Fakatolomaki ki Mua e Lotomatala ha Tautolu he Fekafekauaga—Fakamahani e Tau Tagata Fakaako Tohi Tapu ke Feaki e Tau Aga Fakaako Mitaki

Kakano kua Aoga Ai: Ke maeke ke holo ki mua ke he motua fakaagaaga, kua lata he tau tagata fakaako Tohi Tapu ke fagai e tau manamanatuaga mo e tau loto ha lautolu aki e tau fakaako aoga loga he Kupu he Atua. (Hepe. 5:12–6:1) Ko e fakaako kua lata mo e laliaga. Putoia ai e falu vala tala foou ke he mena ne fitā e maama mo e manamanatu a tautolu ki ai ne kua uho lahi. (Fakatai 2:1-6) He iloa ke taute e kumikumiaga fakatagata to maeke he tau tagata fakaako ke tali e tau hūhū he Tohi Tapu he fakaaoga e tau tohi faka-Kerisiano ha tautolu. Ko e laliaga fakamakutu ne fakafitā a lautolu ke fakagahua e tau mena ne iloa e lautolu to lagomatai ai ke mauokafua ke he tau kamatamata ka fehagai a lautolu ko e tau Kerisiano.—Luka 6:47, 48.

Puhala ke Taute Ai:

Peehi e aoga he kumi e lagomatai ha Iehova he liogi ato taute e tau fakaakoaga takitaha.—Ioane 14:26; 1 Kori. 2:10.
Mai he kamataaga, fakamafana e tagata fakaako haau ke tauteute tuai ma e fakaako Tohi Tapu haana. Fakakite age ki a ia e lagaki fakaako haau, ti fakaako ki a ia e puhala ke vavate po ke fakamailoga ni e tau matapatu kupu po ke tau talahauaga.
Tala age ke he tagata fakaako haau ke tali e tau hūhū he tau kupu ni haana. Kalo kehe he liliu e fakaakoaga ke he magaaho hūhū mo e tali ne nakai fakalagalaga ti tali ni fakahako e tagata fakaako mai he tohi.
Fakamalolō e tagata fakaako haau ke totou e vala he Kupu he Atua he tau aho takitaha. Fakakite ki a ia e setulu he totouaga Tohi Tapu he jw.org, ne fakamau ai e puhala aoga ka taute e ia e mena nei. Ko e feaki he aga totou he Tohi Tapu ke he tau aho takitaha kua lata ke fakamakamaka, ka e to uho lahi mahaki e laliaga.—Sala. 1:2, 3.
Fakakite ke he tagata fakaako haau e puhala ke kumi e ia e tau tali ke he tau hūhū Tohi Tapu he fakaaoga e Watchtower Library po ke Watchtower ONLINE LIBRARY. Lagomatai a ia ke kitia e tau kupu fakamatatohi kū (mnemonic) ma e tau tohi ne fakaaoga mau he tau feleveiaaga he fakapotopotoaga.

Fakatai e Mena Ē he Mahina Nei:

He matahiku he vala mataulu po ke veveheaga, hūhū ke he tagata fakaako Tohi Tapu haau ke fakakatoatoa he tau alaga kupu gahoa e mena ne kua fakaako e ia. Ka nakai fai tagata fakaako Tohi Tapu a koe, fakamahani ke fakakatoatoa e vala mai he Tohi Tapu po ke paratafa he Ko e Kolo Toko he tau alaga kupu gahoa ke fakaholo ki mua e maamaaga ni haau he totou.