Fakailoa Atu e Higoa a Iehova ke he Lalolagi Oti
1 He magaaho ne poaki a Iesu ke he hana tau tutaki ke eke mo tau fakamoli “ke hoko ni ke he fakaotiaga he lalolagi,” ne fita ni he fakatoka e ia e fakafifitakiaga ma lautolu ke fifitaki. Ko e magaaho mo e matakavi ni ne moua e ia e tau tagata, ne tutala a ia hagaao ke he finagalo he Atua ma e tau tagata. He fifitaki ki a Iesu, ko e vahega fekafekau fakamoli hane fakaaoga e tau puhala kehekehe ke taute e higoa a Iehova ke ‘fakailoa atu ke he lalolagi oti.’—Isa 12:4, 5.
2 Ko e Mena ne Taute he Tau Aho Mua: He tau tau ne mole ki tua, kua tohi fakailoa e tau lauga he tau nusipepa; ko e “Photo-Drama of Creation” ne taute mo e fakakite ke he tau miliona; ne fakaaoga e tau motoka fai leo taogo; fakaaoga lahi ai e kofe lapa fakatagi mo e, fai magaaho, ko e letio—taute katoatoa ai ke fakamatala aki e tala mitaki. Moli, na tuku tumau e matapatu peehiaga ke he matutakiaga fakatagata mo e tau tagata ke maeke ke taute e tau liu ahi atu fakamitaki ke he fiafia kua fakakite. Fakahiku ai, ko e fekafekauaga he taha fale ke he taha fale ne fakamoli ke hufia lahi he taute e higoa a Iehova ke fakailoa atu ke he tau matakavi oti.—Gahua 5:42.
3 Ko e Mena Hane Taute he Vaha ha Tautolu: He hikihiki e tau vaha ti hane holo e lalolagi he puhala lavelave, ti loga e tau matakavi ne lavea ke moua e tau tagata i kaina. Tokogahoa ne hagahaga ke fakaaoga e tau magaaho ke totou mo e manamanatu ke he tau mena fakaagaga. Kua lata mogoia ia tautolu he hiki fakatatau atu e fekafekauaga ha tautolu ki ai. He lafi atu ke he taute tumau e matakavi he gahua he taha fale ke he taha fale, kua fakamalolo a tautolu ke o ke he tau mena ne ha ha i ai e tau tagata mo e ke “mautali” ke tali atu e amaamanakiaga ne ha ha ia tautolu. (1 Pete. 3:15) Ko e kakano he mena nei ke lali ke fakamatala ke he tau kapitiga gahua, ke he tau kapitiga aoga, ke he tau tagata he puhalatu mo e ke he paaka po ke tuaga motoka, he taha fale koloa ke he taha fale koloa, mo e ha mena ni ne liga moua e tau tagata i ai. He moua e lalagoaga a Iehova, to matutaki e tau laliaga ha tautolu mo e kautuaga mitaki. Fai vala nakai a koe he hokotia ke he tau tagata ke he ha mena ni ne ha ha i ai a lautolu?
4 Kia lali a tautolu ke he ha puhala ni ka lata ai he taute e higoa a Iehova ke fakailoa atu he matakavi ha tautolu. Maeke ia tautolu ke moua e makona lahi he fakamoli katoatoa e fekafekauaga ha tautolu, he onoono atu a tautolu ki a Iehova ke futiaki mai a lautolu kua loto hako.—Ioane 6:44.