“Fakapotopoto . . . e Motu”
1. Ko e heigoa e tau mena ne kua fetataiaki he tau fonoaga faahimotu mo e lalolagi katoa ke he tau mena tau fakapotopotoaga ofoofogia he vahā he tau Isaraela i tuai ne nakai leva he toka a Aikupito?
1 Nakai leva he toka a Aikupito, ne poaki e Iehova a Mose ke “fakapotopoto . . . e motu” ke he Mouga ko Sinai ke fanogonogo ke he tau kupu Haana ti matakutaku ai a lautolu ki a Ia mo e fakaako e tau fanau ha lautolu ke he tau puhala Haana. (Teu. 4:10-13) Ko e magaaho ofoofogia lahi ha ia ke manatu mo e fakamalolō e tua! Magahala he tau mahina i mua, ko e tau tagata ha Iehova to fakapotopoto ke he tau fonoaga faahimotu mo e lalolagi katoa ke fakaako e Iehova. Ko e heigoa ha tautolu kua lata ke taute ke aoga katoatoa mai he mena nei?
2. Ko e heigoa kua lata ia tautolu ke taute ke “nonofo tauteute” ma e fonoaga?
2 “Nonofo Tauteute”: Ne poaki a Iehova ke he tau Isaraela ke “nonofo tauteute” ma e fakapotopotoaga talahaua ia ke he Mouga ko Sinai. (Esoto 19:10, 11) Pihia ni, kua lata e tau tagata oti kua manako ke o atu ke he tau fonoaga ke mautauteute fakamitaki, nakai ni ko lautolu kua fai kotofaaga he fakaholoaga. Ke fakatai, kua lata e tokologa ke tauteute ke fakaatā e tau magaaho mai he tau gahuaaga. Liga tatai e tuaga haau mo e tuaga ha Nehemia. Ne manako a ia ke toka e gahua haana ko e tagata taute uaina he Patuiki ko Aretaseta ke fano ki Ierusalema ke lagomatai mo e gahua ke liu atihake e tau kaupā, ka e mailoga e ia to liga nakai talia ai he patuiki. Ne liogi a Nehemia ti fakamalolō a ia ke fakailoa e manako fakatokolalo haana. Ne fakaatā he patuiki a ia ke fano ti lagomatai foki ke he matagahua ta fale! (Nehe. 2:1-9) Ke lafi ke he ole ke moua e magaaho mai he gahuaaga, kua mau nakai haau a puhala ke fano ai mo e tau nonofoaga? Kua fiafia e tau motua ke lagomatai ha matakainaga kua manako lagomatai. Amaamanaki ke hohoko mai tuai ke he tau fakaholoaga, ti mautali ke “au atu ai he manamanatu” ke he tau mena kua fanogonogo a tautolu ki ai.—Hepe. 2:1.
3. Ko e heigoa ka lagomatai aki a tautolu ke tauteute e tau loto ma e fakaholoaga?
3 Ko e taha mena aoga ke nonofo tauteute a tautolu kua putoia ai e tau loto ha tautolu ke maeke ke fanogonogo mo e fakaako. (Esera 7:10) Ko e fakaholoaga ke lata mo e fonoaga to fakailoa tuai he faahi Kupega Hila jw.org ke fakakite e tau matapatu lauga fakalataha mo e tau kupu Tohi Tapu uho. Kua foaki mai he mena nei e tau mena aoga lahi ke fakaaoga ke lata mo e Tapuakiaga he Magafaoa he afiafi he tau faahi tapu to hoko e fonoaga. Falu he tau matakainaga ne lomi e fakaholoaga ke fakaaoga ke fakamau aki e tau manatu he fonoaga.
4. Fakaaoga fēfē he tau mamatua e fonoaga ke fakaako e tau fanau ha lautolu?
4 ‘Fakaako Haau a Fanau’: Taha fakamauaga uho ne talahau he fonoaga he Mouga ko Sinai ke he tau mamatua i Isaraela ke “fakaako . . . ha lautolu a fanau.” (Teu. 4:10) Foaki age he fonoaga ke he tau mamatua e mena uho lahi ke taute pihia foki. Kua lata e tau fanau ke nonofo mo e tau mamatua he fonoaga ke lagomatai a lautolu ke fanogonogo. Ka oti e tau aho takitaha ti ke he mogo fakamui ka taute e Tapuakiaga he Magafaoa, kua lata ke fakatutala auloa e tau magafaoa ke he fakaholoaga.
5. Aoga fēfē a tautolu ka fakalataha atu ke he fonoaga ne amaamanaki ki ai?
5 Ko e fonoaga uho he Mouga ko Sinai ne lagomatai e tau Isaraela ke loto fakaaue ke he monuina uho lahi ha lautolu ko e tau tagata he Atua. (Teu. 4:7, 8) Ko e fonoaga kua amaamanaki a tautolu ki ai kua tauteute ke aoga pihia ma tautolu. Ke he tolu e aho to maeke a tautolu ke toka e lalolagi favale ha Satani ka e moua e hahau mo e lafiaga atihake he parataiso fakaagaaga ha tautolu. (Isaia 35:7-9) Ha kua tata mai e aho ha Iehova, aua neke tiaki e tautolu e magaaho nei ke feleveia auloa ke fefakamafanaaki!—Hepe. 10:24, 25.