To Fakamafola Nakai e Koe e Tau Fekehekeheaki?

KUA manako a Iehova ko e Atua ke he tau tagata tapuaki haana ke moua e mafola. Manako a ia ki a lautolu ke tutuli e mafola mo e falu. Ka taute pihia e lautolu to mafola e fakapotopotoaga Kerisiano. To futia he mafola nei e tau tagata tokologa ke he fakapotopotoaga.

Ma e fakatai, ko e taulātua i Madagascar ne mailoga e mafola he tau tagata ha Iehova ti manatu, ‘Ka manako au ke mui ke he lotu, to fano au ke he lotu nai.’ Fai magaaho ti oti e tapuaki temoni haana, taute e tau hikihikiaga he fakamauaga haana, mo e kamata ke tapuaki ki a Iehova ko e Atua he mafola.

Tuga e tagata ia, tokoafe e tagata he tau tau takitaha ne fai vala ke he fakapotopotoaga Kerisiano ti moua e mafola ne manako lahi a lautolu ki ai. Ka e totou e tautolu he Tohi Tapu ko e “mahekeheke kelea mo e fetoko” he fakapotopotoaga ka moumou e tau fakafetuiaga mo e fakatupu e lekua. (Iakopo 3:14-16) Ka e tuku mai he Tohi Tapu e fakatonuaga mitaki he puhala ke kalo kehe he tau lekua ia mo e fakamalolō e mafola ha tautolu mo e tau matakainaga. Kitekite la tautolu ke he puhala kua gahua e fakatonuaga nei he falu tuaga mooli he moui.

TAU LEKUA MO E TAU TALI

“Nakai femataaki au mo e matakainaga taane ne gahua mo au. Fai mogo ne feuti a maua ko e taha ke he taha, ti tokoua e tagata ne o mai mo e kitia e latau ha maua.”​—CHRIS.

“Ko e matakainaga fifine ne fa fakamatala mo au ne amanaki ni ti nakai liu pulega ma e gahua ha maua he fonua. Oti katoatoa e tutala haana ki a au. Nakai iloa e au e kakano ne pihia ai.”​—JANET.

“Tokotolu a mautolu ne tutala he telefoni. Taha ia laua ne mavehe ti manatu au kua tamate e laini haana. Ti talahau e au e tau mena kelea hagaao ki a ia ke he tagata ne toe he telefoni, ka e nakaila tamate e laini he tagata fakamua.”​—MICHAEL.

“He fakapotopotoaga ha mautolu, tokoua e paionia ne kamata ke fai lekua. Taha ne fakaheu e taha. Ko e taufetoko ha laua ne fakalolelole e falu.”​—GARY.

Nakai tuga ko e tau lekua hagahaga kelea anei. Ka e fakatupu he tau tuaga nei e loto mamahi tumau ke he tau tagata ne lauia ti maeke ke moumou e mafola he fakapotopotoaga. Fiafia ai, kua muitua he tau matakainaga nei e tau takitakiaga he Tohi Tapu ti liu moua e mafola. Ko e heigoa e tau takitakiaga he Tohi Tapu he manatu haau kua lagomatai a lautolu?

“A mutolu, neke latau a mutolu ke he magahehala.” (Kenese 45:24) Tala age e Iosefa e fakatonuaga pulotu nei ke he lafu haana he mogo ne liliu a lautolu ke he matua taane ha lautolu. Ka nakai tautaofi he tagata e tau logonaaga haana ti fakaatā a ia ke ita vave to holo ki mua e tuaga kelea. To liga ita foki e falu. Mailoga e Chris he falu mogo kua uka ki a ia ke loto fakatokolalo mo e omaoma ke he tau fakatonuaga. Manako a ia ke hiki, ti fakamolemole a ia ke he matakainaga ne taufetoko mo ia. Kua eketaha a Chris ke tautaofi e ita haana. Mailoga ai he matakainaga kua eketaha a Chris ke hiki, ne hiki foki a ia. Kua mafola a laua mogonei he fekafekau tokoua ki a Iehova.

“Kua ulu e tau mena ne manamanatu ki ai kaeke kua nakai fai pulega.” (Tau Fakatai 15:22) He nakai liu e kapitiga ha Janet ke tutala ki a ia, ne fifili a Janet ke fakagahua e kupu tohi nei. Fina atu a ia ke fakatutala mo e matakainaga fifine. Hūhū a Janet kaeke kua taute e ia taha mena ke fakaita aki a ia. Ukauka a laua he mogo fakamua. Ka e he matutaki a laua ke tutala he leo totonu, ne logona e laua e totokaaga. Mailoga he matakainaga kua nakai maama e ia e mena ne tupu he mogo kua mole ti nakai taute e Janet ha mena ke fakaita aki a ia. Ne fakamolemole a ia ki a Janet ti liu a laua mogonei kapitiga foki he fekafekau tokoua ki a Iehova.

“Kaeke foki ke ta atu e koe hau a poa ke he fatapoa, ti manatu ai a koe ke he hau a matakainaga ha i ai taha mena kua mamahi ai kia koe. Kia toka ai hau a poa i mua he fatapoa, ka e fano a a koe ke fakafeilo fakamua mo e hau a matakainaga.” (Mataio 5:23, 24) Talahau e Iesu e fakatonuaga nei ke he haana a Lauga he Mouga. Mole e talahau e Michael e tau mena kelea hagaao ke he taha matakainaga taane, ne kelea e logonaaga haana. Fifili a ia ke taute e tau mena oti ke maeke ke fakahako e tuaga. Ati fina atu a ia ke he matakainaga mo e fakamolemole fakalahi ki a ia. Ko e heigoa ne tupu? Pehē a Michael, “Ne fakamagalo moolioli he matakainaga haaku au.” Ti liu a laua kapitiga foki.

“Kia fefakaukaaki a mutolu, mo e fefakamagaloaki, kaeke kua mahani kelea taha kia taha.” (Kolose 3:12-14) Manatu nakai e tau paionia tokoua ne taufetoko he gahua he fonua? Lagomatai totonu he motua a laua ke kitia kua fakaita e laua e falu ti taute a lautolu ke nakai totoka e tau logonaaga. Fakamanatu e ia ki a laua kua lata a laua ke fefakaukaaki mo e lagomatai ke tumau e mafola he fakapotopotoaga. Talia e laua ti fakagahua e fakatonuaga haana. Kua femataaki a laua mogonei he fakamatala e tala mitaki.

Ko e fakatonuaga pihia foki ne moua ia Kolose 3:12-14 ka lagomatai a koe ke loto fakatokolalo, fakamagalo e tagata ne fakamamahi a koe, ti ua manamanatu ke he matalekua. Ka e kua ka lali a tautolu ke fakamagalo ti nakai maeke ai? Ko e matapatu fakaakoaga he Tohi Tapu ia Mataio 18:15 ka lagomatai a tautolu. Pete kua tutala pauaki a Iesu ke he tau agahala kelea lahi mahaki, ne fakamaama e ia e mena ka taute he tau magaaho kua fai lekua a tautolu mo e taha matakainaga. He puhala totonu mo e fakatokolalo, maeke a koe ke fina atu ke he matakainaga ia ke fakatutala ke he matakupu mo e lali ke fakamafola e lekua.

Loga foki e tau lagomataiaga aoga he Tohi Tapu. Laulahi ai ne putoia e falanaki ke he agaaga tapu he Atua ke maeke a tautolu ke fakakite e “fua he Agaga.” Ko e tau fua nei “ko e fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.” (Kalatia 5:22, 23) Manamanatu ke he mena nei. Gahua mitaki e matini ka oela e tau vala. Puhala taha pihia, mukamuka lahi ke fakamafola e tau fekehekeheaki ha tautolu mo e moua e tau fakafetuiaga mafola ka fakakite e tautolu e tau fua mitaki nei mai ia Iehova.

KO E KEHEKEHE HE TAU MAHANI FAKATAGATA TI MOUA HE FAKAPOTOPOTOAGA E FIAFIA

Igatia a tautolu mo e mahani fakatagata. Ti igatia a tautolu mo e kehekehe e tau aga mo e tau puhala ke kitia e tau tuaga mo e puhala ne talahau aki. Maeke e tau mena nei ke taute e tau fakafetuiaga ha tautolu ke fiafia mo e fulufuluola. Ka ko e tau mahani kehekehe ha tautolu fakatagata ka fakatupu foki e nakai femaamaaki mo e taufetoko. Taha e motua ne lotomatala ne talahau e fakataiaga ka tupu e mena nei he pehē a ia: “Ko e tagata mā ne fa uka falu mogo ke fakalataha mo e tagata hohā tumau. Ko e kehekeheaga ia kua tuga ke nakai aoga; ka e maeke ai ke takitaki atu ke he tau lekua hagahaga kelea.” Talitonu nakai a koe ko e tau tagata ne kehe lahi e tau mahani fakatagata to nakai mafola mo e falu? Kitekite la tautolu ke he fakataiaga ke he tokoua e aposetolo. Ka manamanatu a tautolu ki a Peteru, liga manatu a tautolu ke he tagata ne talahau tumau e tau mena oti he manamanatuaga haana. Ka manamanatu a tautolu ki a Ioane, liga kitia e tautolu e matakainaga fakaalofa ne manamanatu tumau to vagahau po ke taute taha mena. Ko Peteru mo Ioane ne kehekehe e tau mahani fakatagata. Ka e gahua fakalataha tokoua a laua he fekafekau ki a Iehova. (Gahua 8:14; Kalatia 2:9) Maeke foki ke pihia mo tautolu mogonei. Ko e tau Kerisiano foki ne kehe mamao e tau mahani fakatagata kua maeke ke gahua fakalataha auloa.

Ka e kua ka talahau po ke taute he taha tagata he fakapotopotoaga e taha mena ke fakahogohogo manava aki a koe? Mitaki ke manatu na mate a Keriso ma e matakainaga ia foki, tuga ne mate a Iesu ma haau ti kua lata a koe ke fakaalofa ke he matakainaga haau. (Ioane 13:34, 35; Roma 5:6-8) Nakai tonu ke fifili ke nakai kapitiga a koe mo e tagata ia po ke fakaheu e koe a ia. Ka e hūhū hifo ki a koe: ‘Taute kia he matakainaga haaku e mena ne nakai lagotatai mo e matafakatufono ha Iehova? Lali kia a ia ke fakamamahi pauaki au? Po ke nakai tatai e tau mahani fakatagata ha maua? Ha ha kia he matakainaga ia e tau mahani ne manako au ke moua foki?’

Ma e fakatai, ka fiafia a ia ke tutala ka e fakanono a koe, ko e ha he gahua tokoua he fonua mo e kitia e mena ka iloa e koe? Ka e kua ka mahani fakamokoi a ia ka e nakai pihia a koe? Mailoga nakai e koe e fiafia ne moua he foaki ke he tagata motua, ki a ia ne gagao, po ko ia ne nofogati? Maeke nakai a koe ke fakaako e puhala fakamokoi lahi he tagata ia? Ko e manatu, pete e kehekehe a koe mo e matakainaga haau, maeke a koe ke hagaaki ke he tau mahani mitaki haana. To nakai eke a mua mo tau kapitiga mitaki lahi mahaki, ka e to fetataaki lahi a mua. Lagomatai he mena nei ke fakatupu e mafola ki a mua mo e fakapotopotoaga.

He senetenari fakamua, tokoua e matakainaga fifine ne higoa ko Evotia mo Sunetuke. Tuga kua kehekehe lahi e tau mahani fakatagata ha laua ka e fakamalolō he aposetolo ko Paulo a laua ke “manamanatu a laua ke he mena taha ke he Iki.” (Filipi 4:2) Manako foki a tautolu ke tapuaki ki a Iehova fakalataha mo e tau matakainaga ha tautolu mo e fakatupu e mafola he fakapotopotoaga.

UA FAKAATĀ E FEKEHEKEHEAKI KE MATUTAKI

Ko e ha kua lata ke utakehe fakamafiti e tautolu ha logonaaga kelea ke he falu? Maeke a tautolu ke fakatatai e tau logonaaga nei ke he tau pupu ne tupu he katene fiti fulufuluola. Ka nakai huo kehe e tautolu e tau pupu to kaputia ai e katene katoa. He puhala pihia foki, ka malolō e tau logonaaga kelea ha tautolu ke he falu, to maeke ai ke hufia e fakapotopotoaga katoa. Kaeke ke fakaalofa a tautolu ki a Iehova mo e tau matakainaga ha tautolu, to taute e tautolu e tau mena oti ke puipui e mafola he fakapotopotoaga.

Ka lali a tautolu ke taute mafola mo e falu, liga ofo a tautolu ke he fua mitaki ka tupu mai ai. Tupu e mena nei ke he taha Fakamoli. Pehē e tala haana: “Logona hifo e au, taha e matakainaga fifine ne taute au tuga e tama tote. Ti tauhele mooli e mena ia ki a au. He tupu e ita haaku, ne kamata au ke fakaheu a ia. Manatu au, ‘Nakai fakakite e ia ki a au e fakalilifu ne kua lata mo e to nakai fakakite foki e au e fakalilifu ki a ia.’”

Ti manamanatu e matakainaga fifine nei ke he aga ni haana. “Kamata au ke kitia e tau aga kelea haaku ti hogohogo manava ni au ki a au. Mailoga e au kua lata au ke hikihiki e manamanatuaga haaku. Mole e liogi ki a Iehova hagaao ke he mena ne tupu, ne fakatau e au e mena fakaalofa tote ma e matakainaga ti tohi e manatu kū ke fakamolemole ki a ia ha ko e aga kelea haaku. Ne fepekaaki a maua ti talia ke tuku kehe e matalekua. Nakai liu a maua fai lekua foki.”

Manako oti e tau tagata ke he mafola. Ka ko e logonaaga nakai haohao mitaki po ke fakatokoluga ka taute e tau tagata ke nakai mafola. Ko e aga mau anei he lalolagi, ka kua amanaki a Iehova ke nakai pihia e tau tagata tapuaki haana. Ha ko e Tau Fakamoli a Iehova, kua lata ke mafola mo e kaufakalataha. Ne omoomoi e Iehova a Paulo ke tohi ke he tau Kerisiano “ke mahani . . . ke lata mo e uiaga” ne moua e lautolu. Fakamalolō e ia a lautolu ke taute e mena nei “ke he loto fakatokolalo ni mo e holoilalo, mo e fakamanavalahi kia fakauka a mutolu ko e taha ke he taha mo e fakaalofa, Kia lalilali atu a mutolu ke toto mau e loto fakalataha ha he Agaga ke he pipiaga he mafola.” (Efeso 4:1-3) Ko e “pipiaga he mafola” ne fiafia he tau tagata ha Iehova kua uho lahi. Kia igatia a tautolu ke taute e tau mena oti kua maeke ia tautolu ke tupu lahi e malolō mo e fakamafola e tau lekua ne liga lauia e vahāloto ha tautolu mo e tau matakainaga.