Lagomatai e Tau Tagata ke Fanogonogo ke he Atua
1. Ko e heigoa e tau porosua ne fakatoka mai he Fonoaga he Faahimotu “Kia Hoko Mai e Kautu he Atua!” ti ko e heigoa kua eke ai mo tau kanavaakau aoga lahi?
1 Ke he Fonoaga he Faahimotu “Kia Hoko Mai e Kautu he Atua!” ua e porosua foou ne fakatoka mai, ko e Fanogonogo ke he Atua mo e Moui Tukulagi mo e fufuta mukamuka he Fanogonogo ke he Atua. He nakai loga ai e kupu, kua mukamuka mo e mafiti ai ke fakaliliu. Ko e Fanogonogo ke he Atua mo e Moui Tukulagi ne talia ke fakaliliu ke he 431 e vagahau ne fakatoka mai.
2. Ko hai ka aoga mai he tau porosua nei?
2 Ko hai ka aoga pauaki mai he tau porosua nei? Manamanatu ke he mena nai ne tupu tumau he lalolagi:
• Ko e tagata fakailoa ne fakatutala mo e tagata he kaina, he fina atu fakamua po ke liu aahi atu, ne mailoga kua nakai maeke e tagata he kaina ke totou po ke ailoa ke totou.
• Ko e tagata fakailoa ne fakamatala ke he tau tagata kua vagahau e vagahau ne gahoa po ke nakai fai tohi ne fakaliliu ai. Po ke laulahi he fonua kua nakai maeke ke totou ke he vagahau kua mukamuka a lautolu ke vagahau.
• Ko e tagata fakailoa ne fakaaoga e vagahau matalima ke fakamatala ke he fonua he tau tagata teligatuli.
• Ko e matua ne manako ke fakaako e kupu mooli ke he tama tote haana kua nakaila iloa ia ke totou.
3. Talaga fēfē e Fanogonogo ke he Atua?
3 Puhala ne Talaga Aki: Nakai loga e kupu he Fanogonogo ke he Atua—ko e alaga kupu mukamuka mo e kupu Tohiaga Tapu i lalo he tau lau takitaha kua fakamaama e tau matapatu manatu. Ko e ha? Manamanatu kua atu he taha tagata ki a koe e porosua kua tohi ke he vagahau ne nakai maeke a koe ke totou, liga ke he tau matatohi ne matakehe ki a koe. To fiafia nakai a koe ki ai, pihia foki ka ha ha i ai e tau fakatino fulufuluola? Liga nakai. Ko e tau tagata foki ne nakai maeke ke totou kua mukamuka ke fakalolelole ha ko e tau tohi ne fai kupu. Ko e mena ia, he tau lau takitaha kua ha ha i ai e tau fakatino kua tauteute fakamitaki mo e tau matatao ke takitaki e fakatutalaaga mai he taha fakatino ke he taha.
4. Talaga fēfē e Fanogonogo ke he Atua mo e Moui Tukulagi?
4 Kua tatai e tau fakatino he Fanogonogo ke he Atua mo e Moui Tukulagi mo e Fanogonogo ke he Atua. Ne talaga ai ke fakaako mo lautolu kua uka ke totou po ko lautolu kua fakaako ke totou. Fakaaoga foki e porosua nei mo lagaki he faiaoga ka fakaako mo e tagata he porosua Fanogonogo ke he Atua. He matapotu he faahi hema i luga he tau lau ne ua e fakaakoaga ko e hūhū ne tali he tau lau ia. Putoia he tau fakatino e tau manatu mo e tau kupu ne tohi i ai. Ato hoko ke he matapotu i kelekele ke he loga e lau ko e puha lanu māmā ne fai manatu lafi ki luga mo e tau kupu Tohiaga Tapu ka fakatutala, falanaki ke he lotomatala he tagata fakaako.
5. Magaaho fe mo e fēfē e puhala ka foaki e tautolu e tau porosua nei?
5 Puhala ke Fakaaoga Aki: Maeke ia koe ke foaki e tau porosua ua ia he gahua he taha fale ke he taha fale ka logona e koe kua aoga ke taute pihia, pete ne nakai ko e tau porosua e foaki he mahina. (Kikite e puha “Puhala Ka Foaki Aki.”) Maeke ia koe ke fakaaoga ai he liu aahi atu he pehē ke he tagata fiafia kua fai mena a koe ke fakakite age ki a ia ti age e porosua ki a ia.
6. To taute fēfē e tautolu e fakaako Tohi Tapu he fakaaoga e tau porosua nei?
6 Ha kua nakai fai hūhū ne tohia he Fanogonogo ke he Atua, ko e tau fakatutalaaga to nakai ko e tau magaaho hūhū mo e tali tuga fa mahani ke taute e koe he fakaako he tohi Fakaako he Tohi Tapu. He tau aga fakamotu takitaha kua fiafia e tau tagata ke logona e tau tala. Ti fakaaoga e tau fakatino ke tutala ke he tau tala faka-Atua ne haia he fakamauaga he Tohi Tapu. Fakamaama e mena ne fakatai. Kia hakahakau. Uiina ke he tau manatu he tagata fakaako. Totou e tau kupu tohi i kelekele he lau, ti fakamaama ki a ia e mena ne talahau ai. Hūhū e tau hūhū ke putoia a ia ke he fakatutalaaga mo e ke iloa mooli kua maama e ia. Ka fakaaoga a ia he Fanogonogo ke he Atua mo e Moui Tukulagi, totou tokoua ke he tau faahi kupu mo e tau kupu tohi tatai ka fakatutala ke he tau fakatino takitaha.
7. Maeke fēfē a tautolu ke lagomatai e tagata fakaako Tohi Tapu ha tautolu ke holo ki mua?
7 Lagomatai e Tagata Fakaako ke Holo ki Mua: Amanaki ko e fakatutalaaga haau to fakalagalaga e manako he tagata fakaako haau ke iloa ke totou ti maeke a ia ke fakagahuahua ne ia e iloilo ha Iehova. (Mata. 5:3; Ioane 17:3) Ko e mena ia, ka moua e tau fakatutalaaga mai he Fanogonogo ke he Atua, nakai leva to ole a koe ke fakaako a ia ke totou, ti maeke ia koe ke hiki e fakaakoaga ke he Fanogonogo ke he Atua mo e Moui Tukulagi. Pete ne porosua ne fakaaoga e koe, to nakai la lata e tagata fakaako ke papatiso ka oti e porosua. Kua lata a koe ke hiki e fakaakoaga ke he tohi Fakaako he Tohi Tapu po ke taha tohi kua latatonu ka foaki ki a ia e maamaaga lahi he Tohi Tapu.
8. Ko e ha kua fakaaue a koe ke he tau koloa foou nei ma e fonua?
8 Kua lata e tau tagata ke fanogonogo ke he Pule Katoatoa he lagi mo e lalolagi ka manako a lautolu ke momoui tukulagi. (Isaia 55:3) Ti ko e finagalo a Iehova ke he “tau tagata oti kana,” mo lautolu foki kua nakai iloa ke totou, kua fakaako ke fanogonogo ki a ia. (1 Timo. 2:3, 4) Fakaaue ha ia ha tautolu ke he tau koloa foou nei ka fakaaoga e tautolu ke fakaako e tau tagata ke fanogonogo ke he Atua!
[Puha he lau 3]
Puhala Ka Foaki Aki
Fakakite ke he tagata he kaina e lau 2-3, ti pehē: “Manako nakai a koe ke nofo he lalolagi ne tuga anei? [Fakaatā ma e tali.] Kua mavehe he tau Tohiaga Tapu [po ke, mavehe mai he tohi fakatapu nei] to nakai leva ti taute he Atua e lalolagi mo matakavi fulufuluola, mo e mafola to nakai fai tagata ka mativa po ke gagao. Mailoga e mena kua lata ia tautolu ke taute ke nonofo i ai. [Totou Isaia 55:3, ne tū i luga he lau 3.] Talahau he mena nei ki a tautolu ke ‘o mai ke he’ Atua mo e ‘fanogonogo’ ki a ia. Ka e fanogonogo fēfē a tautolu ke he Atua?” Fuluhi ke he lau 4-5, ti fakatutala ke he tali mo ia. Ka nakai fai magaaho a ia, toka e porosua mo ia ti taute e tau fakatokaaga ke liu atu mo e fakatutala ke he tali.