Tuku e Loto Haau ke he Kotofaaga Haau!

FĒFĒ e logonaaga haau ka moua e tohi mafanatia mai he kapitiga uho? Moua he tutaki Kerisiano ko Timoteo e tohi pihia mai he aposetolo ko Paulo, ko e tohi ne iloa e tautolu mogonei ko e 2 Timoteo he Tohi Tapu. Kua makai mooli a Timoteo ke kumi e matakavi ogoogonoa ke totou e tohi mai he kapitiga fakahele haana. Liga manamanatu a Timoteo: ‘Malolō la nakai a Paulo? Fai fakatonuaga nakai a ia ke lata ke taute aki e tau kotofaaga haaku? Lagomatai nakai he tohi nei au ke kautū ke he fekafekauaga Kerisiano haaku mo e lagomatai e falu?’ To kitia e tautolu, moua e Timoteo e tau tali ke he tau hūhū nei mo e falu mena aoga foki he tohi nei. Ka e mogonei, to fakatutala a tautolu ke he falu fakatonuaga lagomatai he tohi nei.

“KUA FAKAUKA AI AU KE HE TAU MENA OTI”

He kamata a Timoteo ke totou e tau kupu hafagi he tohi, maama agataha e ia e fakafetuiaga tata haana mo Paulo. Fakahigoa mafanatia e Paulo a ia “ko e tama fakahele.” (2 Timo. 1:2) Liga 30 tumā e tau ha Timoteo he mogo ne moua e ia e tohi nei, kavi ke he 65 V.N., kua fitā a ia he eke mo motua Kerisiano lotomatala. Ne fakalataha a ia mo Paulo ke molea hogofulu e tau mo e lahi e mena haana ne fakaako.

Liga lahi e atihake ha Timoteo ke iloa kua fakauka fakamooli a Paulo ke he matematekelea. Kua līlī a Paulo ke he tau toua lapatoa i Roma ti fehagai mo e mate. (2 Timo. 1:15, 16; 4:6-8) Liga kitia e Timoteo e loto malolō he aposetolo: “Kua fakauka ai au ke he tau mena oti.” (2 Timo. 2:8-13) Tuga a Timoteo, maeke a tautolu ke moua e fakamalolō mai he fakafifitakiaga mua ue atu ha Paulo ke he fakauka.

“FAKAPUHO E MENA FAKAALOFA”

Tomatoma e Paulo a Timoteo ke onoono ke he kotofaaga haana ke he fekafekauaga ke he Atua ko e mena uho lahi. Manako a Paulo ki a Timoteo ke “fakapuho e mena fakaalofa mai he Atua” ne ha ha ia ia. (2 Timo. 1:6) Fakaaoga e Paulo e kupu khaʹri·sma ma e “mena fakaalofa.” Ko e kupu Heleni ia kua hagaao ke he mena fakaalofa foaki noa, ko e taha mena ne nakai lata a tautolu ke moua noa. Moua e Timoteo e mena fakaalofa nei he magaaho ne moua e ia e kotofaaga pauaki he fakapotopotoaga.​—1 Timo. 4:14.

Ko e heigoa ha Timoteo ka taute aki e mena fakaalofa nei? He totou e ia e talahauaga “fakapuho e mena fakaalofa,” liga manamanatu a ia ke he afi he kaina ne puho he tau malala. Fakapuho mo e fakavela lahi he tau malala ia e afi. Taha e tohi fakamaama ne talahau ko e kupu Heleni (a·na·zo·py·reʹo) ne fakaaoga e Paulo kua kakano ke “liu puho, liu fakamoui, iliili ke puho,” kua fakatai ai ke “fakalagalaga ke he falu matagahua.” Kakano ai, kua fakatonu a Paulo ki a Timoteo: ‘Tuku e loto haau ke he kotofaaga haau!’ Liga loto fakaaue a koe kua lata foki a tautolu he vahā nei ke taute pihia​—he eketaha fakamakutu a tautolu ke he fekafekauaga ha tautolu.

“MENA MITAKI NE TUKU ATU KIA KOE KIA LEVEKI”

He fakatumau ke totou e tohi mai he kapitiga uho ha Timoteo, ha ha i ai foki taha talahauaga ka lagomatai a ia ke kautū he fekafekauaga haana. Tohi e Paulo: “Ko e mena mitaki ne tuku atu kia koe kia leveki ai e koe ke he lagomatai mai he Agaga Tapu kua nofo i loto ia tautolu.” (2 Timo. 1:14) Ko e heigoa e mena ia ne tuku atu? Ko e heigoa e mena ia ne tuku atu ki a Timoteo? He kupu fakamua, hagaao a Paulo ke he “tau kupu tonu,” ko e kupu mooli he tau Tohiaga Tapu. (2 Timo. 1:13) Ha ko e fekafekau Kerisiano a Timoteo, ne fakamatala e kupu mooli i loto mo fafo he fakapotopotoaga. (2 Timo. 4:1-5) Kua kotofa foki a Timoteo mo motua ke leveki e fuifui he Atua. (1 Pete. 5:2) Maeke a Timoteo ke leveki, po ke puipui e kupu mooli ne fakaako e ia he falanaki ke he agaaga tapu mo e Kupu ha Iehova.​—2 Timo. 3:14-17.

Mogonei, kua tuku mai foki ki a tautolu e kupu mooli ke fakaako ke he falu. (Mata. 28:19, 20) Maeke a tautolu ke fakatumau e loto fakaaue ma e mena homo ue atu nei ne tuku mai ki a tautolu he fakamakamaka ke liogi mo e feaki e aga mitaki he fakaako e Kupu he Atua. (Roma 12:11, 12; 1 Timo. 4:13, 15, 16) Liga ha ha ia tautolu foki e kotofaaga he fekafekau ko e motua kua kotofa po ke he gahua mau. Ko e tau kotofaaga pihia ne tuku mai ki a tautolu kua maeke ke fakatokolalo aki a tautolu mo e lagomatai ke falanaki tumau ke he Atua. Ti maeke a tautolu ke leveki, po ke puipui e mena nei ne tuku mai ki a tautolu, he tokiofa ai mo e falanaki ke he lagomatai ha Iehova ke leveki aki.

TUKU AGE E TAU MENA NEI KE HE TAU TAGATA FAKAMOOLI

Ko e tau kotofaaga ne moua e Timoteo kua nakai tupetupe na ia tokotaha ki ai. Putoia foki e falu. Kakano haia ne tomatoma e Paulo a Timoteo: “Ko e tau mena foki ne fanogonogo mai a koe kia au . . . kia tuku age e koe ke he tau tagata fakamoli, kua maeke ni ke fakaako atu ke he falu.” (2 Timo. 2:2) Fakamanatu age e Paulo ki a Timoteo ke fakaako e tau mena oti ne iloa e ia ke he falu matakainaga taane Kerisiano. Uho lahi ke he tau leveki oti he fakapotopotoaga he vahā nei ke taute pihia foki. Kua nakai puipui he leveki mitaki e iloilo haana ke he gahua ne tuku age ki a ia. Ka e fakaako e ia falu ke maeke ke taute e gahua. Nakai matakutaku a ia ke iloa po ke iloilo atu e falu he taute e gahua ia. Ti nakai fakaako ni he leveki e tau lakaaga mukamuka he gahua. Manako a ia ke lagomatai a lautolu ne fakaako e ia ke feaki e fifiliaga mo e iloilo mitaki ke motua fakaagaaga. He puhala ia, ko e “tau tagata fakamoli” ne fakaako e ia to maeke ke lagomatai e fakapotopotoaga.

Tokiofa mooli e Timoteo e tohi mafanatia ne moua e ia mai ia Paulo. Mukamuka a tautolu ke mailoga a ia ne liu kitekite e fakatonuaga aoga mo e manamanatu fakalahi ke he puhala mitaki ke fakagahua e tau kotofaaga haana.

Manako a tautolu ke fakagahua e fakatonuaga nei. Fēfē? Eketaha a tautolu ke fakapuho e mena fakaalofa, ke puipui e mena mitaki ha tautolu, mo e fakaako e falu ke he tau mena oti ne iloa e tautolu. Ke he puhala ia ne tohi e Paulo ki a Timoteo, maeke a tautolu ke “fakakatoatoa ni [ha tautolu] a feua.”​—2 Timo. 4:5.