Puhala ke Taute e Fakaako Tohi Tapu Haau ke Lauia Mitaki mo e Fiafia

Totou e Iosua e Fakatufono; malolo e tau kaupā ha Ieriko ka e tū e fale ha Raava; lagaki hake e tau lima ha Iosua ke he lagi he liogi

KUA takitaki e Iosua e motu ha Isaraela ke he Motu he Maveheaga. To uka lahi e mena nei. Ka e fakamafana mo e fakamalolō e Iehova a ia he tala age: “Fakamalolo a koe, ti fakamanavalahi ni.” Tala age a ia ki a Iosua ka totou mo e omaoma a ia ke he Fakatufono, to taute e ia e tau fifiliaga pulotu mo e kautū ai.—Iosua 1:7, 8.

Kua nonofo a tautolu he “tau aho uka,” ti maeke foki ke uka e tau momoui ha tautolu. (2 Timoteo 3:1) Ka manako a tautolu ke kautū tuga a Iosua, lata a tautolu ke muitua ke he fakatonuaga ne tuku age e Iehova ki a ia. Lata a tautolu ke totou tumau e Tohi Tapu ti fakaaoga e tau mena ne fakaako e tautolu ke taute e tau fifiliaga mitaki.

Ka e falu ia tautolu ne liga nakai iloa ke fakaako, po ke liga nakai fiafia a tautolu ke fakaako. Ko e fakaako he tagata e Tohi Tapu kua aoga lahi. He manamanatu a koe ke he puha “Fakaaoga e Tau Manatu Nei,” to moua e koe e tau puhala ka lagomatai a koe ke aoga mai he fakaako haau mo e fiafia lahi foki ki ai.

Lologo he salamo: “Kia takitaki e koe au ke he puhala he hāu a tau poaki; ha kua fiafia ni au ki ai.” (Salamo 119:35) Maeke foki a koe ke fiafia ke fakaako e Kupu he Atua. To moua e koe e tau manatu fulufuluola loga he fakatumau a koe ke fakaako e Tohi Tapu.

Pete kua nakai takitaki e koe e motu tuga ne taute e Iosua, ka e ha ha ia koe ni haau a tau lekua. Ti tuga a Iosua, fakaako mo e omaoma ke he Kupu he Atua. Ka taute pihia e koe, to taute e koe e tau fifiliaga pulotu ti kautū.

FAKAAOGA E TAU MANATU NEI

Liogi fakamua to fakaako. Ha ha i loto he Tohi Tapu e tau manatu ha Iehova, ti tohia ai ke aoga a koe. Ka totou e koe e Tohi Tapu, ole ki a Iehova ke lagomatai ke iloa e mena ne totou, maama ai, mo e fakaaoga ai ke taute e tau fifiliaga mitaki he moui haau.—Esera 7:10.
Hūhū hifo ki a koe e tau hūhū he totou e Tohi Tapu po ke tau tohi fakavē ke he Tohi Tapu. Ma e fakatai: ‘Ko e heigoa he vala nei ne tala mai ki a au hagaao ki a Iehova? Matutaki fēfē e mena nei ke he matapatu he Tohi Tapu? Fakaaoga fēfē e au e tau manatu nei ke lagomatai e falu?’
Manamanatu fakahokulo ke he mena ne fakaako e koe. Fakamaoki fakakū, ti manamanatu ke he mena ne totou laia e koe. Hūhū hifo: ‘Fēfē e logonaaga haaku ke he mena nei? Ko e ha ne taute ai au ke pihia e logonaaga? Matutaki fēfē e mena nei ke he mena ne tupu ki a au he tau mogo kua mole, mena ne tupu ki a au mogonei, po ke mena ka tupu ki a au anoiha? Fakaaoga fēfē e au e tau matapatu fakaakoaga po ke fakatonuaga nei he Tohi Tapu ke he moui haaku?’ (Iopu 23:5; Salamo 49:3) Ka manamanatu fakahokulo a koe, mailoga kua maeke a koe ke fakamaama e kakano ne tala age a Iehova ke he tau tagata haana ke kalo kehe he falu matagahua. Po ke manamanatu ke he tau fua ka tupu mai kaeke kua kehe e tau mena ne taute he tagata ne totou laia e koe hagaao ki ai.—Teutaronome 32:28, 29.
Fakaaoga e manamanatuaga haau ka totou. Ma e fakatai, maeke nakai a koe ke manamanatu he mogo ne fakafua he tau matakainaga ha Iosefa a ia ke he tau tagata Isamaeli? (Kenese 37:18-28) Ko e heigoa haau ne kitia, logona, mo e hohogi? Tuku a koe ke he tuaga he tau tagata he tala. Ko e heigoa ha lautolu ne manamanatu mo e logona hifo? Ka fakaaoga e koe e manamanatuaga haau, to fai kakano lahi e puhala fakaako haau.
Fakaaoga e tau koloa fakaako ne foaki he fakatokatokaaga. Maeke e tau mena nei ke fakaalaala e kumikumiaga haau. Fakaako ke fakaaoga e tau puhala ne fai ke he vagahau haau, he initanete mo e tau tohi. Ua fakauaua ke ole ke he falu ke lagomatai a koe ke fakaako ke fakaaoga fakamitaki ai. Ma e fakatai, ko e Watch Tower Publications Index po ke Research Guide for Jehovah’s Witnesses ka lagomatai a koe ke kumi e tau mena kua fitā e tohi ke he tau matakupu pauaki mo e to fakamaama ai ke he loga e tau kupu Tohi Tapu. Fakaaoga e tau apenetiki he New World Translation of the Holy Scriptures ka fai ai he vagahau kua maeke a koe ke totou. Haia i loto e tau vala tala aoga ke he tau matakavi, matohiaga, tau fua tautau mo e tau fuafuaaga, mo e falu matakupu foki.
Fakatōtō e tau matapatu manatu. To lagomatai he mena ia a koe ke manatu e mena ne fakaako e koe. Mua atu, tutala ke he falu ke he mena ne fakaako e koe. Fai mena nakai ka fakaaoga e koe ke he gahua he fonua haau? He taute pihia, to manatu e koe e tau matapatu manatu, ti aoga foki e falu he fakaako haau.