Fakaaoga Fakamitaki e Tau Tohi ha Tautolu
1. Maeke fēfē ia tautolu ke muitua ke he fakafifitakiaga ha Iesu he loto fakaaue ke he tau foakiaga ha Iehova?
1 He mole e fagai fakamana e Iesu e lanu tagata tokologa, ne fakatokatoka e ia ke nakai moumou e tau mena kai ne toe. (Mata. 14:19-21) Ko e loto fakaaue pihia ke he tau foakiaga ha Iehova kua fakatoka e fakafifitakiaga mitaki ma tautolu ke ‘mahani foki a tautolu ke fakaaue’ he fakaaoga fakamitaki e tau foakiaga oti ha Iehova ne puhala mai he “fekafekau pule.”—Kolo. 3:15; Luka 12:42; Mata. 24:45-47.
2. Maeke fēfē ia tautolu ke kalo mai he putu loga e tau mekasini?
2 Tau Mekasini: Mukamuka lahi ke putu loga e tau mekasini. Ka loga tumau e tau mekasini ha tautolu ne toe, kua lata ia tautolu ke fakatote hifo e numera ne ota. Ka e kua e tau mekasini tuai? Pete he fai magaaho ne mole, kua nakai galo e uho manatu he tau mekasini nei. Ka loga e putuaga mekasini tuai ha tautolu, liga maeke he leveki fekafekau po ke taha motua ke lagomatai a tautolu ke kumi e tau puhala lauia mitaki ke foaki aki.
3, 4. Ko e heigoa e tau manatu kua lata ke tokaloto e tautolu ka moua e tautolu e tau tohi he Fale he Kautu?
3 Falu Tohi: Ka hiki e tohi foaki ke he taha tohi kehe, fakakia fakamua ke kitia kua fai lagaki pihia a koe i kaina ma e gahua he fonua ato moua falu lagaki foki he Fale he Kautu. Kia fakaeneene ke uta ni e tau lagaki ke lata ni ma e faahi tapu, ti liu atu ke moua foki falu ka oti e tau tohi fakamua he foaki.
4 Ma e tau tohi fakaaoga fakatagata, ole ni e tau tohi ke lata mooli mo koe. Tohi hifo e higoa haau he laini ne tu ai. To lagomatai he mena ia ke liuaki mai ki a koe e lagaki fakatagata haau. Ka fakaaoga e koe e Watchtower Library he CD-ROM mo e kua leveki e tau lagaki fakatagata haau he tau mekasini, liga nakai logona hifo e koe e lata ke ole e tau lagaki fakatagata he tau pega volume he Watchtower mo e Awake!
5. Ko e heigoa kua lata ia tautolu ke tokaloto ka foaki e tau tohi ha tautolu?
5 Foaki he Tau Tohi: Eketaha a tautolu ke foaki e tau tohi ha tautolu ki a lautolu ni kua fakakite e fiafia mooli. Tokaloto kua lago katoa ni ki a tautolu e totogiaga he tau koloa aoga nei he fekafekauaga ha tautolu. He toka e tau tohi mo lautolu ne fiafia, ua fakauaua he tala age ki a lautolu kua maeke ai ke foaki e tau mena fakaalofa ha lautolu ke lalago e gahua he lalolagi katoa.
6. Ko e ha kua mua atu e aoga he tau tohi ha tautolu ki a tautolu, ti ko e heigoa kua omoomoi he mena nei a tautolu ke taute aki?
6 Ne foaki fakamana e Iesu ke he falu e tau mena kai tino, ka e fagai fakaagaaga tumau e ia e tau tagata. Ne pehē a Iesu: “Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” (Mata. 4:4) Kua fakaako he tau tohi ha tautolu e tau kupu mooli aoga lahi he Tohi Tapu ke moua e moui tukulagi. (Ioane 17:3) Kua aoga lahi mahaki e tau tohi ti nakai lata ke moumou po ke fakaaoga fakahanoa!