Ko e Fua Aoga Lahi he Faiaoga Mitaki
1. Ko e heigoa e fua aoga lahi he faiaoga mitaki?
1 Ko e heigoa ne fakamalolō e taha tagata ke eke mo faiaoga mitaki he Tohi Tapu? Ko e fakaakoaga he lalolagi? Ko e mena ne tupu? Ko e lotomatala pauaki? Ko e mahani taha ia ne fakakatoatoa ai e Fakatufono, kua fakamailoga e tau tutaki a Iesu, ti kua mua ue atu e malolō mo e fulufuluola e fua ia he tau aga mua ue atu ha Iehova. (Ioane 13:35; Kala. 5:14; 1 Ioa. 4:8) Ko e fakaalofa. Fakatātā he tau faiaoga mitaki e fakaalofa.
2. Ko e ha kua aoga ma tautolu ke fakaalofa ma e tau tagata?
2 Fakaalofa ke he Tau Tagata: Ko Iesu ko e Faiaoga ne Mua kua fakakite e fakaalofa ma e tau tagata, ti omoomoi he mena nei a lautolu ke fanogonogo ki a ia. (Luka 5:12, 13; Ioane 13:1; 15:13) Ka fakaalofa a tautolu ke he tau tagata, to fakamatala a tautolu ke he tau magaaho oti. Ko e tau mena vihi tuga e favale mo e mahani fakateaga ka nakai fakalolelole a tautolu. To fakakite e tautolu e fiafia fakatagata ki a lautolu ne fakamatala a tautolu ki ai, ti hikihiki e tautolu e tutala ha tautolu ke felauaki mo e tau tupetupe ha lautolu. To makai a tautolu ke fakatoka e magaaho he nakai ni ka haia a tautolu mo e tau fakaako Tohi Tapu takitaha ka e pihia foki ka tauteute tuai a tautolu ma e tau fakaako takitaha.
3. To lagomatai fēfē he fiafia ke he tau kupu mooli he Tohi Tapu a tautolu ke he gahua he fonua?
3 Fiafia ke he Tau Kupu Mooli he Tohi Tapu: Ne fiafia foki a Iesu ke he tau kupu mooli he Tohi Tapu ti onoono ki ai ko e tau koloa uho. (Mata. 13:52) Ka fiafia a tautolu ke he kupu mooli, to tutala a tautolu mo e hakahakau, ti maeke he mena nei ke fakalagalaga e fiafia he tau tagata fanogonogo ha tautolu. Ko e fakaalofa pihia to lagomatai a tautolu ke hagaaki ke he vala tala uho kua talahau e tautolu ka e nakai ke he ha tautolu a tau kaupāaga fakatagata, ti nakai tupetupe lahi a tautolu ke he gahua he fonua.
4. Maeke fēfē a tautolu ke feaki e fakaalofa?
4 Feaki e Fakaalofa: Maeke fēfē a tautolu ke feaki e fakaalofa ma e tau tagata? He manamanatu ke he fakaalofa ha Iehova mo e haana Tama ne fakakite mo e tuaga matematekelea fakaagaga he tau tagata he fonua ha tautolu. (Mare. 6:34; 1 Ioa. 4:10, 11) Ko e fiafia ha tautolu ma e tau kupu mooli he Tohi Tapu to fakamalolō he kumikumi fakatagata mo e manamanatu fakahokulo tumau. Ko e fakaalofa ko e fua he agaaga. (Kala. 5:22) Ti maeke a tautolu ke ole ki a Iehova ma e agaaga tapu mo e ole ki a ia ke lagomatai a tautolu ke tupu e fakaalofa. (Luka 11:13; 1 Ioa. 5:14) Pete ne tau fakaakoaga fakalalolagi, tau mena iloa he kupu mooli, po ke tau lotomatala pauaki, maeke ia tautolu ke eke mo faiaoga lauia mitaki he Tohi Tapu he fakatātā e fakaalofa.