Hūhū he Tau Tagata Totou ha Tautolu

Kua Ha Ha Kia e Kautu he Atua he Loto Haau?

Tokologa he vahā nei kua talitonu ko e tali ke he hūhū na i luga ko e ē. Ke fakatai ki ai, ne talahau he The Catholic Encyclopedia: “Ko e kakano he kautu he Atua, . . . ko e pule he Atua ne ha ha he tau loto ha tautolu.” Ko e manatu nei kua fa fakaako tumau he tau akoako. Ti fakaako mooli kia he Tohi Tapu kua haia e Kautu he Atua i loto he tau tagata?

Ne piko falu ko Iesu ne fakaohooho fakamua e manatu nei kua haia e Kautu he Atua i loto he tau tagata. Ne talahau mooli e Iesu: “Kitiala, ha ha i ai ia mutolu e kautu he Atua.” (Luka 17:21) Ne pehē falu fakaliliuaga: “Ko e kautu he Atua kua haia i loto ha mutolu” po ke “toka i loto ha mutolu.” Kua hakotika kia e fakaliliu he talahauaga ia ha Iesu? Pehē mooli kia a ia kua moua e Kautu he Atua he tau loto he tau tagata?

Fakamua, kia manamanatu ko e heigoa e loto he tagata. He hagaao ki ai i loto he Tohi Tapu, ko e kakano he loto ko e fatuakiloto, ko e punaaga he tau manatu, tau mahani, mo e tau logonaaga he tagata. Ko e manatu kua haia e Kautu lilifu ue atu he Atua i loto he tagata—ke fakatai ki ai, ke he puhala ka hiki po ke fakaheke e tau tagata—kua liga fiafia he logona, ka e fai fakavēaga kia e fakaakoaga pihia?

Ne talamai he Tohi Tapu ki a tautolu: “Kua mua ke he tau mena oti e loto he fakavai, ti gagao lahi ni a ia.” (Ieremia 17:9) Ti pehē a Iesu: “Kua hake mai loto he tagata, ko e tau manatu kelea, ko e faivao, ko e feuaki, ko e keli tagata, ko e kaiha, ko e velevelemena, ko e mahani kelea.” (Mareko 7:20-22) Manamanatu la: Kua nakai kia kamata e fakaatukehe lahi ne kitia e tautolu he lalolagi he vahā nei mai he tau loto agahala he tau tagata? Ti maeke fēfē he Kautu mitaki katoatoa he Atua ke hau he punaaga pihia? Ko e mooli, ko e loto he tagata kua nakai maeke ke fakatupu mai e Kautu he Atua ke tuga e mati ne nakai fua mai he akau mahukihuki.—Mataio 7:16.

Ke uaaki, manamanatu ke he toloaga ne tutala a Iesu ki ai he magaaho ne vagahau e ia e tau kupu ia Luka 17:21. Ne pehē e kupu fakamua: “Kua hūhu mai kia ia e tau farasaio, Po ke hoko mai a fe e kautu he Atua? Ti tali age a ia kia lautolu.” (Luka 17:20) Ko e tau Farasaio ko e tau fī ha Iesu. Ne talahau e Iesu ko e tau tagata fakatupua ia to nakai huhū atu ke he Kautu he Atua. (Mataio 23:13) Ti, kaeke kua nakai lata e tau Farasaio ke huhū atu ke he Kautu he Atua, kua haia nakai e Kautu he tau loto ha lautolu? Nakai pihia! Ka ko e heigoa e kakano ha Iesu?

He fakaliliu e tau kupu ia ha Iesu, ne fakaaoga he tau fakaliliuaga uliulitonu loga he Tohi Tapu e tau kupu ne teitei tatai ke he tau kupu i loto he Ko e Tohi Tapu. Ne pehē falu ko e Kautu “he vahāloto ha mutolu” po ke “ha ha mo mutolu.” Ti ko e puhala fe ne haia e Kautu he Atua he vahāloto he tau tagata he magaaho ia, putoia ai e tau Farasaio? Ha ko Iesu e tagata ne kotofa e Iehova ko e Atua ke eke mo Patuiki he Kautu. Ti ko e Patuiki-Fifili, ko Iesu kua haia mo e tau tagata ia. Ne fakaako e ia hagaao ke he Kautu he Atua mo e taute foki e tau mana, he foaki ki a lautolu e fakakiteaga ke he tau mena ka maeke he Kautu ke taute. Ke he kakano mooli, mogoia, kua ha ha ai e Kautu mo lautolu.

Maaliali ai, kua nakai lalago he tau Tohiaga Tapu e manatu kua haia e Kautu he Atua i loto he tau tagata. Ka ko e fakatufono mooli a ia ka tamai e tau hikihikiaga ofoofogia ke he lalolagi, tuga ne talahau tuai he tau perofeta.—Isaia 9:6, 7; Tanielu 2:44.