Fakatumau ke Fakamatala
1 Hoko tuai e tau vaha uka. Ko e latau fakamatakau, tau felakutaki fakamotu, tau matematekelea tutupu pauaki, mo e falu mena tutupu matakutakuina kua mahani mau. Mua atu mogonei, kua lata e magafaoa he tagata mo e tala mitaki. Ka e, kua tupu lahi e fakateaga ke he tau mena fakaagaga. He falu matakavi, kua liga ke uka ke moua e tau tagata i kaina mo e uka lahi foki ke moua e tau tagata ka fakateliga ki a tautolu po ke manako ke fakaako e Tohi Tapu. Ti kua aoga lahi mogoia ke fakatumau a tautolu ke fakamatala e tala mitaki he Kautu he Atua kua fakatu.—Mata. 24:14.
2 Fakaalofa ma e Tau Tagata: Kua futiaki he fakamatala ha tautolu e fakaalofa ha Iehova ma e tau tagata. Ne “nakai finagalo a ia ke malaia taha, ka kia hohoko oti kana ke he tokihala.” (2 Pete. 3:9; Eseki. 33:11) Ti, fakailoa e ia, tuga he talahau e Iesu, “to fakamatala fakamua foki e vagahau mitaki ke he tau motu oti kana ke lata ai.” (Mare. 13:10) Ne ole e Atua ke he tau tagata ke liliu age ki a ia mo e hao ke he fakafiliaga hane tata mai ke he lalolagi ha Satani. (Ioelu 2:28, 29, 32; Sefa. 2:2, 3) Nakai kia loto fakaaue a tautolu ki a Iehova he fakaata mai e magaaho ki a tautolu?—1 Timo. 1:12, 13.
3 Kua fakakite he hokotaki he lalolagi katoa he fekafekauaga he tau 2004, ko e 6,085,387 e avelesi he tau fakaakoaga Tohi Tapu ne taute he tau mahina takitaha, mo e 5,000 e avelesi he tau tutaki fou ne papatiso he tau fahitapu takitaha! Falu ia lautolu nei ne tukulele fou ne moua ha kua fakamonuina e Iehova e lali fakatumau he tau tagata fakailoa ke tutala mo e tau tagata he tau fonua ne kotofa a lautolu ki ai. Ko e olioli ha ia ne moua he tau fakapotopotoaga, mo e ko e kotofaaga moli ko e ekegahua he Atua ke he gahua laveaki moui nei!—1 Kori. 3:5, 6, 9.
4 Fakaheke e Higoa he Atua: Kua fakatumau a tautolu he fakamatala ke maeke ke fakaheke atu a Iehova mo e ke fakatapu e higoa hana ki mua he tau tagata oti. (Hepe. 13:15) Ne fakahehe e Satani “e lalolagi oti” ke talitonu kua nakai ha ha he Atua e malolo ke utakehe e tau lekua he tagata, kua nakai logona e ia e matematekelea he tagata, po ke kua nakai moui a ia. (Fakakite. 12:9) He fakamatala a tautolu, kua kautu a tautolu ke he kupu moli hagaao ke he Matua mua ue atu ha tautolu he lagi. Kia fakatumau a tautolu ke fakaheke hana higoa—mogonei mo e tukulagi.—Sala. 145:1, 2.