Fakaaoga Fakalotomatala e Tau Tohi Faka-Tohi Tapu ha Tautolu
1, 2. Fefe e logonaaga he tokologa ke he tau tohi ha tautolu, mo e ko e heigoa e huhu ne laga mai he mena ia?
1 “Ne totou e au e tau tohi ha mutolu tali mai he 1965. Ne fakakia e au e Tohi Tapu ka totou ai, ti tatai e tau mena oti he tau tohi ha mutolu mo e Tohi Tapu. Ne manako mau au ke iloa e kupu moli hagaao ke he Atua mo Iesu, ti maeke ia au ke talahau fakamoli kua moua e au e tau tali moli puhala he tau tohi ha mutolu mo e Tohi Tapu.” Pihia e talahauaga ne tohi atu he taha tagata tane ke he matapatu he Tau Fakamoli a Iehova. He tohi taha ia, ne ole a ia ke he fakaakoaga Tohi Tapu.
2 Tuga e tagata loto fakaaue ia, totou miliona e tau tagata he lalolagi ne loto fakaaue ke he tau tohi lagomatai fakaako Tohi Tapu ne foaki mai he “fekafekau fakamoli mo e loto matala.” (Mata. 24:45) He tau tau takitaha, kua loga lahi e tau tohi ne taute ke lagomatai e tau tagata loto fakamoli ke “hokotia a lautolu he maama ke he kupu moli.” (1 Timo. 2:4) Maeke fefe a tautolu ke fakaaoga fakalotomatala e tau tohi faka-Tohi Tapu ha tautolu?
3. Maeke fefe ia tautolu ke kalo mai he nakai moumou e tau tohi?
3 Kalo Mai he Moumou: He fai magaaho he mole, liga loga e tohi ha tautolu ne uta ke he mena kua maeke ia tautolu ke fakaaoga. Ko e heigoa ha tautolu ka taute ke kalo mai he moumou e tau tohi aoga ha tautolu? Kua lata ke fakaaoga e loto manamanatu ka o ke ta mai e tau lagaki mo fakaaoga he fekafekauaga. He nakai oko ke loga e tohi mo foaki, liga uta e tautolu taha ni po ke ua e lagaki ti liu atu ke ta mai foki falu ka oti e faoa ia he foaki. To lagomatai he mena nei ke nakai loga e tohi he tau kaina ha tautolu. Tatai foki, ka loga e mekasini ha tautolu ne nakai la foaki ia, liga hagahaga mitaki ke fakatote hifo e numera he ota.
4. Ko e heigoa ka maeke ke taute kaeke loga lahi e tohi he fakapotopotoaga?
4 Loga Lahi e Tau Tohi: Kaeke kua loga lahi e falu tohi he fakapotopotoaga, liga lata he takitaki leveki tohi ke fakakia ke he falu fakapotopotoaga he matakavi ko e maeke nakai ia lautolu ke fakaaoga e tau tohi loga ia. Maeke e tau tagata fakailoa ke foaki e tau tohi tuai ke he tau magafaoa ha lautolu ne nakai tua, tau tagata fakaako Tohi Tapu, mo e falu foki. To fiafia a lautolu ne fou mai ke he fakapotopotoaga ke moua e tau tohi tuai nei ma e fata tohi fakateokarasi fakatagata ha lautolu.
5. Maeke fefe ia tautolu ke fakatata e loto fakaaue ha tautolu ma e tau tohi ha tautolu?
5 Manako a tautolu ke he tau tohi ha tautolu ke fakamoli e kakano ne taute ai, ke lagomatai a lautolu ne loto fiafia moli ke ako fakalahi atu hagaao ke he tau finagalo homo atu ha Iehova. Tuga ni ne nakai moumou e Iesu e tau vala mena kai ne toe he oti e fagai fakamana e ia e moto tagata, kua lata ia tautolu ke foli ke fakaaoga fakamitaki e tau tohi faka-Tohi Tapu ne foaki mai. (Ioane 6:11-13) To nakai maeke e fekau fakamoui ne ha ha he tau tohi ha tautolu ke amohia e tau loto he tau tagata ne hihiga tututonu kaeke toka ni e tau tohi he tau fata tohi po ke tau kato tohi ha tautolu. Ko e mena ia, kua latatonu ia tautolu ke manamanatu fakamitaki ka o ke ta mai e tau tohi ha tautolu ke lata mo e fekafekauaga mo e ke fakaaoga fakalotomatala ke lagomatai aki e falu.—Filipi 4:5.