Fakakite e Loto Fakaaue ma e Tau Koloa Fakateokarasi
1 He taute e tau fakatokaaga ke fakafou e faituga, ne fakamalolo he Patuiki ko Iosia a lautolu ne kotofa ke taute e gahua, he talahau: “Ka e nakai fakafili a lautolu he tau tupe ne ta age ai ke he tau lima ha lautolu; ha kua eke e lautolu mo e fakamoli ni.” (2 Patu. 22:3-7) Ko e loto fakaaue he tau tagata ia ma e tau mena tapu ne kitia moli ai ke he puhala ne taute aki e tau koloa ne tuku age ki a lautolu. He vaha nei, he taute e tautolu e feua he ekepoa ke he vagahau mitaki he Atua, kua lata pihia a tautolu ke fakakite e fakamoli he leveki e tau koloa kua foaki mai ki a tautolu.
2 He Fekafekauaga he Fonua: Ko e loto fakaaue ma e fekau aoga ne ha ha he tau tohi ha tautolu mo e mailoga e totogi ne putoia he taute ai kua fakatupu a tautolu ke tokiofa fakatokoluga ai. Kua nakai lata ia tautolu ke foaki fakahanoa e tau tohi ki a lautolu ne nakai fakakite ha fakaaue moli ma e fekau he Tohi Tapu. Ka tote e fiafia he tagata ke he tala mitaki, liga foaki e tautolu ki a ia e tuleke ka e nakai ko e taha tohi.
3 Foaki e tau tohi ke he puhala kua fakakite e uho ha lautolu. Ua toka he tau matakavi tolo ke maeke ke tafola fano. Ke nakai moumou mena, fakakia ko e fiha e tohi hau i kaina to liu ke ole fakaloga e tau tohi. Ka fakatumau a koe ke toe e tau mekasini he tau fufuta takitaha, kia fakatote hifo e ota tohi hau.
4 Tau Tohi ma e Fakaaoga Fakatagata: Kia ota ni e tau tohi kua fakaaoga moli e tautolu. Mua atu ke nakai moumou noa he ole e tau Tohi Tapu deluxe, tau Reference Bible, mo e falu tohi lalahi tuga e Concordance, Index, tau volume Insight, mo e tohi Proclaimers, nukua tauuka lahi.
5 Kua manatu nakai e koe ke tohi hifo e higoa mo e kaina hau he tau lagaki fakatagata he tau tohi hau? Kua lagomatai e mena nei ke fakatote hifo e manako ke hukui e tau tohi ia kua toka hehe. Ka galo hau a tohi lologo, Tohi Tapu, po ke tohi fakaako, liga to moua e koe he tau koloa galo ne toka he Fale he Kautu po ke matakavi he toloaga.—Luka 15:8, 9.
6 O mai a tautolu ke tutuli ke fakaaoga fakamitaki e tau tohi ha tautolu. Ko e puhala anei ke fakakite e tautolu e fakamoli he leveki e tau koloa he Kautu ne tuku mai e Iehova ki a tautolu.—Luka 16:10.