Ha Tautolu a Fekafekauaga—Ko e Fakakiteaga he Fakaalofa Moli
1 He ha tautolu a fekafekauaga kua fakatata e tautolu e omaoma ha tautolu ke he ua e poakiaga lalahi. (Mata. 22:37-39) Kua omoomoi a tautolu he ha tautolu a fakaalofa ki a Iehova ke vagahau fakamitaki hagaao ki a ia. Kua omoomoi a tautolu he fakaalofa ha tautolu ke he tau katofia ke fakamalolo a lautolu ke kumi e iloilo he finagalo mo e amaamanakiaga he Atua, ti tuga a tautolu, ke fakaalofa foki a lautolu ki a Iehova ke moua e lautolu e palepale he moui tukulagi. Ti, ke he fekafekauaga ha tautolu kua fakatokoluga e tautolu e higoa a Iehova mo e fakalataha ke he amaamanakiaga uho he Kautu mo e tau katofia ha tautolu. E, ko e fekafekau ha tautolu ko e fakakiteaga he fakaalofa moli ke he Atua mo e tagata.
2 Kua omoomoi he fakaalofa ha tautolu a tautolu ke tutala ke he tau tagata kehekehe, he tau tuaga kehekehe. (1 Kori. 9:21-23) Ke fakakite: I loto he vakalele, ne nofo e motua Kerisiano he tapa he akoako Katolika Roma. Ne tutala e motua ke he akoako he huhu falu huhu fakataki mo e fakatonu atu ke he fakatutalaaga ke he Kautu. He magaaho ne hau e akoako ki fafo he vakalele, ne talia e ia ua e tohi ha tautolu. Ko e fua mitaki ha ia ma e fakakiteaga he fakaalofa moli he motua ke he hana katofia!
3 Omoomoi he Fakaalofa Moli a Tautolu ke Fakamatala: Ko lautolu ne fakalataha ke he gahua paionia fakaku mo e tumau kua fakakite moli e fakaalofa moli ke he Atua mo e katofia. Kua foaki tumau he tau paionia e tau magaaho mo e tau malolo ha lautolu ke lagomatai fakaagaga e falu. Ko e heigoa kua omoomoi a lautolu ke taute e mena nei? Taha e paionia ne pehe: “Iloa e au ko e fakaalofa ko e fua he agaga he Atua. Ka nakai fai, to nakai ko au he kupu moli, to nakai kautu foki au ko e paionia. Taute he fakaalofa au ke manamanatu ke he tau tagata, mataala ke he tau manako ha lautolu, ti fakaaue au he talia he tau tagata e fakaalofa.” Fakatata e Iesu e fakaalofa pihia ma e tau tagata. Lagataha ne o atu a ia mo e tau tutaki mategugu hana ke he taha mena ke “okioki fakatote,” ka e hoko mua atu e moto tagata ia lautolu. Ko e heigoa ne taute e Iesu? “Ti hohofi hana fakaalofa kia lautolu,” ne tuku e ia e manako fakatagata hana ke he mafoa ke maeke “ke fakaako a lautolu ke he tau mena loga.”—Mareko 6:30-34.
4 Ka fakaheu foki he tau tagata e tala mitaki kua foaki e tautolu, kua fiafia a tautolu i loto, he iloa kua omoi he fakaalofa, ke taute e tautolu e mena kua mua atu e mitaki ke lagomatai a lautolu ke moua e moui. Ti ka fakafili he Keriso a tautolu oti, to fiafia lahi a tautolu kua fakatata e tautolu e fakaalofa moli he ‘fakakatoatoa ni ha tautolu a feua.’—2 Timo. 4:5.