Tau Magafaoa Matua Tokotaha Kua Maeke ke Kautu!

1-3. Ko e heigoa ne takitaki ke he fakatupuaga he tokologa he tau magafaoa matua tokotaha, mo e aofia fefe a lautolu ne putoia ai?

KO E tau magafaoa matua tokotaha ne fakahigoa ai ko e “puhala magafaoa ne mafiti lahi e tupu” he Tau Fahi Kaufakalataha. Ko e tuaga kua tatai ni mo e loga he tau motu. Ko e numela ne mua atu e lahi he fakamauaga ko e tau vevehe, tau tiaki, tau mavehevehe, mo e tau fanau noa kua mua atu e tokoluga he tau fua ma e tau miliona he tau matua mo e tau fanau.

² “Ko au ko e fifine takape 28 e tau tau he moui mo e tokoua e fanau,” he tohi he taha matua fifine tokotaha. “Ne kapaletu lahi au ha kua nakai manako au ke feaki e tau fanau mo e nakai fai matua tane. Tuga e pehe kua nakai fai tagata ne tupetupe ki a au. Kua kitia tumau he tau fanau haku au he fa tagi tumau ti aofia foki a lautolu.” Talitua mai he taufetului mo e tau logonaaga vale pihia, hehe, mo e matimati, ko e laulahi he tau matua tokotaha kua feleveia mo e paleko ke gahua i fafo he kaina mo e taute e tau fekau i loto he kaina. Taha ne pehe: “Ha ko e matua tokotaha kua tuga e tagata hapohapo polo. Ka oti e ono mahina he fakaako, ko e hoko laia ke maeke ke hapohapo fa e polo he magaaho taha. Ka e, nakai leva he maeke a koe ke taute e mena ia, to taha e tagata ka liti atu e polo fou ki a koe!”

³ Ko e tau fanau ikiiki he tau magafaoa matua tokotaha kua fa ha ha i ai tumau ni mo lautolu ha lautolu a tau taufetului. Liga kua eke a lautolu ke fakamakamaka mo e tau manatu malolo ha kua galo fakalutukia e matua po ke mate. Ke he tokologa he tau fuata ko e galo kehe he matua kua tuga e ha ha i ai e hufia kelea lahi.

4. Kua iloa fefe e tautolu kua onoono lahi a Iehova ke he tau magafaoa matua tokotaha?

⁴ Ko e tau magafaoa matua tokotaha ne ha ha i ai he tau vaha Tohi Tapu. Ne totoku tafeliuaki he tau Tohiaga Tapu e “tama kua nakai fai matua” mo e “fifine takape.” (Esoto 22:22; Teutaronome 24:19-21; Iopu 31:16-22) Ko e Atua ko Iehova kua nakai fakakehe a ia ke he ha lautolu a maveheaga. Ne fakahigoa he salamo e Atua “ko e matua a ia kia lautolu kua nakai fai matua, ko e fakafili foki a ia ke he tau fifine takape.” (Salamo 68:5) Ko e moli ni, ko e onoonoaga taha ia ni ha Iehova ke he tau magafaoa matua tokotaha he vaha nei! Moli, ko e hana Kupu kua foaki mai e tau matapatu fakaakoaga ne maeke ke lagomatai aki a lautolu ke kautu.

PULOTU LAHI HE FAKAHOLOAGA HE MAGAFAOA

5. Ko e heigoa e tau mena vihi he tau matua tokotaha ka feleveia fakamua?

⁵ Manamanatu la ke he matagahua ko e levekiaga he kaina. “Kua loga e tau magaaho pauaki ne manako a koe ke fai tagata tane ne nofo tata,” he talahau he taha fifine ne tau vevehe, “tuga kaeke ke kamata e motoka hau ke gatata mo e nakai iloa e koe ko e hau he mena fe e leo ia.” Ko e tau tagata tane ne kito tau vevehe po ke ne takape kua tuga e fakahahaku ha ko e loga lahi he tau matagahua he magafaoa ne kua lata ke taute e lautolu mogonei. Ma e tau fanau, ko e tau fekau he kaina ne nakai maopoopo kua lafi ki ai e tau logonaaga fakalolelole mo e nakai haohao mitaki.

6, 7. (a) Ko e heigoa e fakafifitakiaga mitaki ne fakatoka he “fifine mahani mitaki” he Tau Fakatai? (e) Maeke fefe he fakamakutu ke he tau matafekau he kaina ke lagomatai e tau kaina he matua tokotaha?

⁶ Ko e heigoa ne maeke ke lagomatai? Manatu e fifitakiaga ne fakatoka he “fifine mahani mitaki” ne fakamaama he Tau Fakatai 31:10-31. Ko e laulahi he hana tau gahua ne fakakatoatoa kua talahaua mitaki​—fakatau mai, mo e fakafua atu, tuitui, kaitunu, uku tupe ma e kaina, gahua fonua, mo e leveki he pisinisi. Ko e heigoa hana puhala? Kua makutu a ia, gahua mule mo e matike tuai ke kamata hana tau fekau. Mo e ko e fifine maopoopo mitaki a ia, he kotofa he falu matagahua mo e fakaaoga he hana ni a tau lima ke leveki aki e falu. Ko e mena ia ni kia ne kautu e ia e fakaheke!

⁷ Kaeke ko e matua tokotaha a koe, kia fakamakamaka ke he hau a tau kotofaaga he kaina. Kia kumi ke fakamakona he tau gahua pihia, ha kua gahua lahi e mena nei ke lafi atu ke he fiafia he hau a fanau. Ka e taha e mena, kua lata tonu ni ke fai tauteuteaga fakamitaki mo e fai fakatokatokaaga. Kua pehe e Tohi Tapu: “Ko e tau manatu he tagata ne malolo ke gahua kua hiku ia ke he muhu mena.” (Tau Fakatai 21:5) Ne talahau he taha matua tane tokotaha: “Ne mahani au ke nakai manamanatu ke he tau fua kai ato logona e au e hoge.” Ka ko e taute e fakatokatokaaga he tau fua kai kua mahani ke mahomo atu e lolo mo e fulufuluola ke he tau mena kai ne taute fakatepetepe mo e nakai taute fakamitaki. Kua liga lata foki a koe ke fakaako ke fakaaoga hau a tau lima ke he tau puhala fou. Ha ko e kumikumi atu ke he tau kapitiga lotomatala lahi, puhala moua mai he tau tohi, mo e tau lagomataiaga fakapulotu, ko e falu he tau matua fifine tokotaha kua maeke ke taute e gahua vali, palama, mo e tau gahua mukamuka he fakafou peleo afi.

8. Lagomatai fefe he tau fanau he tau matua tokotaha e tau gahua kaina?

⁸ Kua tonu nakai ke ole ke he tau fanau ke lagomatai? Taha e matua fifine tokotaha ne fakamaama: “Kua manako a koe ke taute ke fakalagotatai ke lata mo e taha matua ne galo he fakamukamuka ke he tau fanau.” Liga kua maama mitaki e mena ia ka e liga nakai ko e levekiaga mitaki tumau ma e tama. Ko e tau fuata matakutaku Atua he tau vaha he Tohi Tapu ne kotofa pauaki ke he tau matagahua taute hololoa. (Kenese 37:2; Lologo a Solomona 1:6) Ti, pete ni he fakaeneene a koe ke ua fakamamafa hau a tau fanau, ka kia pulotu a koe ke kotofa a lautolu ke he tau matagahua tuga e fufulu e tau kapiniu mo e fakamea ha lautolu a tau poko. Ko e ha ne nakai gahua fakalataha ai ke he tau matagahua taute hololoa? Kua maeke e mena ia ke olioli lahi mahaki.

KO E PALEKO HE TAUTEAGA HE MOUI

9. Ko e ha e tau matua fifine tokotaha ne feleveia tumau ai mo e tau mena uka ke he tau tupe?

⁹ Ko e laulahi he tau matua tokotaha ne uka lahi ke fakamatuuta ha lautolu a tau manako ke he tupe, mo e ko e tau matua fifine fuata ne nakai faitane kua mahani ke moua e magaaho uka pauaki.a Ko e tau motu ne fakaata e lagomatai he tau tagata, kua liga lata a lautolu ke pulotu ke fakaaoga e tau mena ia, he magaaho ia ato moua e lautolu e tau gahua pauaki. Kua fakaata he Tohi Tapu e tau Kerisiano ke fakaaoga e tau foakiaga pihia kaeke kua lata tonu. (Roma 13:1, 6) Ko e tau takape mo e tau fifine ne tau vevehe to fakafeleveia mo e tau paleko taha ia ni. Tokologa ne fakaohooho ke liliu gahua tupe he mole e tau tau loga he taute gahua kaina, ka e maeke ke moua ni he tau gahua totogi tokolalo. Ko e falu ne maeke ke fakalaulahi ha lautolu a tau puhala moui he fakamau ke huhu he tau fakaholoaga fakaako gahua po ke tau fakaakoaga fakaku ke he aoga.

10. Maeke fefe he matua fifine tokotaha ke fakamaama ke he hana tau fanau ko e ha ne kua lata ai a ia ke kumi gahua tupe?

¹⁰ Aua neke ofo kaeke ke nakai fiafia e fanau hau he magaaho ka kumi gahua ai a koe, mo e ua manamanatu agahala. Ka kia, fakamaama ki a lautolu ko e ha kua lata ai a koe ke gahua, mo e lagomatai a lautolu ke maama kua manako a Iehova ki a koe ke gahua ke leveki aki a lautolu. (1 Timoteo 5:8) To hoko e magaaho, to hiki e laulahi he tau fanau. Ka e taha e mena, lali ke fakaata fakalahi e magaaho mo lautolu ha ko e hau a fakaholoaga lavelave. Ko e onoonoaga fakaalofa pihia kua maeke foki ke lagomatai ke fakatote hifo aki e fepakaki mo e temotemoai he tau tupe ne liga logona he magafaoa.​—Tau Fakatai 15:16, 17.

KO HAI KA LEVEKI A HAI?

11, 12. Ko e heigoa e tau katofiaaga kua lata he tau matua tokotaha ke leveki, mo e taute fefe e lautolu e mena nei?

¹¹ Kua pihia pauaki ni ma e tau matua tokotaha ke mua atu e fakatata ke he tau fanau ha lautolu, ka kua lata ni ke leveki e tau vahaloto kotofa he Atua ma e tau matua mo e tau fanau ke ua malona. Ke fakamaama, kua tupu mai e tau mena uka kelea lahi kaeke ke amaamanaki e matua fifine tokotaha ke uta he hana a tama tane e tau kotofaaga he tagata tane ko e ulu he fale po ke taute hana a tama fifine ke fakafelemu tokoua e tau mena fufu, mo e fakakavega aki e tau mena vihi tutupu mau e tama fifine. Kaeke ke taute pihia kua nakai tuai lata, lahi e fakatupetupe, mo e liga mahalohalo noa ke he tama.

¹² Kia fakamanatu age ke he tau fanau, ko koe, ko e matua, ka leveki a lautolu​—nakai fakahalahiku e fekau. (Fakatatai 2 Korinito 12:14.) Ko e falu a magaaho, kua manako a koe ke he falu a hatakiaga po ke lagomataiaga. Kia kumi mai he tau motua Kerisiano po ke mai foki he tau fifine Kerisiano matua, nakai mai he tau fanau ikiiki hau.​—Tito 2:3.

FAKATUMAU KE HE AKONAKIAGA

13. Ko e heigoa e mena vihi hagaao ke he akonakiaga ka liga feleveia mo e matua fifine tokotaha?

¹³ Ko e tagata tane liga tote e lekua ki a ia ke onoono lahi ko e tagata akonaki tagata, ka ko e fifine kua ha ha ia ia e tau mena vihi ha ko e mena nei. Kua talahau he taha matua fifine tokotaha: “Ko e tau tama tane haku kua tino tuga e tau tagata tane mo e leo foki he tau tagata tane lalahi. Ko e falu a magaaho kua uka ke fakatatai ko e fakahalahu po ke fakalolelole e leo.” Kua mua atu foki, liga ko e maanu agaia a koe ha ko e mate he hau a hoa fakahelehele, po ke liga logona e koe e agahala po ke ita ha kua mavehevehe e fakamauaga. Kaeke ke fetogiaki e levekiaga he tau fanau, to liga matakutaku a koe neke manako ni e tama hau ke nofo mo e hoa fakamua hau. Ko e tau vahega mena pihia ne uka lahi ke takitaki e akonakiaga lagotatai.

14. Maeke fefe e tau matua tokotaha ke tumau e lagotatai he manatu ke he akonakiaga?

¹⁴ Kua pehe e Tohi Tapu “ko e tama tane kua toka noa kua fakamā ai e ia hana matua fifine.” (Tau Fakatai 29:15) Kua ha ha i ai mo koe e omoiaga a Iehova ko e Atua ke taute mo e fakamalolo e tau fakatufono he magafaoa, ti aua neke kaumahala ke he agahala, hukia, po ke matakutaku. (Tau Fakatai 1:8) Aua neke fakakehekehe e tau matapatu fakaakoaga he Tohi Tapu. (Tau Fakatai 13:24) Lali ke lotomatala, tatai, mo e mauokafua. To hoko ke he taha magaaho, to fanogonogo e laulahi he tau fanau. Ka e tumau agaia, to manako a koe ke manamanatu ke he tau logonaaga he tau fanau hau. Kua talahau he taha matua tane tokotaha: “Ko e akonakiaga haku kua taute fakaeneene mo e maamaaga ha ko e ha lautolu a ofomate he galo kehe ha lautolu a matua fifine. Kua tutala tumau au ki a lautolu he tau magaaho oti. Kua ha ha ia mautolu e tau ‘magaaho fefakamafanaaki’ ka tauteute he kai afiafi. Ko e magaaho haia ne fa falanaki lahi a lautolu ki a au.”

15. Ko e heigoa kua lata he matua ne vevehe ke tiaki he magaaho ka tutala ai ke he hoa fakamua?

¹⁵ Kaeke kua vevehe a koe, kua nakai fai mena mitaki ka moua he moumou e fakalilifu ma e hau a hoa fakamua. Ko e taufetoko he tau matua kua fakamamahi ke he tau fanau mo e fakahiku ke fakalolelole ha lautolu a fakalilifu ki a mua tokoua. Ko e mena ia, kia tiaki e talahau e tau mena fakahukia tuga e: “Kua tutaki na koe ke he matua tane hau!” Ko e heigoa ni ha mena mamahi ne liga taute he hoa fakamua hau kia koe, ko ia tane po ke fifine ko e matua agaia he tama hau, ne manako ke he fakaalofa, fakateliga, mo e akonakiaga he tau matua ne ua.b

16. Ko e heigoa e tau fakatokatokaaga fakaagaga kua lata ke eke mo vala taute tumau he kaina he matua tokotaha?

¹⁶ Tuga ne fakatutala he tau veveheaga kua mole, ko e akonakiaga kua putoia ai e fakaakoaga mo e takitakiaga, nakai ko e fakahala ni hokoia. Kua loga e tau mena vihi ne maeke ke fuluhi kehe he fakaholoaga mitaki he fakaakoaga fakaagaga. (Filipi 3:16) Ko e o tumau he tau feleveiaaga Kerisiano kua lata tonu. (Heperu 10:24, 25) Ti pihia ni mo e taute e fakaakoaga Tohi Tapu fakafahi tapu he magafaoa. Moli, kua nakai mukamuka ke fakaholo tumau e fakaakoaga pihia. “Ka oti e gahua he aho, kua manako lahi a koe ke okioki,” he talahau he taha matua fifine manatu mitaki. “Ka e tauteute e au au mo e manatu ke aoga mo e haku a tama fifine, ha kua iloa ko e taha mena kua lata ni ke taute. Kua olioli lahi a ia ke he ha maua a fakaakoaga magafaoa!”

17. Ko e heigoa ha tautolu ne ako mai he feakiaga mitaki he kapitiga ha Paulo ko Timoteo?

¹⁷ Ko e kapitiga he aposetolo ko Paulo ko Timoteo ne moua moli hana fakaakoaga ke he tau matapatu fakaakoaga he Tohi Tapu mai he hana matua fifine mo e hana matua fifine tupuna​—ka e nakai mai he hana matua tane. Pete ia, kua eke a Timoteo mo Kerisiano mitaki lahi! (Gahua 16:1, 2; 2 Timoteo 1:5; 3:14, 15) Kua maeke foki a koe ke amaamanaki pihia ma e tau fua talahaua ha kua fakamakamaka a koe ke feaki hau a fanau “ke he tau kupu akonaki mo e tau kupu fakamafana he Iki.”​—Efeso 6:4.

KAUTU HE TAU ATU KE HE MATIMATI

18, 19. (a) Maeke fefe he matimati ke fakakite e ia a ia ma e matua tokotaha? (e) Ko e heigoa e fakatonuaga ne mai ke lagomatai ke puipui aki e tau manako he tino?

¹⁸ Taha e matua tokotaha ne oi: “Ko e magaaho ka hau ai au ki kaina mo e ono ke he tau kaupa ne fa, mo e mua atu ni kaeke kua fita e tau fanau he momohe, kua hoko mai moli ki a au e matimati.” E, ko e matimati ko e mena fa vihi lahi mahaki ne feleveia mo e matua tokotaha. Kua pihia tuai ni, ke amaamanaki ke he fakafehagaiaga mafana mo e mahaniaga he fakamauaga. Ka kua lata nakai he tagata ke lali ke tali fakahanoa ke he mena vihi nei? He vaha he aposetolo ko Paulo, kua fakaata he falu tamafine takape “ha lautolu a manako ke he mahani fakatane mo e fifine ke hau he vahaloto ha lautolu mo e Keriso.” (1 Timoteo 5:11, 12) Ko e fakaata e tau manako he tino ke ufiufi e tau fiafia fakaagaga to hagahaga kelea.​—1 Timoteo 5:6.

¹⁹ Ne pehe e tagata tane Kerisiano: “Ko e fakaohooho ke he mahani fakatane mo e fifine kua malolo lahi, ka e maeke ia koe ke taofi a lautolu. Ka hau e manatu ke he loto hau, ti ua nofo a koe he manatu ia. Kia uta kehe fakaave. Kua lagomatai foki e mena nei ke manamanatu a koe ke he tama hau.” Kua fakatonu mai he Kupu he Atua: ‘Kia tamate e mutolu ha mutolu a tau fahi tino, ko e manako kelea.’ (Kolose 3:5) Kaeke ke lali a koe ke tamate hau a manako ke he tau mena kai, to totou nakai e koe e tau mekasini ne hagaao ke he tau fakatino he tau mena kai lolo, po ke lafi nakai a koe mo e tau tagata ne tala tumau ke he tau mena kai? Kua nakai pihia! Kua tatai ni e moli hagaao ke he tau manako he tino.

20. (a) Ko e heigoa e matematekelea ne fakatalitali mai ki a lautolu ne fakakapitiga mo lautolu ne nakai talitonu? (e) Kua maeke fefe he tau tagata tokotaha he senetenari fakamua mo e vaha nei ke tau ke he matimati?

²⁰ Ko e falu he tau Kerisiano ne hoko ke fakakapitiga mo e tau tagata nakai talitonu. (1 Korinito 7:39) Ka e fakamakona nakai ha lautolu a mena vihi? Nakai. Ne fakailoa mai he fifine Kerisiano ne tau vevehe: “Kua ha ha i ai taha e mena ne mahomo atu e kelea ke he nofo tokotaha. Ko e mau mo e tagata hepe!” Ne nakai fai fakauaua kua moua he tau takape Kerisiano he senetenari fakamua e fakauka leva ke he matimati, ka ko lautolu ne pulotu ne lavelave tumau he ‘fakafiafia he tau tagata kehe, mo e holoholo he tau hui he tau tagata tapu, mo e fakaalofa ki a lautolu ne matematekelea.’ (1 Timoteo 5:10) Ko e tau Kerisiano tua he vaha nei ne fakatalitali ke he loga he tau tau ke moua e hoa matakutaku Atua ne lavelave pihia ni. Ko e takape fifine Kerisiano 68 e tau tau ne kamata ke fakafeleveia atu ke he falu takape ka logona e ia e matimati. Ne pehe a ia: “Kua kitia e au he taute e tau fakafeleveia pehe nei, mo e taute haku a tau gahua he kaina mo e leveki he haku a tau mena fakaagaga kua nakai fai magaaho au ne logona e matimati.” Ko e fakaako he falu hagaao ke he Kautu he Atua ko e gahua aoga pauaki mo e mitaki.​—Mataio 28:19, 20.

21. Ko e puhala fe kua maeke he liogi mo e feoaki mitaki ke lagomatai ke fakakaumahala e matimati?

²¹ Ke talahau kua nakai fai mena ke tului fakamafiti aki e matimati. Ka e maeke ke fakauka mo e fakamalolo mai ia Iehova. Ko e fakamaloloaga pihia to moua he Kerisiano ka “tumau ke he tau ole mo e tau liogi ke he po katoa mo e aho.” (1 Timoteo 5:5) Ko e tau ole ko e tutala fakamakamaka, e, ko e olelalo ma e lagomatai, liga ne taute mo e tagi mo e tau hihina mata. (Fakatatai Heperu 5:7.) Ko e liligi atu he loto ki a Iehova ke he “po katoa mo e aho” kua maeke ke lagomatai moli. Ko e falu mena foki, ko e feoaki fakamalolo kua maeke ke gahua fakalahi ke fakapuke aki e takoko he matimati. Puhala mai he feoaki mitaki, ka moua he tagata “e kupu mitaki” he fakamaloloaga ne fakamaama mai he Tau Fakatai 12:25.

22. Ko e heigoa e tau manatu ka lagomatai he magaaho ka mafuta hake e tau logonaaga he matimati he falu a magaaho?

²² Kaeke ke mafuta hake e tau logonaaga he matimati he falu a magaaho​—na fa mahani ke pihia​—manatu na ai fai tagata ne ataina mai he tau mena vihi he moui. Moli lahi, ko e “tau matakainaga ha mutolu ha he lalolagi” kua mamahi ai he tau mena kehekehe. (1 Peteru 5:9) Kia tiaki e nofo he vaha tuai. (Fakamatalaaga 7:10) Liu ke totou e tau mena mitaki ne olioli a koe ki ai. I luga he tau mena oti ia, kia fakamalolo ke taofi e mahani hakohako mo e fakafiafia e loto a Iehova.​—Tau Fakatai 27:11.

MAEKE FEFE E FALU KE LAGOMATAI

23. Ko e heigoa e kotofaaga ne ha ha he tau matakainaga Kerisiano ke he tau matua tokotaha he fakapotopotoaga?

²³ Ko e lagomatai he tau matakainaga Kerisiano kua nakai fai totogi. Kua pehe e Iakopo 1:27: “Ko e hanai e oma ke he Atua kua mitaki mo e fakamoli ki mua he Atua e Matua, ke ahi e tau tagata kua mamate e tau matua, mo e tau fifine takape ke he ha lautolu a matematekelea.” E, kua fakamau e tau Kerisiano ke lagomatai e tau magafaoa matua tokotaha. Ko e heigoa falu he tau puhala fakatino ke taute aki e tau mena nei?

24. Ko e tau puhala fe ke lagomatai e tau magafaoa matua tokotaha ka manako lagomatai?

²⁴ Kua lata ke age e lagomatai ke he tau mena he tino. Kua pehe e Tohi Tapu: “Ko e tagata kua toka ki ai e koloa he lalolagi, kua kitekite foki e ia ke he matakainaga hana kua nofogati ka e pa atu hana loto kia ia, kua nofo fefe e fakalofa ke he Atua ke he loto hana?” (1 Ioane 3:17) Ko e kupu Heleni tuai ma e “kitekite” ko e kakano, nakai ko e fakahela noa, ka ko e fakapupula. Kua fakakite mai he mena nei ko e Kerisiano totonu kua liga fakamahani fakamua mo e tau tutuaga mo e tau manako he magafaoa. Neke manako a lautolu ke he tau tupe. Ko e falu ne manako ke lagomatai he tau mena ke fakafou he fale. Po ke liga fakaaue noa ha kua uiina mai ke kai po ke lafiaga fiafia.

25. Fakakite atu fefe he tau matakainaga Kerisiano e fakaalofa hofihofi noa ke he tau matua tokotaha?

²⁵ He lafi ai, pehe he 1 Peteru 3:8: “Kia loto fakalataha a mutolu oti, kia feofanaki, kia fakaalofa ke he tau matakainaga, kia hofihofi noa e fakaalofa.” Ne talahau he taha matua tokotaha mo e toko ono e fanau: “Kua uka lahi, mo e falu a magaaho ne logona e au e mapehi hifo. Ka e taha e mena, he falu a magaaho, ko e taha he tau matakainaga tane po ke tau matakainaga fifine ka pehe mai ki a au: ‘Joan, mitaki e gahua hau ne taute. To fai aoga he fakaotiaga.’ Kua mitaki ke iloa kua manamanatu foki e falu ki a koe mo e ko e ha lautolu a fakaalofa kua aoga lahi.” Ko e tau fifine Kerisiano momotua kua mua atu he mitaki ke lagomatai e tau fifine fuata ko lautolu e tau matua tokotaha, ke fanogonogo ki a lautolu ka moua a lautolu he tau mena vihi ne nakai lata ki a lautolu ke fakatutala mo e tagata tane.

26. Lagomatai fefe he tau tagata tane Kerisiano momotua e tau fanau nakai fai matua?

²⁶ Kua maeke foki e tau tagata tane Kerisiano ke lagomatai he falu a puhala. Ne pehe e tagata tututonu ko Iopu: “Ha ko e mena laveaki e au . . . [a] ia kua nakai fai matua, katoa foki mo ia kua nakai fai lagomatai.” (Iopu 29:12) Ko e falu he tau tagata tane Kerisiano he vaha nei ne katoatoa pihia e fiafia ke he tau fanau nakai fai matua mo e fakakite fakamakutu e “fakaalofa mai he loto mea,” mo e nakai fai manatu ke he magaaho fakamui. (1 Timoteo 1:5) Ka e nakai tiaki ha lautolu a tau magafaoa, kua fakatoka e lautolu ke gahua fakalataha mo e tau fanau fuata pihia he fekafekauaga Kerisiano he falu a magaaho mo e uiina foki a lautolu ke fakalataha he fakaakoaga magafaoa po ke fakafiafia tino. Kua maeke he totonu lahi pihia ke laveaki fakamitaki mai e tama nakai fai matua mai he fakaakoaga faliuliu.

27. Ko e heigoa e lagomataiaga kua lata he tau matua tokotaha ke iloa moli ai?

²⁷ Ko e fakahikuaga, moli, ko e tau matua tokotaha kua lata ke ‘fua ha lautolu ni a kavega’ he kotofaaga. (Kalatia 6:5) Pete ni he pihia, ka to moua foki e lautolu e fakaalofa he tau matakainaga tane mo e fifine Kerisiano mo ia ko e Atua ko Iehova. Kua talahau he Tohi Tapu ki a ia: “Kua lagaki e ia e tagata nakai fai matua katoa mo e fifine takape.” (Salamo 146:9) Fakalataha mo e Hana takitakiaga fakaalofa, kua maeke he tau magafaoa matua tokotaha ke kautu!