Ko e Kautu Kia he Atua he Loto Haau?
Ko e tali he Tohi Tapu
Nakai, ko e Kautu he Atua kua nakai ko e tuaga noa ni i loto he tau loto he tau Kerisiano.a Fakakite mai he Tohi Tapu e tokaaga mooli, he fakahigoa e kautu ko e “kautu he lagi.” (Mataio 4:17) Manamanatu ke he puhala ne fakakite he Tohi Tapu ko e fakatufono mooli anei kua pule mai he lagi.
Ko e Kautu he Atua ne fai takitaki, tau tagata, tau matafakatufono mo e tonuhia ke eke po ke fakatū e finagalo he Atua i luga he lagi mo e ke he lalolagi.—Mataio 6:10; Fakakiteaga 5:10.
Ko e fakatufono po ke Kautu he Atua ka pule ke he “tau motu oti, mo e tau kautu, mo e tau vagahau kehekehe” he lalolagi. (Tanielu 7:13, 14) Ko e fakaatāaga ke pule kua moua mai ni he Atua ka e nakai mai he tau tagata.—Salamo 2:4-6; Isaia 9:7.
Tala age a Iesu ke he tau aposetolo fakamooli haana to fakalataha a lautolu mo ia ke he Kautu he lagi ke “nonofo foki ke he tau nofoaiki.”—Luka 22:28, 30.
To moumou he Kautu e tau fī haana.—Salamo 2:1, 2, 8, 9; 110:1, 2; 1 Korinito 15:25, 26.
Ne nakai fakaako he Tohi Tapu ko e tokaaga he Kautu he lagi ha i loto haau ke pehē kua pule mai he loto he tagata. Ka e fakakite mai ko e “kupu he kautu” po ke “tala mitaki nai he kautu” kua maeke mo e lata ke omoomoi e tau loto ha tautolu.—Mataio 13:19; 24:14.
Ko e heigoa e kakano he “ha ha i ai ia mutolu e kautu he Atua?”
Ko e falu tagata ne nakai maama mitaki e tokaaga he Kautu ha ko e puhala ne fakamaama he falu e tau kupu ha Iesu ia Luka 17:21. Ma e fakatai, falu ne pehē kua hagaao e tau kupu nei ha Iesu ke he Kautu he Atua ne ha ha he tau loto he tau tagata. Ke hako e maamaaga ke he kupu nei, lata a tautolu ke totou ke iloa mitaki e tala.
Ko e Kautu he Atua kua nakai toka he tau loto ha lautolu ne totoko mo e kelipopo a Iesu
Ne tutala a Iesu ke he tau Farasaio, ko e matakau he tau takitaki lotu ne totoko mo e fai vala he pulega ke tamate a ia. (Mataio 12:14; Luka 17:20) Ti lata kia ke manatu ko e Kautu ko e tuaga he tau loto kelea he tau tagata nei? Tala age a Iesu ki a lautolu: “Ko loto kua puke a mutolu ke he pikopiko mo e mahani kelea.”—Mataio 23:27, 28.
Ko e Kautu he lagi ne “ha ha i ai” mo e tau Farasaio, kua kakano ko Iesu ne fifili pauaki he Atua ke eke mo Patuiki kua tu atu fakalataha mo lautolu.—Luka 1:32, 33.
a Loga e lotu Kerisiano ne fakaako ko e Kautu he Atua kua ha ha he tagata po ke tuaga he loto he tagata. Ma e fakatai, i Amerika, ko e Southern Baptist Convention ne talahau ko e Kautu he Atua ko e vala he “pule he Atua ha he loto mo e moui he tagata.” Kua tatai mo e tohi Jesus of Nazareth he Pope Bendict XVI ne pehē “to hoko mai e Kautu he Atua ke he loto ha ko e fanogonogo ti talia ai.”