Leveki he Tufuga Homo Ue Atu ha Tautolu a Tautolu!
1 He finagalo hana ke fakakakano mo Isaraela liuliu, ne ole a Iehova: “Nakai kia iloa e koe? Nakai kia logona e koe? Ko e Atua tukulagi, ko Iehova ko ia ne eke e tau motuaga he lalolagi.” (Isa 40:28) Iloa e tautolu e Tufuga Homo Ue Atu ha tautolu, ti kitia e tautolu e levekiaga fakaalofa hana ma tautolu. Pete ia, totou miliona e tau tagata ne fakauaua hana tupu maiaga po ke manatu ki a ia kua nakai tatai ke he mena kua moua he Tohi Tapu. Lagomatai fefe e tautolu a lautolu?
2 Ne talaga e tohi fou Is There a Creator Who Cares About You? ke lagomatai aki e tau tagata pihia. Kua uiina ke he tau tagata lotomatala ke manamanatu ke he tau mena moli. Ko e tala fakalagalaga mo e tau matakupu omoomoi he tohi nei kua lata ke futiaki a lautolu kua totou ai.
3 Kia Mahani mo e Tohi Creator: Kia tokaloto e fakatokaaga aoga he tau mataulu tala. Ko e veveheaga 2 ke he 5 kua talahau e tupu maiaga he lalolagi mo e lagi katoatoa, moui, mo e tagata, mo e tau tutupuaga oti ha lautolu. Ko e veveheaga 6 ke he 9 kua kumikumi ai ke he Tohi Tapu mo e Punaaga ti, mua atu, kua moli nakai e tohi a Kenese ne fakamau ai e tufugatiaaga. Ko e veveheaga 10 kua moua ai e tali makona ke he taha he tau huhu uka kua huhu he tagata: “Ka leveki he Tufuga, ko e ha kua matematekelea koa ai?”
4 Lali ke Fakakakano mo Lautolu kua Fakauaua: Kua fakakite mai he lau 78-9 he tohi Creator e matakupu ke fakaaoga e koe ke lagomatai e falu ke hokotia ke he fakaotiaga hako hagaao ke he Atua. Huhu ki a lautolu: “Fai kamataaga nakai e lalolagi mo e lagi katoatoa?” Tokologa ka tali na fai. Ka pihia, huhu: “Na tupu noa kia e kamataaga ia po ke mena fai tupuaga?” Tokologa ne mailoga ko e mena fai. Kua takitaki e mena nei ke he huhu fakaoti: “Na tupu kia e kamataaga he lalolagi nei ha ko e taha mena tukulagi po ke mai he Taha kua tukulagi?” Ko e talahauaga nei kua takitaki e tokologa ke kitia kua fai Tufuga.
5 Ko e tohi Creator kua lata mo e tau tagata tokologa. Fakaaoga ai ke he hau a tau magafaoa, tau kapitiga gahua, tau kapitiga aoga, mo e falu tagata mahani foki. Uta mo koe he fekafekauaga ke foaki ki a lautolu kua feleveia mo koe kua fakauaua hagaao ke he tupuaga he Atua. Ko e mahani lahi ha tautolu mo e tohi nei, kua fakamalolo lahi e fakaalofa ha tautolu ma e Tufuga ha tautolu, ti omoi a tautolu ke fakatauo fakalataha mo e tau tutuaga tokoluga hana.—Efeso 5:1; Fakakite. 4:11.