“Kia Foaki e Ia . . . mo e Fakahoko Mai Hau a Tau Fatuakiloto Oti Kana”

1. Ko e heigoa kua lata ia lautolu ne ikiiki ke fifili hagaao ke he vahā anoiha ha lautolu? Ko e heigoa ka lagomatai a lautolu ke nakai molea e fakaatukehe? (Kikite fakatino he kamataaga.)

KO MUTOLU ne ikiiki kua liga talia, ato kamata e fenoga kua pulotu ke pulega e mena ka fano a koe ki ai. Ko e moui kua tuga e fenoga, ti ko e magaaho ke pulega e mena kua manako a koe ke fano ki ai he magaaho ne tote a koe. Mooli, liga nakai mukamuka ke taute e tau pulega pihia. Ko e tama fifine ne higoa ko Heather ne pehē: “Ko e mena matakutaku. Lata a koe ke fifili e mena ke taute he moui katoa haau.” Ka pihia e logonaaga haau, manatu na pehē a Iehova: “Aua neke kitekite fano a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe.”​—Isaia 41:10.

2. Iloa fēfē e koe kua manako a Iehova ki a koe ke pulega ma e vahā fiafia anoiha?

² Fakamalolō e Iehova a koe ke pulega fakailoilo ma e vahā haau anoiha. (Fakamatalaaga 12:1; Mataio 6:20) Manako a ia ki a koe ke fiafia. Maaliali e mena nei ka kitia, logona, mo e kamata e koe e tau mena ne tufugatia e ia. Leveki foki e Iehova a tautolu he falu a puhala. Foaki mai e ia e fakatonuaga ki a tautolu ti fakaako ki a tautolu e puhala moui ne mua ue atu. Ti ka tiaki he tau tagata e fakatonuaga pulotu haana, nakai fiafia a ia. Tala age a ia ki a lautolu ne nakai muitua ke he takitakiaga haana: “Fifili ai e mutolu e tau mena nakai fiafia ai au. . . . kitiala, to fiafia haku a tau fekafekau, ka ko mutolu to mā ni a mutolu. Kitiala, to kalaga haku a tau fekafekau ha ko e loto fiafia.” (Isaia 65:12-14) Ka taute e tautolu e tau fifiliaga pulotu he moui, to fakaheke e tautolu a Iehova.​—Tau Fakatai 27:11.

TAU PULEGA KA TAUTE A KOE KE FIAFIA

3. Ko e heigoa ne talahau e Iehova ma haau?

³ Ko e heigoa e tau pulega ne talahau e Iehova ma haau? Ke fiafia, lata a koe ke iloa a Iehova mo e fekafekau ki a ia. Puhala anei ne tufuga e Iehova e tau tagata. (Salamo 128:1; Mataio 5:3) Ko e tau manu ne kai, inu, mo e fanafanau. Ka e manako a Iehova ki a koe ke pulega e moui haau he puhala ke fiafia mo e fai kakano lahi. Ko e haau a Tufuga ko e “Atua hana e fakaalofa,” ko e “Atua monuina” po ke fiafia ne eke e tau tagata ke he “hana fakatai.” (2 Korinito 13:11; 1 Timoteo 1:11; Kenese 1:27) To fiafia a koe ka fifitaki ke he Atua fakaalofa ha tautolu. Pehē e Tohi Tapu: “Kua mua e monuina hana ke foaki atu, ke he monuina hana ke talia mai.” (Gahua 20:35) Logona hifo pihia nakai a koe? Ko e tala mooli anei hagaao ke he moui. Ti manako a Iehova ki a koe ke fakatokatoka e tau pulega haau ma e anoiha fakavē ai ke he fakaalofa ma e falu mo e ki a Ia.​—Totou Mataio 22:36-39.

4, 5. Ko e heigoa ne taute a Iesu ke fiafia?

⁴ Fakatoka e Iesu Keriso e fakafifitakiaga mitaki lahi mahaki ma lautolu ne ikiiki. He tote a ia, liga fiafia a ia ke fefeua. Pehē e Kupu he Atua ha ha i ai e “vaha ke kata ai” mo e “vaha ke kolikoli ai.” (Fakamatalaaga 3:4) Fakatata foki a Iesu ki a Iehova he fakaako e tau Tohiaga Tapu. He 12 e tau haana, ofo e tau akoako he faituga he “loto matala hana mo e hana tau kupu ne tali atu.”​—Luka 2:42, 46, 47.

⁵ He lahi hake a Iesu, ko e taute he mena ne ole e Atua ki a ia ke taute ne foaki ki a ia e fiafia. Ma e fakatai, manako e Atua ki a ia “ke fakamatala e vagahau mitaki kia lautolu kua nonofogati” mo e “[fakaala] ai foki e tau matapouli.” (Luka 4:18) Fakamaama he Salamo 40:8 e tau logonaaga ha Iesu: “Haku Atua na e, kua fiafia au ke eke hāu a finagalo.” Fiafia a Iesu he fakaako e tau tagata hagaao ke he Matua haana. (Totou Luka 10:21.) Lagataha he tutala a Iesu ke he fifine hagaao ke he tapuakiaga mooli, pehē a ia ke he tau tutaki haana: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:31-34) Fiafia a Iesu ha kua fakakite e ia e fakaalofa ke he Atua mo e falu. Ka taute pihia e koe to fiafia foki a koe.

6. Ko e ha kua mitaki ke tutala ke he falu hagaao ke he tau pulega haau ma e vahā anoiha?

⁶ Tokologa e Kerisiano ne kamata paionia he ikiiki a lautolu ti taute he mena nei a lautolu ke fiafia. Maeke nakai a koe ke tutala ke he falu ia lautolu hagaao ke he tau pulega haau? “Kua ulu e tau mena ne manamanatu ki ai kaeke kua nakai fai pulega; ka e fakamau ai ni ke he tau pule tokologa.” (Tau Fakatai 15:22) Liga tala atu he tau matakainaga nei ki a koe, ko e paionia e fakaakoaga ka moua e koe e lagomatai ke he moui katoa haau. Fakaako e Iesu e tau mena loga mai he Matua haana he nofo a ia he lagi. Ti ko e mogo ne taute e ia e fekafekauaga haana he nofo a ia he lalolagi, ne matutaki a ia ke fakaako. Logona e ia e fiafia he tala age ke he falu e tala mitaki mo e tumau e mahani fakamooli haana he tau tuaga uka. (Totou Isaia 50:4; Heperu 5:8; 12:2) Kia kitekite a tautolu ke he kakano kua maeke a koe ke fiafia he fekafekauaga mau.

KAKANO KO E GAHUA MITAKI LAHI MAHAKI E TAUTE TUTAKI

7. Ko e ha ne tokologa a lautolu ne ikiiki kua fiafia ke taute tutaki?

⁷ Tala mai a Iesu ki a tautolu ke “eke e tau motu oti kana mo tutaki,” mo e fakaako e tau tagata. (Mataio 28:19, 20) Ka pulega a koe ke taute e gahua nei, to moua e koe e moui kua makona ne fakaheke e Atua. Tuga ni e ha gahua, kua lata a koe ke fai magaaho ke moua e lotomatala. Ko e matakainaga ne higoa ko Timothy ne kamata paionia he fuata mui kua pehē: “Fiafia au ke fekafekau mau ki a Iehova ha ko e puhala a ia ke fakakite e fakaalofa haaku ki a Ia. Fakamua, nakai maeke au ke kamata ha fakaako Tohi Tapu, ka ko e mogo ne hiki atu au ke he taha matakavi foki, ne taha ni e mahina ti kamata e au loga e fakaakoaga. Taha e tagata fakaako ne kamata ke hau ke he Fale he Kautu. He mole e fina atu haaku ke he Aoga Tohi Tapu ma e Tau Matakainaga Taane Nofo Tokotaha ke ua e mahina, moua e au e kotofaaga foou ne kua kamata e au fā e fakaakoaga. Fiafia au ke fakaako e tau tagata ha kua kitia e au kua hiki he agaaga tapu a lautolu.”a (Kikite matahui tala.)​—1 Tesalonia 2:19.

8. Ko e heigoa ne taute he falu ia lautolu ne ikiiki ke maeke ke fakamatala ke he tau tagata tokologa?

⁸ Falu ia lautolu ne ikiiki kua fakaako e taha vagahau. Ma e fakatai, ko Jacob mai i North America ne tohi: “Mogo ne fitu e tau haaku, tokologa he tau kapitiga aoga haaku ko e tau fanau Vieteneme. Manako au ke tala age ki a lautolu hagaao ki a Iehova, ti fai magaaho he mole, ne fakatoka e au e tau pulega ke fakaako e vagahau ha lautolu. Laulahi he tau magaaho, ne fakaako au he fakatatai e tau fufuta he The Watchtower faka-Peritania mo e faka-Vieteneme. Moua foki e au e tau kapitiga he fakapotopotoaga vagahau Vieteneme ne tata mai. He mogo ne 18 e tau haaku, ne kamata au ke paionia. Fakamui, fina atu au ke he Aoga Tohi Tapu ma e Tau Matakainaga Taane Nofo Tokotaha. Lagomatai he mena nei au mo e kotofaaga paionia haaku mogonei, ti ko au ni e motua he matakau vagahau Vieteneme. Tokologa e tagata Vieteneme ne ofo he fakaako e au e vagahau ha lautolu. Ne uiina e lautolu au ki loto, ti fa fakaako e au e Tohi Tapu mo lautolu. Falu ne holo atu ke he papatiso.”​—Fakatatai Gahua 2:7, 8.

9. Ko e heigoa ne fakaako he gahua taute tutaki ki a tautolu?

⁹ Ko e gahua taute tutaki ka fakaako ki a koe e tau aga gahua mitaki, iloa e puhala ke matutaki, mo e puhala ke mauokafua mo e fakailoilo. (Tau Fakatai 21:5; 2 Timoteo 2:24) Ka ko e gahua nei kua mua atu e fiafia ha kua fakaako e koe e puhala ke fakakite e mena ne talitonu a koe mai he tau Tohiaga Tapu. Fakaako foki e koe e puhala ke gahua fakatata mo Iehova.​—1 Korinito 3:9.

10. Moua fēfē e koe e fiafia he gahua taute tutaki pete kua uka e fonua haau?

¹⁰ Moua e koe e fiafia he gahua taute tutaki pete he tokogahoa e tagata he fonua haau kua manako ke fakaako Tohi Tapu. Ke taute tutaki, kua gahua auloa e fakapotopotoaga katoa ko e matakau. Pete he taha ni e matakainaga ne liga moua e tagata ne eke mo tutaki, fiafia oti a tautolu ha kua igatia a tautolu mo e fai vala ke kumi. Ma e fakatai, ko Brandon ne paionia ke hiva e tau he matakavi ne tokogahoa e tagata ne fakaako e Tohi Tapu, kua pehē: “Fiafia au ke fakamatala e tala mitaki ha ko e mena ia ne ole a Iehova ki a tautolu ke taute. Kamata au ke paionia he nakai leva e oti mo e aoga. Fiafia au ke fakamafana e tau matakainaga taane ikiiki he fakapotopotoaga ha mautolu mo e kitia e holo ki mua fakaagaaga ha lautolu. Mole e fina atu haaku ke he Aoga Tohi Tapu ma e Tau Matakainaga Taane Nofo Tokotaha, moua e au e kotofaaga paionia foou. Mooli kua nakai moua e au ha tagata he fonua ne kua holo ki mua ke papatiso, ka e fai e falu. Fiafia au ke he pulega haaku ke fai vala katoa he gahua taute tutaki.”​—Fakamatalaaga 11:6.

MENA KA TAKITAKI ATU HE TAU PULEGA HAAU A KOE

11. Ko e heigoa e puhala fekafekau ki a Iehova ne fiafia e tau tagata fuata tokologa ki ai?

¹¹ Loga e tau tuaga ke fekafekau ki a Iehova. Ma e fakatai, tokologa e tau tagata fuata kua lagomatai ke he gahua talaga. Lata ke moua e loga he tau Fale he Kautu kua foou. Ko e tau matakavi nei kua fakaheke a Iehova ti ko e lagomatai ke talaga ai ka taute a koe ke fiafia. Moua foki e koe e fiafia he gahua mo e tau matakainaga haau. Ti fakaako e koe e tau mena loga, tuga e puhala ke taute e gahua mitaki he puhala haohao mitaki mo e puhala ke kaufakalataha mo e tau leveki haau.

12. Liga takitaki atu fēfē he fekafekauaga paionia ke he falu tuaga foki?

¹² Ko e matakainaga ko Kevin ne pehē: “Tali mai he vahā tote haaku, manako au ke fekafekau mau ki a Iehova he taha aho. Fakahiku, ne kamata au ke paionia he 19 e tau. Leveki fakatupe au he gahua vala magaaho mo e matakainaga taane tā fale. Fakaako au ke tuku hake e tau tuafale, tau pū fakamaama, mo e tau gutuhala. Fakamui, ne ua e tau he fakalataha au mo e matakau lagomatai ka tō e afā, liu talaga he tau Fale he Kautu mo e tau kaina ma e tau matakainaga. He logona e au kua lata ke moua e tau tagata talaga i Aferika Toga, ne tuku e au e tohi ole ti uiina au ke fano. Hinei i Aferika, ne hiki tumau au ke he taha matagahua talaga he Fale he Kautu he falu faahi tapu gahoa. Ko e matakau talaga haaku kua tuga e magafaoa. Nonofo auloa a mautolu, fakaako auloa he Tohi Tapu, mo e gahua auloa. Fiafia foki au he fakamatala mo e tau matakainaga he matakavi he tau faahi tapu takitaha. Ko e tau pulega haaku he tote ne taute au ke fiafia he tau puhala ne nakai kitia tuai e au.”

13. Ko e ha kua tokologa a lautolu ne fuata kua fiafia ke fekafekau ki a Iehova he Peteli?

¹³ Ko e falu ne paionia kua fekafekau mogonei he Peteli. Ko e fekafekau he Peteli ko e puhala fiafia he moui ha ko e tau mena oti ne taute e koe i ai ke lata mo Iehova. Lagomatai e magafaoa Peteli ke foaki e tau Tohi Tapu mo e tau tohi ke maeke e tau tagata ke fakaako e kupu mooli. Ko e matakainaga he Peteli ne higoa ko Dustin ne pehē: “Taute e au e fekafekau mau mo foliaga haaku he mogo ne hiva e tau haaku ti kamata paionia au he oti mo e aoga. Mole taha mo e hafa e tau ne uiina au ke he Peteli, nukua fakaako ke fakagahua e matini lomi ti fakamui taute e tau polokalama komopiuta. He Peteli, fiafia au ke logona hagaao ke he tupu lahi he gahua taute tutaki he lalolagi katoa. Fiafia au ke fekafekau i hinei ha ko e mena ne taute e mautolu kua lagomatai e tau tagata ke fakatata ki a Iehova.”

KO E HEIGOA E TAU PULEGA KA TAUTE E KOE MA E VAHĀ HAAU ANOIHA?

14. Ko e heigoa ka taute e koe mogonei ke mautauteute ma e fekafekauaga mau?

¹⁴ Mautauteute fēfē a koe ma e fekafekauaga mau? Ke fekafekau ki a Iehova he puhala mitaki lahi ka maeke ia koe, lata a koe ke feaki e tau mahani Kerisiano. Fakaako tumau e Kupu he Atua, manamanatu fakahokulo ki ai, ti lali ke fakakite e tua haau he tau feleveiaaga he fakapotopotoaga. He fano a koe he aoga, maeke a koe ke fakaholo ki mua e lotomatala ke vagahau ke he falu hagaao ke he tala mitaki. Fakaako ke fakakite e fiafia ke he tau tagata he hūhū fakailoilo ke he tau manatu ha lautolu mo e fanogonogo ke he tau tali ha lautolu. Maeke foki a koe ke ole ke taute e tau mena he fakapotopotoaga, tuga e lagomatai ke fakameā mo e fakafoou e Fale he Kautu. Fiafia a Iehova ke fakaaoga a lautolu kua fakatokolalo mo e makai ke gahua. (Totou Salamo 110:3; Gahua 6:1-3) Uiina he aposetolo ko Paulo a Timoteo ke fekafekau ko e misionare ha kua “talahaua a ia he tau matakainaga.”​—Gahua 16:1-5.

15. Ko e heigoa haau ka taute ke moua e gahua tupe ke lagomatai a koe ke paionia?

¹⁵ Laulahi he tau fekafekau mau ne lata ke gahua tupe. (Gahua 18:2, 3) Liga maeke a koe ke taute e tau fakaakoaga kūkū ka lagomatai a koe ke moua e gahua vala magaaho kua fai he matakavi haau. Tutala ke he leveki takaiaga haau mo e falu paionia hagaao ke he tau pulega haau, ti hūhū ki a lautolu ma e tau lagomataiaga. Tuga he talahau he Tohi Tapu, “kia tuku atu a kia Iehova hāu a tau gahua; ti fakamau ai e ia e tau mena ne manamanatu ki ai a koe.”​—Tau Fakatai 16:3; 20:18.

16. Mautauteute fēfē he fekafekauaga mau a koe ma e falu matagahua anoiha?

¹⁶ To mauokafua a koe kua manako a Iehova ki a koe ke “toto atu” ke he vahā fiafia anoiha. (Totou 1 Timoteo 6:18, 19.) Lagomatai he fekafekauaga mau a koe ke eke mo Kerisiano motua fakaagaaga he gahua a koe mo e falu fekafekau mau. Tokologa foki ne iloa ko e taute e fekafekauaga mau he mogo ne fuata ka lagomatai he magaaho fakamui ka faitaane po ke faihoana a lautolu. Fa mahani ko lautolu ne paionia to mau, ne matutaki ke paionia tokoua ko e hoa mau.​—Roma 16:3, 4.

17, 18. Putoia fēfē e loto haau he taute e tau pulega?

¹⁷ Pehē e Salamo 20:4 hagaao ki a Iehova: “Kia foaki e ia kia koe ke lata mo e hāu a loto, mo e fakahoko mai hau a tau fatuakiloto oti kana.” He pulega e vahā anoiha haau, manamanatu ke he mena kua manako mooli a koe ke taute he moui haau. Manamanatu ke he mena ne taute e Iehova he magahala ha tautolu mo e mena ka taute e koe he gahua haana. Ti pulega ke taute e mena kua fiafia a Iehova.

¹⁸ Ka fakaaoga e koe e moui haau ke fekafekau katoatoa mo e fakaheke a Iehova, to fiafia lahi a koe. To “fiafia a koe kia Iehova, ti foaki mai ai e ia kia koe e tau mena kua manako ki ai hāu a loto.”​—Salamo 37:4.