Fakaaoga e Puhala kua Gahua
1. Ko e heigoa ka fakaako e tautolu mai he tau puhala kehekehe he tau Kerisiano fakamua?
1 Ko e tau Kerisiano fakamua ne fakamatala e tala mitaki ke he tau tagata he tau aga fakamotu mo e tau lotu kehekehe. (Kolo. 1:23) Pete ne tatai e fekau—ko e Kautu he Atua—ko e puhala kua kehekehe he felauaki ni mo e toloaga. Ma e fakatai, he tutala a Peteru ke he tau Iutaia ne hokulo e fakalilifu ke he tau Tohiaga Tapu, ne kamata a ia he fatiaki e perofeta ko Ioelu. (Gahua 2:14-17) Ke he taha faahi, mailoga e puhala ne fakakakano e Paulo ke he tau Heleni tuga ne fakamau ia Gahua 17:22-31. He vahā nei, ko e tau tagata he falu matakavi kua fakalilifu e tau Tohiaga Tapu, ti maeke ia tautolu ke nakai fakauaua he hagaao ke he Tohi Tapu he ō ke he taha fale mo e taha fale. Pete ia, maeke ia tautolu ke mailoga lahi ka tutala ki a lautolu ne nakai fiafia ke he Tohi Tapu po ke lotu po ke fakalataha ke he lotu nakai Kerisiano.
2. Maeke fēfē a tautolu ke fakaaoga e tau tohi foaki ke lagomatai a lautolu kua loto fakaaue ke he Tohi Tapu ti pihia mo lautolu ne nakai loto fakaaue?
2 Fakaaoga Fakamitaki e Tau Tohi Foaki: Ko e tau foaki he tau tohi ma e tau he fekafekauaga nei to hiki he tau mahina ua oti mo e to fakamaama e tau mekasini, tau tuleke, mo e tau porosua. Pete ka nakai fiafia e tokologa he tau tagata he fonua ha tautolu ke he Tohi Tapu, to maeke agaia ia tautolu ke fakakite e mena ne fakaohooho e fiafia ha lautolu. Liga nakai totou e tautolu e kupu tohi he fina atu fakamua po ke hagaao fakahako ke he Tohi Tapu, ka e ka fakakite e fiafia kua maeke ia tautolu ke liliu mo e foliaga ke lagomatai e tagata he kaina ke ati hake e tua ke he Tufuga mo e haana a Kupu omoomoi. Ke he taha faahi, ka fakamatala a tautolu ke he matakavi ne loto fakaaue e tau tagata ke he Tohi Tapu, maeke ia tautolu ke fakaaoga e tau tohi mo e puhala kua fakakite e mena nei. Ti liga foaki e tautolu e tohi Fakaako he Tohi Tapu po ke tau porosua Fanogonogo ke he Atua po ke Fanogonogo ke he Atua mo e Moui Tukulagi he ha magaaho, pete ne foaki kua fakakite ma e mahina. Ko e matapatu manatu ke fakaaoga e puhala kua gahua.
3. He puhala fe kua tuga e kelekele e tau loto he tau tagata he fonua ha tautolu?
3 Tauteute e Kelekele: Ko e loto he tagata kua tuga e kelekele. (Luka 8:15) Kua lata falu kelekele ke tauteute fakalahi ato maeke ke vakavaka ti tupu e tau tega he kupu mooli he Tohi Tapu. Ko e tau evagelia he senetenari fakamua kua kautū he tō ke he tau vahega kelekele kehekehe, ti tamai he mena nei ki a lautolu e fiafia mo e olioli. (Gahua 13:48, 52) Maeke ia tautolu ke moua e kautūaga pihia he mataala ke he tau puhala ha tautolu.