauaga. Tohi hifo e higoa he tagata mo e kaina. Kua mitaki foki ke tohi hifo e aho mo e magaaho ne tutala a koe mo ia, matakupu ne tutala a mua ki ai, mo e tohi ne foaki e koe, kaeke kua fai. Pehē kia a ia na fai lotu a ia ne fano ki ai? Fai magafaoa nakai a ia? Talahau nakai e ia e tau fiafia mo e tau tupetupe haana? Ko e tau vala tala pihia ka lagomatai a koe ke felauaki mo e tau fakatutalaaga i mua. Tohi hifo foki ka talia e mua ke liu atu a koe mo e tali e hūhū.
4. He taute e tau liu aahi atu ki a lautolu ne fiafia, ko e ha kua lata ia tautolu ke fakamanavalahi?
4 Fakamanavalahi: To nakai okioki a Satani ke he tau laliaga haana ke “uta kehe ai e kupu” ne tō ke he loto he tagata. (Mare. 4:14, 15) Ko e mena ia, kia nakai fakalolelole ka uka ia koe ke liu moua e tagata kua fiafia he kaina. Maeke nakai a koe ke fakafano e tohi po ke toka e kala tohi he gutuhala? Taha e paionia ne kamata e fakaako he gutuhala mo e fifine ka e nakai liu moua a ia i kaina, ti fakafano atu he paionia e tohi. He moua agataha he matakainaga fifine a ia i kaina, ne fakakite he fifine e lauia hokulo haana he fiafia fakatagata ne fakakite ki a ia. He fakamalū e tautolu e tau tega he kupu mooli, maeke ia tautolu ke moua e fiafia he kitia ai kua gotogoto, tupu lahi, ti ‘fua mai ai takitolugofulu mo e takionogofolu mo e takiteau.’—Mare. 4:20.