Ko e Tufuga Fakaalofa ne Leveki ki a Tautolu
1. KO E TUFUGA HA TAUTOLU NE FAKAHAKE E LAĀ
Manamanatu la ko e fēfē e moui he lalolagi ka nakai fai laā? Foaki he laā ke he tau akau e malolō ke tupu mai e tau lau, tau fiti, tau fua, mo e tau tega. Moua foki he tau akau e vai mai he kelekele he tau vakavaka ti hake ke he tau lau mo e fakatoka atu e vai ke he pulagi.
2. KO E TUFUGA HA TAUTOLU NE FAKATŌ E UHA
Ko e uha ko e mena fakaalofa uho he Atua ke maeke e fonua ke tupu mai e tau mena kai ma tautolu. Fakatō hifo he Atua e uha mo e mai e vahā ke fua e tau akau, ti makona a tautolu he kai mo e fiafia e tau loto.
3. KO E TUFUGA HA TAUTOLU NE FOAKI E TAU MENA KAI MO E MENA KE TUI
Tokologa e tau matua taane ne tupetupe ke fai mena kai mo e fai mena tui e tau magafaoa ha lautolu. Pehē mai e tau Tohiaga Tapu: “Kia kitekite a mutolu ke he tau manu lele; nakai gana saito e lautolu po ke helehele saito, po ke tanaki ke he tau fale saito, ka e fagai ni a lautolu he Matua ha mutolu ha ha he lagi. Ka e nakai kia ko e mena mua ha mutolu a mitaki kia lautolu.”—Mataio 6:25, 26.
“Kia manamanatu a mutolu ke he tau talotalo he vao, po ke tupu fefe, . . . ka e tala atu e au kia mutolu, [ko e Patuiki ko] Solomona mo e hana lilifu lahi nakai tapulu a ia poke taha he tau mena na. Kaeke kua fakatapulu pihia he Atua e vao he fonua kua moui mai, . . . ka e nakai kia au atu he pihia kia mutolu.”—Mataio 6:28-30.
Ha kua maeke e Atua ke foaki mai ki a tautolu e tau mena kai mo e tau mena ke tapulu ai, to maeke mooli foki a ia ke lagomatai a tautolu ke moua e falu mena aoga kua lata mo e moui. Ka eketaha a tautolu ke taute e finagalo he Atua, to fakamonuina e ia e tau laliaga ha tautolu ke tō e tau mena kai po ke lagomatai a tautolu ke moua e gahua tupe ke fakatau e tau mena kua aoga ma lautolu.—Mataio 6:32, 33.
Loga mooli e tau kakano mitaki ha tautolu ke fakaalofa ke he Atua ka manamanatu a tautolu ke he laā, uha, tau manu lele, mo e tau fiti. To fakatutala a tautolu he vala tala ka mui mai ke he puhala kua matutaki e Atua mo e tau tagata.