“Kia Au Atu” ke Fakalataha ke he Tau Feleveiaaga
1 Ke feleveia auloa ko e mena aoga mau ma e tau tagata ha Iehova. Kua ha ha he tau Isaraela e faituga mo e ha lautolu a tau sunako ko e tau matapatu fale ma e tapuaki moli, fakaakoaga faka-Atua, mo e feoaki fiafia. Kua nakai tiaki foki he tau Kerisiano fakamua ke fakapotopoto auloa. He kua tolomaki e tau pehiaga mo e tau matematekelea he tau aho fakahiku uka nei, kua lata foki a tautolu mo e fakamalolo fakaagaga ne foaki mai he ha tautolu a tau feleveiaaga he fakapotopotoaga—ati “au atu” ai e lata mo tautolu. (Hepe. 10:25) Kia mailoga tolu e kakano ne kua lata ia tautolu ke fakalataha ke he tau feleveiaaga.
2 Ma e Feoakiaga: Kua fakamafana mai he tau kupu Tohi Tapu a tautolu ke “fetomaaki a mutolu, mo e fefakamafanaaki a mutolu.” (1 Tesa. 5:11) Kua fakapuke he feoaki mahani Atua e tau loto ha tautolu aki e tau manatu mitaki mo e omoomoi a tautolu ke taute e tau gahua mitaki. Ka e kaeke ke vevehe kehe a tautolu, kua ligaliga ni a tautolu ke fakafiafia e tau manatu goagoa, fulukovi, mo e kelea foki.—Fakatai 18:1.
3 Ma e Hatakiaga: Kua foaki he tau feleveiaaga Kerisiano e polokalama fakatumau he hatakiaga he Tohi Tapu ne pauaki ke fakamoui tumau aki e fakaalofa he Atua he tau loto ha tautolu. Kua mai ai e tau takitakiaga kua lata ke fakagahuahua “e finagalo oti he Atua.” (Gahua 20:27) Ne fakamahani he tau feleveiaaga a tautolu ke fakamatala mo e fakaako e tala mitaki, tau lotomatala ne au atu e lata he mogonei ke moua e olioli mua ue atu he kumi mo e lagomatai a lautolu ka talia e kupu moli he Tohi Tapu.
4 Ma e Puipuiaga: I loto he lalolagi kelea nei, ko e huaga fakaagaga moli e fakapotopotoaga—ko e huaga he mafola mo e fakaalofa. Ka haia a tautolu he tau feleveiaaga he fakapotopotoaga, kua malolo e fakaohoohoaga he agaga tapu he Atua ki a tautolu, ne fakatupu e tau fua he “fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.” (Kala. 5:22, 23) Kua fakamafana he tau feleveiaaga a tautolu ke tu mauokafua mo e malolo he tua. Ne fakakatoatoa ai a tautolu ke mautauteute ma e tau matematekelea i mua.
5 He o tumau ke he feleveiaaga, kua mailoga tuai e tautolu e mena ne fakamaama mai he salamo, ne fakamau he Salamo 133:1, 3: “Kitiala, ko e mena mitaki lahi mo e fulufuluola, ke nonofo fakalataha e tau matakainaga.” Ke he ha mena ni ne fekafekau mo e feleveia ai e tau tagata he Atua he vaha nei, “kua poaki e Iehova kia hoko ki ai hana a monuina, ko e moui tukulagi ni haia.”