Maeke Nakai he Tohi Tapu ke Lagomatai a Koe ka Hololoa e Gagao?

Ko e tali he Tohi Tapu

Ē. Leveki he Atua e tau fekafekau haana ne gagao. Hagaao ke he fekafekau fakamooli, ne pehē e Tohi Tapu: “To faihoani a Iehova kia ia ka takoto a ia he hana gagao.” (Salamo 41:3) Kaeke kua hololoa e gagao haau, to lagomatai he tau lakaaga nei ne tolu a koe ke fahia:

1. Liogi ma e malolō ke fakauka. To moua e koe e “monuina [mafola] foki mai he Atua kua mua ue atu ke he tau mena oti kua manamanatu ki ai,” ke ua tupetupe lahi mo e lagomatai pete ka uka.​—Filipi 4:6, 7.

2. Manamanatu mitaki. Pehē e Tohi Tapu: “Ko e loto fiafia kua eke mo vai lakau aoga haia; ka ko e loto malipilipi kua magomago ai e tau hui motua.” (Tau Fakatai 17:22) Feaki e aga fiafia ke fakatotoka e momoko mo e lagomatai e malolō tino haau.

3. Atihake e amaamanakiaga haau ma e vahā i mua. He mauokafua e amaamanakiaga haau to lagomatai a koe ke fiafia pete he leva e gagao. (Roma 12:12) Talahau tuai he Tohi Tapu e magaaho ka “nakai pehe mai foki taha kua nofo ai, Kua gagao au.” (Isaia 33:24) To fakamaulu he Atua e tau gagao pehēnei ne nakai maeke he tau puhala foou fakasaiene ke taute. Ma e fakatai, fakamaama he Tohi Tapu e magaaho ka liu fuata mo e malolō a ia kua motua: “Kua liu moui mitaki hana tino ke homo atu ke he tino he tama tote; to liu foki a ia ke he hana vaha fuata.”​—Iopu 33:25.

Ka e mailoga: Pete he talia e lagomatai ne foaki he Atua, kumi foki he Tau Fakamoli a Iehova e tau vai fakaekekafo ka hololoa e gagao. (Mareko 2:17) Nakai tala atu e mautolu ha tuluiaga pauaki ma haau; he mailoga e mautolu kua igatia e tagata mo e fifiliaga ma e malolō tino ni haana.