Magaaho Fe kua Lata ke Liliu Atu ki a Lautolu ne Fiafia?
1. Ko e heigoa ne putoia he taute tutaki?
1 Ko e taute tutaki ne putoia e liu atu ke he ha tagata kua fakakite e makai ke fakaako e fakatokaaga he Kautu a Iehova. (Mata. 28:19, 20) Ko e magaaho mitaki lahi mahaki kua lata ke liu aahi atu fa fakavē ke he fakaholoaga ha tautolu mo e haana ne fiafia. Kua lata he ha ke liu atu mafiti he nakai leva e aahi fakamua ha tautolu?
2, 3. Ko e ha kua lata ia tautolu ke lali ke liu atu fakamafiti?
2 Ko e Ha he Liliu Atu Mafiti? Ko e gahua he fakamatala e “tala mitaki nai he kautu” kua teitei oti tuai, ti kua tata lahi mai e moumouaga he fakatokaaga nei. (Mata. 24:14; 1 Pete. 4:7) Ko e mena ia, ha kua hafagi agaia ‘e aho ke fakamomoui ai’ ki a lautolu ne fiafia, kua lata ia tautolu ke muitua e tomatomaaga ke “fakamatala [fakamafiti] atu . . . e kupu” nukua putoia e liu atu fakamafiti ke feaki e fiafia ne fakakite.—2 Kori. 6:1, 2; 2 Timo. 4:2.
3 Makai a Satani ke taaki kehe e tau tega he Kautu ne liga gana e tautolu ke he loto he tagata fiafia. (Mare. 4:14, 15) Ko e tau tagata he magafaoa, tau kapitiga gahua, mo e falu ne liga vaiga a lautolu ne fakakite e fiafia. Maeke he liu atu fakamafiti ha tautolu ke matutaki atu e fakatutala fakamua ha tautolu ato kautū e falu he moumou e fiafia ia.
4. He fina atu fakamua, maeke fēfē a tautolu ke fakavē e fakatutalaaga ke lata mo e liu aahi atu?
4 Taute e Fakatokaaga: Mitaki lahi mahaki ke taute e fakatokatokaaga kua mauokafua ke liu atu ato toka e koe e fina atu fakamua. Talahau e hūhū ka maeke a koe ke tali ka liu atu. Aoga lahi ke fakamau e koe e mena nei. Ka maeke he fakaholoaga haau, liga ole a koe ke liu atu he aho hake po ke taha magaaho. Kaeke ko e aahi fakamua haau he matahiku faahi tapu ka e gahua e tagata ne fiafia he faahi tapu, to liga talia a ia ke aahi atu a koe he matahiku faahi tapu hake. Ka taute e koe e fakatokaaga, kia fakamooli ke he maveheaga haau.—Mata. 5:37.
5. To lagomatai fēfē he liliu atu fakamafiti a tautolu ke fakamooli e poakiaga a Iesu ke taute tutaki?
5 Ha ha ia tautolu e tau kakano mitaki ke liliu atu fakamafiti ki a lautolu ne fiafia. Ko e mena ia, taute e fakatokaaga ti liliu atu mafiti, ha kua “gahoa e tau [maga]aho kua toe.” (1 Kori. 7:29) Ka fakamafiti atu e liliu aahi atu ha tautolu ki a lautolu ne fiafia ke he ogo he Kautu, to liga fua mitaki lahi e tau laliaga ha tautolu.