Puha Hūhū
◼ Ko e heigoa ka mailoga aki ke toka e tautolu e tau tohi mo e taha tagata?
Ko e matapatu kitiaaga ko e fiafia he tagata. Ka fakakite e ia e fiafia mooli, maeke ia tautolu ke toka mo ia ua e mekasini, taha e porosua, taha e pepa mo e falu tohi kua foaki e tautolu. Pihia foki ka mailoga e tautolu kua tote po ke nakai fai tupe a ia ke foaki ke he gahua he lalolagi katoa. (Iopu 34:19; Fakakite. 22:17) He taha faahi, to nakai toka e tautolu e tau tohi uho ha tautolu mo lautolu kua nakai loto fakaaue ki ai.—Mata. 7:6.
Liga fakakite fēfē he tagata he kaina e fiafia? He makai ke tutala mo tautolu ko e fakamailoga mitaki. He fanogonogo ka tutala a tautolu, tali e tau hūhū, mo e talahau e manatu ko e fakakiteaga he putoia ke he tutalaaga. Ko e muitua he totou a tautolu mai he Tohi Tapu kua mailoga e fakalilifu ke he Kupu he Atua. Fa lagomatai ke hūhū kaeke kua totou e ia e tohi ka foaki. Lata e tau tagata fakailoa ke fifili fakamitaki ke mailoga e fiafia he tau tagata takitaha. Ma e fakatai, ka fakamatala he puhalatū, kua nakai latatonu ke age fakahanoa e tau mekasini, tau porosua, po ke tau tohi ke he tau tagata oti i ai. Ka nakai maeke ia tautolu ke mailoga e fiafia he tagata, liga mitaki ke age ki a ia e laupepa fakailoa po ke tuleke.
Pihia foki, ko e loga e tohi he tagata fakailoa ne moua mai he fata tohi kua lata ke felauaki mo e manako he tagata fakailoa ke taute aki haana a gahua he fonua, nakai he maeke a ia ke tuku e mena fakaalofa. Ko e tau mena fakaalofa kua nakai ke totogi aki e tau tohi ka ke lalago aki e tau puhala oti he gahua fakamatala ha tautolu he lalolagi katoa. Pete ne tau tuaga fakatupe ha tautolu, ko e loto fakaaue ka omoomoi a tautolu ke foaki fakamokoi mai he manako ha tautolu, ka e nakai ha kua loga lahi ai, ke lalago aki e tau mena he Kautu. (Mare. 12:41-44; 2 Kori. 9:7) To fakaohooho foki a tautolu ke uta ni e tau tohi kua lata mo tautolu, ti nakai moumou ai e tau koloa fakateokarasi.
[Blurb he lau 2]
Lata e tau tagata fakailoa ke fakaaoga e fifiliaga mitaki ke mailoga e fiafia he tagata