Lauia Fēfē a Koe he Tau Lanu?
He onoono viko a koe, kua gahua e tau mata haau mo e uho niu ke moua e vala tala. Kitia e koe e fua lakau ti fifili ke kai ai po ke nakai. Onoono a koe ke he lagi ti mailoga ai to nakai tō e uha he aho nei. Kitia e koe e tau kupu kua totou a koe ki ai mogonei, ti lali ke maama ai. Kua lauia mooli a koe ha ko e tau lanu. Pihia nakai?
Ko e lanu he fua lakau ne kitia e koe kua lagomatai a koe ke fifili kua momoho nakai mo e mitaki. Ko e lanu he lagi mo e tau aolū kua lagomatai a koe ke iloa e tuaga he matagi. He totou a koe ke he tau kupu he vala tala nei, kua hagahaga mitaki ke he tau mata haau ha kua kehe e lanu he tau matatohi mo e laupepa. E, liga nakai mailoga e koe, ka kua fakaaoga tumau e koe e tau lanu ke lagomatai a koe ke iloa e vala tala hagaao ke he lalolagi ne takatakai ia koe. Ka e lauia foki e tau logonaaga ha tautolu ha ko e tau lanu.
LAUIA E MANAMANATUAGA HA KO E TAU LANU
He fano a koe he tau kaava he fale koloa, kua viko takai ia koe loga e tau koloa lanu kehekehe ne talaga ke futia e mata haau ki ai. He mailoga e koe po ke nakai, na fifili fakamitaki he tau tagata fakafua koloa e tau lanu mo e tau lanu ne mē ke fakaohooho e tau manako haau, fuluola ke he tagata taane po ke fifine, mo e ke he tau atuhau haau. Ne iloa foki he tau tagata fakamanaia fale, tau tagata taute mena tui, mo e tau tagata vali fakatino kua maeke e tau lanu ke fakaohooho e tau logonaaga.
Kua kehekehe e tau puhala ne liga mailoga he tau tagata e tau lanu ha ko e aga fakamotu. Ma e fakatai, ne fakamatutaki he tau tagata Asia e kula ke he monuina mo e fiafia, ka e he falu matakavi i Aferika ko e kula ko e lanu fakatutuku. Pete kua kehekehe e feakiaga he tau tagata, kua tatai e tau logonaaga ha lautolu ke he falu lanu. O mai la ke onoono ke he tolu e lanu mo e puhala kua lauia ai a koe.
Ko e KULA ko e lanu mukamuka lahi ke kitia. Kua fa fakamatutaki e kula mo e tau malolō, felakutaki, mo e hagahaga kelea. Ko e kula kua lauia lahi e logonaaga ti maeke ke fakaohooho e gahuahuaaga he tino he tagata, fakamafiti e fafagu, mo e hake e toto.
I loto he Tohi Tapu ko e kupu Heperu ma e “kula” ne moua mai he kupu ne kakano “toto.” Ne fakaaoga he Tohi Tapu e kula ke fakakite aki e fakatino maaliali he fifine fakataka favale muitui ne tapulu ke he ie uhi mo e kula “kua nofo ki luga he manu favale kula, kua puke ke he tau higoa amuamu.”—Fakakiteaga 17:1-6.
Ko e LANU LAUKOU kua fakatupu e logonaaga kehe mamao mai he lanu kula, kua fakaeto ai e gahuahuaaga he tino he tagata mo e moua e fakatotoka. Ko e lanu laukou ko e lanu milino ti fa matutaki mo e mafola. Logona e tautolu e fakatotoka ka kitia e tau fonua mo e tau kaukau mouga lanu laukou. Talahau he tala ia Kenese ke he tufugatiaaga ne pehē kua tuku mai he Atua e motietie lanu laukou mo e tau akau lau mukamuka ma e tau tagata.—Kenese 1:11, 12, 30.
Ko e HINA kua fa matutaki mo e maama, haohao mitaki, mo e meā. Matutaki foki mo e tau aga mitaki, nakai fai kelea, mo e tavana. Ko e hina po ke tea e lanu ne fa totoku he Tohi Tapu. He tau fakakiteaga, kua kitia e tau tagata mo e tau agelu tapulu hina, kua ha ha ai e tututonu mo e meā fakaagaaga. (Ioane 20:12; Fakakiteaga 3:4; 7:9, 13, 14) Ko e tau nua hina mo lautolu e tau tagata heke nua kua tapulu ai ke he tau tapulu ie hina mo e meā ko e fakamailoga he tauaga tututonu. (Fakakiteaga 19:14) Fakaaoga he Atua e hina ke fakakite kua makai a ia ke fakamagalo e tau agahala: “Pete he tuga e ie kula ha mutolu a tau hala, to hina ia po ke kiona.”—Isaia 1:18.
LANU KO E PUHALA KE MANATU
Ko e puhala ne fakaaoga he Tohi Tapu e tau lanu kua fakakite na maama he Atua e tau logonaaga he tagata ke he tau lanu. Ma e fakatai, ko e tohi ha Fakakiteaga i loto he Tohi Tapu kua talahau tuai e tau mena kua tutupu mogonei, putoia e felakutaki, hoge, mo e mamate e tau tagata he gahoa e tau mena kai mo e tatalu. Ke lagomatai a tautolu ke manatu ai, kua fakakite he fakakiteaga ofoofogia ki a tautolu e tau tagata ne heke he tau nua—nakai ko e tau nua fa mahani noa ni ka kua fakavahega ai ke he tau lanu.
Fakamua, ko e nua hina, kua fakamailoga e tauaga tututonu ha Keriso Iesu. Mui mai, kitia e tautolu e nua kula, kua fakamailoga e felakutaki he tau motu. Mui mai he nua nei ko e nua uli mo e matakutakuina, kua fakatai e hoge. Ti kitia ai e tautolu e “solofanua kula tea, ko e higoa foki hana kua heke ai ko e Mate.” (Fakakiteaga 6:1-8) Maeke e lanu he tau nua takitaha ia ke fakalagalaga ia tautolu e logonaaga kua felauaki mo e fakamailoga he nua. Mukamuka ma tautolu ke manatu e tau nua lanu kehekehe nei mo e fakaakoaga ne moua mai e tautolu hagaao ke he vahā ha tautolu.
Loga e fakataiaga he Tohi Tapu ne fakaaoga e tau lanu kehekehe ke fakamaama e tala. E, ko e Tufuga he maama, lanu, mo e mata he tagata kua fakaaoga fakapulotu e lanu mo puhala ke fakaako, he fakamaama e tau fakataiaga ke iloa mo e manatu he tau tagata totou. Lagomatai he tau lanu a tautolu ke kitia mo e iloa e tau vala tala. Kua lauia e tau logonaaga ha tautolu he tau lanu. Maeke e tau lanu ke lagomatai a tautolu ke manatu e tau matakupu aoga. Ko e tau lanu ko e mena fakaalofa ofania mai he Tufuga ha tautolu ke lagomatai a tautolu ke fiafia e moui.