Kia Nakai Fakagalo e Kakano he Tokanoaaga ne Foaki he Atua
“Ko e mena ha i ai e Agaga he Iki ha ha i ai e tokanoaaga.”—2 KORINITO 3:17.
1. Ko e ha ne hagaao ai e Isaia 65:13, 14 ke he Tau Fakamoli a Iehova?
KO IEHOVA ko e Atua he tokanoaaga. Lahi e fakamonuina ke he tokanoaaga ne foaki mai he Atua! Ha kua ha ha he tau fekafekau tukulele hana e tokanoaaga nei, ko e tau kupu nei he Iki ko e Pule Katoatoa ko Iehova kua hagaao ia ki a lautolu: “Kitiala, to kai mena haku a tau fekafekau, ka ko mutolu to hoge a mutolu; kitiala, to inu haku a tau fekafekau, ka ko mutolu to fia inu ni a mutolu; kitiala, to fiafia haku a tau fekafekau, ka ko mutolu to mā ni a mutolu; Kitiala, to kalaga haku a tau fekafekau ha ko e loto fiafia, ka ko mutolu to tagi ni a mutolu he mamahi e tau loto, mo e tagi fekapai a mutolu he malipilipi ai e tau loto.”—Isaia 65:13, 14.
2. Ko e ha e tau tagata a Iehova ne monuina ai fakaagaga?
2 Ne olioli e tau tagata he Atua ke he monuina fakaagaga nei ha kua takitaki he hana a agaga, po ke malolo. Ne pehe e aposetolo ko Paulo: “Ko e Iki foki, ko e Agaga haia; ko e mena ha i ai e Agaga he Iki ha ha i ai e tokanoaaga.” (2 Korinito 3:17) Ko e heigoa e kakano he tokanoaaga ne foaki he Atua? Ko e heigoa kua lata ia tautolu ke fakaaoga katoatoa e mena nei?
Ko e Tokanoaga ne Ha Ha he Atua
3. Ko e vahega tokanoaaga fe ne ha ha he Atua, mo e ko e ha?
3 Ko Iehova ni tokotaha ne katoatoa e tokanoaaga. Nakai fai mai he hana a tau mena momoui ke fakakaupa hana a tokanoaaga kakano ni ha ko ia ko e Atua Mua ue Atu mo e Iki he Lalolagi Katoatoa. Tuga he talahau he tagata tua ko Iopu, “ko hai ke liuaki age a ia? po ko hai ke pehe age kia ia, Ko e heigoa kia e mena kua eke e koe?” (Iopu 9:12) Ko e mena taha nei ni ne fakalagalaga ai e patuiki Papelonia ko Nepukanesa ke talahau: “Ti nakai ha ha i ai taha ke taofi hana [Atua] lima, po ke pehe age kia ia, Ko e heigoa kia e mena kua eke e koe?”—Tanielu 4:35.
4. Fakakaupa fefe e Iehova hana a tokanoaaga?
4 Ka e taha e mena, ko e tau fakatufono tututonu a Iehova ne fakakaupa katoatoa e tokanoaaga ia. Ne fakatino mai e mena nei he fakakite e Aperahamo hana a manamanatuaga ki a lautolu ne nonofo i Sotoma mo e huhu: “Nakai kia hako e mena ka eke he fakafili he lalolagi oti?” Fakakite mai he tali he Atua e mailoga e ia e kavega hana ke taute e tonu. To nakai moumou e ia a Sotoma kaeke ke ha ha i ai e tau tagata tututonu. (Kenese 18:22-33) Fakakaupa foki he Atua hana a tokanoaga, kakano ha ko e hana a fakaalofa mo e iloilo ne fakatuai aki a ia ke ita mo e fakagahuahua e ia e fakauka.—Isaia 42:14.
Tau Fakakaupaaga he Tokanoaaga he Tagata
5. Ko e heigoa e falu a mena ne fakakaupa aki e tokanoaaga he tagata?
5 Pete ne ha ha ia Iehova e tokanoaaga katoatoa, ka ko e tau mena oti, ne gahua ia ki loto he tau fakakaupaaga he ha lautolu a tau mahani, malolo, mo e tau mena ne nonofo ai a lautolu, ti pihia foki e tau vahega mena pehe nei, ko e tau momoui kuku he tau tagata hala. Ne tufugatia he Atua e tagata mo e tokanoaaga mitaki katoatoa ke moui ki loto he lalolagi ne fakatoka e Iehova ma hana. Ha ha i ai e tau kakano loga foki, ko e ha ne fakakaupa e tokanoaaga he tagata, nakai katoatoa.
6. Ko e heigoa e tuaga he tokanoaaga ha tautolu ha ko e ha tautolu a omaoma ke he Atua?
6 Fakamua, fakakaupa e tokanoaaga he tagata ha ko e mena tufuga he Atua e tagata ke lata mo e Hana a finagalo. Ko Iehova ‘kua lata ni ke tuku e fakahekeaga, mo e lilifu, mo e malolo; ha kua eke e ia e tau mena oti, ha ko e hana a finagalo foki ne ha i ai a lautolu, mo e eke ai a lautolu.’ (Fakakiteaga 4:11) Ti ko e tagata kua lata ke omaoma ke he hana a Tauteaga, ne tonuhia ke taute e tau mata fakatufono ke pule ke he tagata. I Isaraela i tuai ki lalo hifo he Fakatufono ha Mose, ko e finagalo he Atua ke tamate e tagata ka ekefakakelea e higoa hana po ke moumou e fakatufono he Sapati. (Esoto 20:7; 31:14, 15; Levitika 24:13-16; Numera 15:32-36) Pete ne nakai nonofo a tautolu e tau Kerisiano ki lalo hifo he Fakatufono, ka e fakakaupa ni ha tautolu a tokanoaaga kakano ni ha ko e mena omaoma a tautolu ki a Iehova, ko ia ko e ha tautolu a Fakafili, Taute Matafakatufono, mo e Patuiki.—Isaia 33:22; Roma 14:12.
7, 8. (a) Maeke fefe he falu a fakatufono he lalolagi ke fakakaupa e tokanoaaga he tagata? (e) Ko e heigoa e falu a fakatufono he Atua ne fakakaupa e tokanoaaga ha tautolu ko e tau tagata?
7 Ko e mena ke ua aki, fai kaupaaga e tokanoaaga he tagata, kakano ni ha ko e tau fakatufono ke he lalolagi. Tuga a nei, ha ko e fakatufono he mamafa, nakai maeke he tagata ke hopo hifo he fale tokoluga mo e nakai pakia po ke kelipopo ne ia a ia. Kua maama lahi, ko e tau fakatufono he Atua he lalolagi kua fakakaupa e tokanoaaga he tagata ke taute e falu mena.
8 Ko e mena ke tolu aki, fakakaupa e tokanoaaga he tau tagata ha ko e tau fakatufono mahani mitaki he Atua. Liga kua fita he kitia e koe e tau fakamoliaga ke he tau mena ne tohi e Paulo he Kalatia 6:7, 8: “Aua neke fakahehe ai a mutolu, kua nakai fakavai he taha e Atua; ha ko e mena kua gana he tagata, ko e mena ia ni ke helehele mai ai e ia; Ha ko ia kua gana e tau mena ke lata mo e hana ni a tino, to helehele mai ai e ia ke he tino e mena ke popo; ka ko ia kua gana e tau mena ke lata mo e Agaga, to helehele mai ai e ia ke he Agaga e moui tukulagi.” Ne nakai maeke ke totoko ke he mena nei, ko e tau fakatufono mahani mitaki he Atua ko Iehova ke fakakaupa foki ha tautolu a tokanoaaga, ka ko e omaoma ki ai ke moua e tautolu e moui.
9. Maeke fefe he kaufakalatahaaga ha tautolu e tau tagata ke fakakaupa ha tautolu a tokanoaaga?
9 Ko e mena ke fa aki, fai kaupaaga e tokanoaaga he tagata kakano ha ko ia i loto he kaufakalatahaaga he tau tagata. Ti ko e mena ia, ko e moua ne ia e tokanoaaga hana ka nakai fakatauhele hehe mo e tokanoaaga he falu. Kua lata he tau Kerisiano ke omaoma ke he tau fakatufono ko e “tau tui ne mua,” omaoma ki a lautolu ka nakai ole mai ke moumou e tau fakatufono he Atua. (Roma 13:1; Gahua 5:29) Tuga a nei, kua lata ia tautolu ke omaoma ke he tau fakatufono hagaao ia ke he totogiaga he tau tukuhau, ko e mafiti ke fakaholo ai e tau peleo afi, mo e falu mena foki. Ko e moli ke omaoma e tautolu e tau fakatufono nei ha “Kaisara” kua fakakite fakamahino mai e tokanoaaga ha tautolu ne foaki he Atua ko e nakai katoatoa.—Mareko 12:17; Roma 13:7.
Ko e Ha ne Nakai Katoatoa ai e Tokanoaaga?
10, 11. Ko e ha ne foaki e Iehova ke he tau tagata e tokanoaaga nakai katoatoa?
10 Ko e ha ne foaki ai he Atua e tokanoaaga nakai katoatoa ke he tau tagata? Ko e taha kakano ke maeke he Tufugatia ke ha ha ia ia e tau mena momoui iloilo he lalolagi ke taatu ki a ia e fakalilifuaga mo e fakahekeaga ha ko e ha lautolu a tau kupu mitaki mo e tau mahani mitaki. Maeke he tau tagata ke taute e mena nei, ka e nakai maeke he tau manu. Ko e tau manu, ne pule ki ai e iloilo mai he Atua, ne nakai iloa ha mena ke he tau mahani mitaki. Maeke ia koe ke fakaako e kuli ke nakai uta ha mena, ka e nakai maeke ia koe ke fakaako e hepe he kaiha. Ko e manu ne fakatokatoka tuai e tau gahua, ne nakai maeke ke taute e tau fifiliaga ke tamai e fakahekeaga mo e fakalilifu ke he Atua, ka e maeke he tagata ke tokanoa lahi ke fifili ke fekafekau ki a ia ne Taute a ia mai he fakaalofa mo e fakaaue.
11 Foaki age foki he Atua ke he tau tagata e tokanoaaga nei ma e aoga mo e fiafia ha lautolu. Maeke ia lautolu ke fakagahuahua e tokanoaaga nakai katoatoa ha lautolu mo tufuga mo e kumikumi, taute e tau gahua mitaki mo e kaufakalataha. Ha ha i ai foki he tau tagata e tokanoaaga ke fifili e tau gahua, mo e tau matakavi ke nonofo ai. Ko e vaha nei, ko e tau tupe mo e tau fakatufono ne fakakaupa e tokanoaaga he fifiliaga ia, ti maeke e mena nei mai ha ko e lotokai he tagata, ka e nakai ha ko e puhala ne kamata tufuga he Atua e tau tagata.
12. Ko e ha e laulahi he tau tagata ne nonofo hifo ke he liliaga?
12 Pete ne foaki age e Iehova lahi e tokanoaaga ke he tau tagata, ko e tokologa he tau tagata he vaha nei ne lili ke he tau liliaga tupetupe. Ko e heigoa e mena ne tupu? Ko laua tokoua fakamua, Atamu mo Eva, ne fakagalo e laua e kakano he tokanoaaga ne foaki he Atua. Ne molea e kaupaaga tapu he ha laua a tokanoaaga mo e totoko e pule tonu ki a laua mai he Iki ko Iehova. (Kenese 3:1-7; Ieremia 10:10; 50:31) Nakai makona ke fakaaoga e tokanoaaga ha laua ke fakalilifu e Atua, ne fakaaoga e laua fakagoagoa, ke fifili ni e laua e mena kua tonu mo e hepe, ti fakalataha auloa mo Satani ke he hana a totokoaga ki a Iehova. Ti nakai moua e tokanoaaga lahi, ka ko e tau tagata agahala, Atamu mo Eva, kua lago ki a laua e tau fakakaupaaga matematekelea mo e liliaga, ko e tuku hifo he ha laua a tokanoaaga, mo e fakahikuaga ko e mate. Ko e ha laua a tau tega ne moua foki e tokanoaaga nei ne fakagalo. “Nukua hala e tau tagata oti kana, to nakai hoko ke he fakahekeaga mai he Atua.” “Ha ko e mate ko e palepale ia he hala.”—Roma 3:23; 5:12; 6:23.
13. Ko e ha ne maeke ai a Satani ke fakatupa e tau tagata?
13 Ha ko e totokoaga i Etena, ko Atamu mo e hana a tau tega ne hoko ki ai e liliaga ha Satani ko e Tiapolo. Ko e ha, “ka ko e lalolagi oti ha he pule hana kua mahani kelea”! (1 Ioane 5:19) Ha ko e hana a malolo lahi mo e lotomatala ati maeke ia Satani ke fakavaia mo e fakatupa e tau tagata oti ti fakamamao mo e Atua. Ke lafi foki ke he mena nei, ko e tau tagata lotokai kua pule ke he falu tagata ke mamahi ai a lautolu. (Fakamatalaaga 8:9) Ti ko e mena ia, ko e tau tagata kua lili ke he hala mo e mate, ki a Satani mo e hana a tau temoni, mo e fakatufono, tau tupe mo e tau lotu he lalolagi nei.
Maeke ke Fai Tokanoaaga Moli
14. Falanaki ke he heigoa e amaamanakiaga he tau tagata ke moua e tokanoaaga?
14 Ke moua e tokanoaaga mai he hala, mate, mo e Tiapolo mo e hana a lalolagi ne maeke ni ha ko e fakamakamaka he Atua ke taute e mena vihi hagaao ke he tonu he hana a pule ke he lalolagi oti. Ha ko Satani ne fakalaga e mena vihi nei, ne fakaata he Atua a ia ke moui, tuga ni ne fakaata e Ia a Farao ke moui ke fai magaaho. Kakano ni ke fakakite katoatoa e ia hana malolo mo e fakapuloa hana a higoa ke he lalolagi oti. (Esoto 9:15, 16) To fakatokoluga he Atua a ia ko e pule ke he lalolagi oti mo e fakatapu hana a higoa tapu ka utakehe e ekefakakelea ne moua ki a ia ha ko e totoko ha Satani, Atamu mo Eva. Ti ko e mena ia, ko lautolu ne matakutaku ki a Iehova to fakatoka mai he liliaga he hala mo e mate mo e to tamai ke he lalolagi fou he tokanoaaga ne foaki he Atua.—Roma 8:19-23.
15. Ko e heigoa e gahua ha Iesu ke he liuaki maiaga he tokanoaaga ke he tau tagata?
15 Ke liuaki mai e tokanoaaga ke he tau tagata, ne fakafano mai he Atua hana Tama ke he lalolagi mo tagata. Ne foaki fiafia mai he loto e ia hana a moui fakatagata mitaki katoatoa, ko e Tama he Atua, Iesu Keriso, ne foaki e poa lukutoto, ko e fakaveaga ke tokanoa ai e tau tagata. (Mataio 20:28) Ne fakapuloa foki e ia e fekau he tokanoaaga. Ke he kamataaga he hana feua fakamatala, ne fakakakano e ia e tau kupu ki a ia: “Ha ha i luga ia au e Agaga he Iki ko Iehova; ha kua fakauku e Iehova au ke fakamatala e vagahau mitaki kia lautolu kua matematekelea; kua fakafano mai e ia au ke pipi e tau loto ne malipilipi, ke fakamatala ai e tokanoaaga ke he kau mahala, mo e vetevete ai a lautolu ne lili.”—Isaia 61:1; Luka 4:16-21.
16. Ko e heigoa e tau lakaaga he tau Iutaia he senetenari fakamua ne taute ke moua e tokanoaaga moli?
16 To moua fefe he tau tagata e tokanoaaga ia? Ne pehe a Iesu: “Kaeke ke tumau fakaoti a mutolu ke he haku a tau kupu, ko e tau tutaki moli haku a mutolu. To iloa foki e mutolu e mena moli, ko e mena moli foki ke toka noa ai a mutolu.” Ko e mena haia, ne moua ai he tau tutaki ha Iesu e fiafia he tokanoaaga fakaagaga. (Ioane 8:31, 32, 36) Tuga foki he tala age e Iesu ke he kavana Roma ko Ponotia Pilato: “Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli. Ko lautolu oti kana ha ha he kupu moli, kua fanogonogo mai a lautolu ke he haku a leo.” (Ioane 18:37) Ko e tau Iutaia ne talia e kupu moli ne fakamatala mo e fakafifitaki mai e Iesu ne tokihala mai he tau hala ha lautolu, fakahako ha lautolu a puhala hehe, foaki a lautolu ki a Iehova, mo e papatiso tuga a Iesu. (Mataio 3:13-17; Gahua 3:19) Ko e puhala nei ti iloa e lautolu e fiafia ke he tokanoaaga nakai katoatoa ne foaki he Atua.
17. Ko e ha ne foaki ai e Iehova e tokanoaaga ke he hana a tau fekafekau?
17 Ne foaki e Iehova e tokanoaaga ma e hana a tau fekafekau fakamoli ke fakakautu aki hana a pule mo e fakahagahaga mitaki po ke aoga foki ki a lautolu. Ne fakatokanoa e ia e fanau Isaraela mai he liliaga i Aikupito ke maeke ia lautolu ke fakaheke ki a ia, ko e kautu he tau ekepoa, ko e hana a tau fakamoli. (Esoto 19:5, 6; Isaia 43:10-12) Pihia foki ni he tamai e Iehova e hana tau tagata he fakapaeaaga i Papelonia ke liu ati hake hana faituga mo e liuaki mai e tapuakiaga moli. (Esera 1:2-4) Ke he magaaho ne manamanatu e tau fakapaea ke he ha lautolu ni a hagahaga mitaki ke he tau mena he tino, ne fakafano e Iehova hana a tau perofeta ko Hakai mo Sakaria ke fakamanatu ki a lautolu ha lautolu a tau mena kua lata ke he Atua. Ha ha ia lautolu e tokanoaaga ne foaki he Atua ka fakatokatoka fakamitaki ke mau maopoopo e faituga, ke he lilifu he Atua, mo e hagahaga mitaki mo e mafola he hana a tau tagata.
Nakai Fakagalo e Kakano he Tokanoaaga ne Foaki he Atua
18. Ko e ha ne talahau ai pehe ko e tau fekafekau a Iehova he vaha nei ne nakai fakagalo e kakano he ha lautolu a tokanoaaga ne foaki he Atua?
18 Ka e fefe e tau fekafekau he Atua he vaha nei? Ko e fakatokatokaaga, ne nakai fakagalo e lautolu e kakano he ha lautolu a tokanoaaga ne foaki he Atua. Ke he tau tau 1870 ne kamata a lautolu ke tokanoa mai he tau hepehepe faka-Papelonia mo e fiafia ke he tokanoaaga Kerisiano tupu tolomaki. Fakatauo e mena nei mo e Fakatai 4:18, ne pehe: “Ka ko e puhala he tau tagata tututonu, kua lata ia mo e maama he aho, kua tupu tolomaki atu hana maama ke hoko ke he tupoula.” Ka e taha e mena, tuga e tau tagata he Atua i tuai ne uta fakapaea ke fai vaha ki Papelonia, he tau 1918 ne lili ai e tau fekafekau a Iehova ki Papelonia Lahi. (Fakakiteaga 17:1, 2, 5) Ko lautolu i loto he kautu he tau lotu pikopiko he lalolagi ne fiafia lahi he mate fakaagaga e tau “fakamoli tokoua” fakatai. Ka ko e fakaalofa noa he Atua ati liliu momoui hana a tau fekafekau fakauku he 1919, ti moua e tokanoa fakaagaga. (Fakakiteaga 11:3, 7-11, NW) Ne fakaaoga e lautolu e tokanoaaga ne foaki he Atua, ti eke ai a lautolu mo tau fakamoli fakamakutu he Mua ue Atu. Ti ko e mena ia, ne lata tonu a lautolu he 1931 ke fakaaoga mo e olioli lahi e higoa he Tau Fakamoli a Iehova! (Isaia 43:10-12) Mua atu ke he 1935 ne matutaki e Tau Fakamoli fakauku mo e “moto tagata tokologa,” ne amaamanaki ke moua e moui tukulagi ke he lalolagi. Ne nakai fakagalo foki e lautolu e kakano he tokanoaaga ne foaki he Atua.—Fakakiteaga 7:9-17.
19, 20. (a) Ko e heigoa e taha puhala ne mailoga lahi ai ne fakaaoga aki he tau tagata a Iehova e tokanoaaga ne foaki he Atua? (e) Ko e heigoa foki e falu puhala ne mailoga lahi ne fakaaoga he Tau Fakamoli a Iehova e tokanoaaga ne foaki he Atua?
19 Ko e tau tagata a Iehova ne fakaaoga fakamitaki e lautolu e tokanoaaga ne foaki he Atua ke he ua e puhala ne mailoga lahi. Ko e taha mena, ne fakaaoga e lautolu ke tutuli he puhala hako. (1 Peteru 2:16) Ti talahaua mitaki lahi a lautolu! Tuga a nei, ne lagataha e hu atu e taha tagata tane ke he Fale he Kautu i Zurich, i Suisalani, mo e vagahau pehe ko e manako a ia ke eke mo taha mai he Tau Fakamoli a Iehova. Huhu ko e ha, ne pehe a ia ko e Fakamoli e mahakitaga hana mo e kua tuku ki tua he faivao. Ne pehe a ia: ‘Ko e fakapotopotoaga haia ne manako a ia ke matutaki ki ai—ko e taha ne nakai talia e tau mahani kelea.’ Ne fai kakano mitaki e New Catholic Encyclopedia ke kitia ko e Tau Fakamoli a Iehova ne moua e talahauaga ko e “taha mai he tau matakau mahani mitaki he lalolagi.”
20 Fakaaoga foki he Tau Fakamoli a Iehova e tokanoaaga ne foaki he Atua ha lautolu ke fakamoli ha lautolu a fekau ke fakamatala e tala mitaki he Kautu, tuga ne taute e Iesu. (Mataio 4:17) Ko e tau kupu vagahau mo e tau tohi, taute pauaki mo e fakamatala nakai taute pauaki, ko e fakapuloaaga he Kautu a Iehova ne taute e lautolu. Ha kua gahua pihia a lautolu ti aoga lahi ha kua fakamalolo ha lautolu a tua mo e fakakikila ha lautolu a amaamanakiaga. Ko e taha mena foki, ko e gahua nei ke fakamomoui aki a lautolu mo lautolu ne fanogonogo ki a lautolu. (1 Timoteo 4:16) Hagaao ke he gahua nei, ko e tohi Dynamic Religious Movement ne pehe: “Ne uka lahi ke moua a lautolu he falu a matakau ne gahua fakamakamaka ke he ha lautolu a lotu tuga e Tau Fakamoli.”
21. Ko e heigoa e fakamoliaga ko e fakamonuina e Iehova e feua fakamatala he hana tau tagata?
21 Fakamonuina fefe e Iehova a tautolu he taute e kakano he tokanoaaga ne foaki he Atua! Kitia e mena nei ke he hokotakiaga ke he gahua he fonua he tau kua mole—ko e tokoluga he molea e fa miliona e tau tagata fakailoa, molea e hogofulu miliona ne fakalataha ke he Fakamanatuaga he mate ha Iesu. Ke he taha hokotakiaga, ko Ailani ko e 29 e tau mahina tokoluga ne nakai maoki he tau tagata fakailoa; 78 ha Mesiko a tokoluga ke he 80 e tau mahina; mo Sapani ne 153 e tokoluga ne nakai fai mamutu!
Fakaaoga Fakamitaki Hau a Tokanoaaga ne Foaki he Atua
22. Ko e heigoa e matapatu he tau huhu hokulo ne lata ke huhu hifo e tautolu ki a tautolu?
22 Kaeke ko koe taha he Tau Fakamoli tukulele ha Iehova, fakaaoga fakamitaki nakai e koe e tokanoaaga ne foaki he Atua ki a koe? Ko tautolu takitokotaha ke huhu hifo: ‘Fakaeneene nakai au ke fakaaoga haku tokanoaaga ne foaki he Atua ke nakai fakatupetupe taha ha ko e haku a mahani hepehepe? Omaoma fiafia mai he loto nakai au ke he tau fakatufono ha Kaisara, ka e tuku fakamua e fakatufono he Atua? Katoatoa nakai haku a kau fakalataha mo e tau momotua he fakapotopotoaga? Fakaaoga katoatoa nakai e au e tokanoaaga ne foaki he Atua ke fakamatala e tala mitaki? Tumau nakai haku a “fakamakai nakai noa ke he gahua he Iki”? Ko e fakamakamaka ni kia ke he gahua tupe ka e nakai fakaaoga fakamitaki e tokanoaaga ne foaki he Atua ke fakalaulahi e feua fakamatala, tutuli ke he tau kotofaaga he fakapotopotoaga po ke fekafekau mau?’—1 Korinito 15:58.
23. Ko e heigoa ha tautolu kua lata ke taute ke nakai fakagalo e tautolu e kakano he tokanoaaga ne foaki he Atua?
23 O mai auloa a tautolu ke “kamata . . . mo e kitekite, kua mitaki a Iehova.” (Salamo 34:8) Kia tua a tautolu ki a ia, omaoma ke he hana a tau fakatufono, fakaheke hana a higoa tapu ke fakamakamaka ke fakapuloa hana a Kautu. Manatu ko lautolu ne ‘gana fakalahi to fakalahi hana a helehele mai.’ (2 Korinito 9:6) Ti ko e mena ia, kia fekafekau mo e loto katoa ki a Iehova mo e fakakite e tautolu kua nakai fakagalo e kakano he ha tautolu a tokanoaaga ne foaki he Atua.
To Tali Fefe e Koe?
◻ Ko e tokanoaaga fefe ne toka he Atua?
◻ Ko e heigoa e tau fakakaupaaga he tokanoaaga he tau tagata?
◻ Maeke fefe ke fai tokanoaaga moli?
◻ Ko e heigoa ha tautolu kua lata ke taute ke nakai fakagalo e kakano he tokanoaaga ne foaki mai he Atua?
[Fakatino he lau 4]
Kua fakakaupa e tokanoaaga he tau tagata ha ko e tau mena tuga e tau fakatufono he mamafa