Nakai Okioki a Tautolu Mai he Matagahua
1. Iloa fēfē e tautolu ko e tau tagata fakamatala he senetenari fakamua ne nakai manamanatu hifo ki a lautolu ke okioki mai he matagahua?
1 Ko e tau tagata fakamatala makutu he senetenari fakamua ne fakailoa e tala mitaki mo e “nakai oki” he matakavi ne ha i ai e tau tagata. (Gahua 5:42) Ti nakai maeke ia tautolu ke manamanatu ka ō a lautolu he taha fale ke he taha fale ati feleveia mo e tau tagata he puhalatū mo e nakai fakamatala ki a lautolu ia. To nakai fakatonoa foki e lautolu e mogo ke fakamatala he magaaho noa ka fakatau he makete he oti e gahua he fonua. Tuga a Iesu, ne nakai manamanatu hifo ki a lautolu ke okioki mai he matagahua.—Mare. 6:31-34.
2. Ko e heigoa kua putoia he moui fakatatau ke he higoa ha tautolu?
2 Mautali Tumau: Ko e higoa ha tautolu ko e Tau Fakamoli a Iehova, kua nakai fakamaama hokoia e mena ne taute e tautolu; kua fakamaama ai ko hai a tautolu. (Isaia 43:10-12) Ti mautali tumau a tautolu ke lalago e amaamanakiaga ha tautolu, pete he nakai ō a tautolu he taha fale ke he taha fale. (1 Pete. 3:15) Amanaki nakai a koe ke he tau tuaga ka fakaatā a koe ke fakamatala he magaaho noa ti manamanatu mogoia ke he mena haau ka talahau? Fai tohi nakai ne uta e koe mo koe ke fakakite ki a lautolu kua fiafia? (Fakatai 21:5) Fakamatala ni kia a koe he taha fale ke he taha fale, po ke folafola foki e koe e tala mitaki ke he tau tagata he falu tuaga foki ka maeke he tau tuaga?
3. Ko e ha e “puhala” ne nakai ko e kupu kua felauaki ke fakamaama aki e fakamatala he puhalatū mo e tau tūaga peleōafi, tau paaka, tau matakavi pisinisi, mo e falu foki?
3 Nakai ko e “Puhala” Fakamatala: He mogo fakamua ne fakaaoga e tautolu e kupu “puhala” falu magaaho ke hagaao ke he fakamatala he puhalatū mo e tūaga he tau peleōafi, tau paaka, tau matakavi pisinisi, mo e falu foki. Ka ko e kupu “puhala” kua liga hihiga ke hagaao ko e tau laliaga ia ne nakai fa mahani, nakai taute tumau, po ke matakehe. Ne pehē e aposetolo ko Paulo ne fakamatala a ia “ki mua he tau tagata” mo e mai he taha fale ke he taha fale. (Gahua 20:20) Ti ko e fakamatala “ki mua he tau tagata” to liga ko e kupu kua latatonu ka e nakai ko e “puhala” fakamatala. Mooli ko e gahua he fonua he taha fale ke he taha fale kua matutaki ko e matapatu mo e puhala lauia mitaki ke hokotia e fekau he Kautu ke he tau tagata. Ko e tau tagata fakamatala he senetenari fakamua ne hagaaki ke he tau tagata ka e nakai ke he tau fale. Ne fakaaoga fakamitaki e lautolu e tau magaaho oti ke tutala hagaao ke he kupu mooli—ki mua he tau tagata, he magaaho noa, mo e he taha fale ke he taha fale. Kia hagaaki pihia foki a tautolu ke maeke ke fakakatoatoa ai e ha tautolu a feua.—2 Timo. 4:5.