Kitia e Mitaki ma e Haau a Gahua Malolō
1. Ko e heigoa ka utakehe e fakamakutu ha tautolu ma e fekafekauaga?
1 Na tufuga e tagata ke “[kitia e] tau mena mitaki he hana tau gahua.” (Fakama. 2:24) Pete ia, ka nakai kitia e tautolu e tau fua mitaki he fekafekauaga ha tautolu, kua maeke he fakalolelole ke fofō e olioli ha tautolu mo e utakehe e fakamakutu ha tautolu. Ko e heigoa ka lagomatai a tautolu ke fakatumau e aga atihake?
2. Ko e ha kua lata ke moua e tau amaamanakiaga mooli hagaao ke he taliaaga he fekafekauaga ha tautolu?
2 Moua e Tau Amaamanakiaga Mooli: Manatu, pete ni he tokogahoa ne talia a Iesu, ne kautu mooli haana a fekafekauaga. (Ioane 17:4) He fakatai haana ke he tagata gana saito, ne talahau tuai e Iesu ko e laulahi he tau loto to nakai fakatautonu e tega he ogo he Kautu. (Mata. 13:3-8, 18-22) Pete ia, ko e tau laliaga fakamakamaka ha tautolu to fai fua mitaki.
3. Puhala fe ha tautolu ka fai “fua mai” pete he kitia e tautolu kua tote e taliaaga ke he gahua fakamatala?
3 Puhala ke Fai Fua Loga a Tautolu: Hagaao ke he fakatai ha Iesu, ko lautolu ne talia e fekau to “fua mai.” (Mata. 13:23) He mole e gotogoto ti motua e ka saito, ko e fua ne moua mai ai, nakai ko e tau ka saito ikiiki, ka ko e tau tega foou. Ti ko e fua ne moua he tau Kerisiano ne kautu, nakai ko e tau tutaki foou ka ko e tau fua loga he tega he Kautu—ko e tau talahauaga ha tautolu hagaao ke he Kautu. Kua moua mai e “tau mena mitaki” ne kua maeke ia tautolu ke makona ai, pete he talia po ke nakai talia he tau tagata. Kua lalafi atu a tautolu ke he fakatapuaga he higoa ha Iehova. (Isaia 43:10-12; Mata. 6:9) Kua fiafia a tautolu ke he kotofaaga ko e tau ekegahua fakalataha mo e Atua. (1 Kori. 3:9) Ti ko e “fua haia he tau laugutu” nukua fakafiafia a Iehova.—Hepe. 13:15, 16.
4. Ko e heigoa e tau fua, ka liga moua mai he fekafekauaga ha tautolu, pete ni ka nakai iloa e tautolu?
4 Lafi ki ai, ko e gahua malolō ha tautolu kua liga fai fua mitaki ka e nakai kitia e tautolu. Liga ko e falu ne logona a Iesu he fakamatala ne eke ai mo tau tutaki haana he mole e fekafekauaga haana he lalolagi. Pihia foki, ko e tau tega he Kautu ne gana e tautolu kua liga nakai vakavaka mo e tuputupu ke he loto he tagata ato fai magaaho he mole, ti liga hau a ia ke he kupu mooli ka e nakai iloa e tautolu. Mooli ai, ko e fekafekauaga ha tautolu kua moua mai ai loga e tau fua mitaki. Ko e mena ia, kia “fua loga mai” mo e eke ai a tautolu mo tau tutaki ha Iesu.—Ioane 15:8.