Fifitaki ke he Tau Perofeta—Sefanaia
1. Ko e heigoa e tuaga he magaaho ne fekafekau a Sefanaia ko e perofeta, ti puhala fe ne eke a ia mo fakafifitakiaga mitaki ma tautolu he vahā nei?
1 Ko e lotoga he senetenari ke fitu aki F.V.N., kua tupu lahi e tapuaki ki a Paala i Iuta. Ko e Patuiki kelea ko Amone kua kelipopo, ti ko e patuiki fuata ko Iosia ne kua pule mogonei. (2 Nofo. 33:21–34:1) He vahā ia, ne fakatu e Iehova a Sefanaia ke fakapuloa e Haana a fakafiliaga. Pete ni ko Sefanaia ko e taha he magafaoa patuiki ha Iuta, ne nakai fakateaga e ia e malolō he fekau ha Iehova ke he moumouaga he tau takitaki a Iuta. (Sefa. 1:1; 3:1-4) Pihia foki, kua eketaha a tautolu ke fifitaki e loto malolō ha Sefanaia mo e nakai fakaatā e tau pipiaga fakamagafaoa ke lauia kelea e tapuakiaga ha tautolu ki a Iehova. (Mata. 10:34-37) Ko e heigoa e fekau ne fakapuloa e Sefanaia, ti ko e heigoa ne fua mai ai?
2. Ko e heigoa e tau gahua kua lata ia tautolu ke taute ke hao mai he aho he ita ha Iehova?
2 Kumi a Iehova: Ko Iehova ni hokoia kua maeke ke fakahao e tau tagata ka hoko mai e aho he ita haana. Ti tomatoma e Sefanaia e tau tagata Iuta ke kumi a Iehova, kumi e mahani tututonu, mo e kumi e mahani molū he fai magaaho agaia. (Sefa. 2:2, 3) Pihia tonu ni he vahā ha tautolu. Tuga a Sefanaia, fakamafana e tautolu e falu ke kumi a Iehova, ka e latatonu foki a tautolu ke gahua makaukau, mo e tokaloto ke ua “liliu kehe ia Iehova.” (Sefa. 1:6) Ka e kumi e tautolu a Iehova he kumikumi fakatekiteki e Kupu haana mo e liogi ma e takitakiaga haana. Kumi e tautolu e mahani tututonu he fakatumau ke moui mahani meā. Kumi e tautolu e mahani molū he feaki e aga omaoma mo e he talia fakamakutu ke he takitakiaga he fakatokatokaaga ha Iehova.
3. Ko e ha kua lata ia tautolu ke fakatumau e onoonoaga mitaki ke he fekafekauaga?
3 Tau Fua Mitaki: Ko e fekau ha Sefanaia he fakafiliaga ne hokotia ke he tau loto he falu i Iuta ka kua mua atu e lauia ke he fuata ko Iosia, ne kamata a ia ke kumi ki a Iehova pete ne tote agaia a ia. Magaaho fakamui ne taute fakamakutu e Iosia e matagahua ke utakehe e tapuaki tupua he motu. (2 Nofo. 34:2-5) He vahā nei, pete ni kua mokulu e falu saito po ke tau tega ke he kauhala, ke he mena patu, po ke vao mahukihuki, ko e falu saito kua mokulu foki ke he kelekele mitaki ti fua mitaki mai. (Mata. 13:18-23) Mauokafua a tautolu to matutaki a Iehova ke fakamonuina e tau gahua ha tautolu he makaukau a tautolu ke gana e tau tega he Kautu.—Sala. 126:6.
4. Ko e ha kua lata ia tautolu ke tumau ke ‘tatali ki a Iehova’?
4 Falu tagata i Iuta ne manatu to nakai taute e Iehova ha mena. Pete ia ne mavehe a Iehova ki a lautolu oti kua tata mai e aho lahi haana. (Sefa. 1:12, 14) Ko e fakamouiaga to hoko ni ki a lautolu kua tua ki a ia. (Sefa. 3:12, 17) Kia fiafia lahi a tautolu he kaufakalataha ke fekafekau mo e tau matakainaga tapuaki ti ‘tatali ki a Iehova,’ ko e Atua mua ue atu ha tautolu!—Sefa. 3:8, 9.