Lali ke Hokotia ke he Tokologa Atu e Tagata
1. Ko e heigoa he tau Kerisiano fakamua ne taute ke hokotia ke he tokologa atu e tagata mo e tala mitaki?
1 Ne makutu lahi e tau tutaki fakamua ha Iesu ke folafola e fekau he Kautu. Ne taute e lautolu e tau lakaaga lauia mitaki ke ta atu e tala mitaki ke he tokologa atu e tagata. Ne tohi he tau Kerisiano tohia Tohi Tapu e tau tohi ha lautolu ne omoomoi he agaga ke he vagahau Heleni ne fa mahani, ko e vagahau he lalolagi katoa he Pule Atu Motu Roma. Fakalahi atu, ko e tau tagata fakamatala makutu he tau senetenari ke uaaki mo e toluaki V.N. ne liga kamata mua ke fakaaoga e tohi fakamautala he mukamuka ke fakaaoga ke kumi fakamaamaaga ka fakatatai ke he tohi vakai.
2, 3. (a) Kua fakamoli fefe e Isaia 60:16 he tau vaha fou? (e) Kua fakaaoga fefe e tau lakau fou ke fakalaulahi ki mua e tapuakiaga mea?
2 Fakaaoga he Tau Lakau Fou: Puhala mai he perofeta ko Isaia, ne talahau tuai e Iehova: “To kai e koe e puke huhu he tau motu kehe.” (Isaia 60:16) Ko e fakamoliaga he vaha fou ke he perofetaaga nei, kua hane fakaaoga he tau fekafekau ha Iehova e tau koloa aoga lahi mai he tau motu ke fakalahi atu e gahua fakamatala. Ma e fakatai, he 1914, totou tau ato kamata mo e kautu fakatupe ai e tau kifaga fai leo, ne fita e tau Tagata Fakaako Tohi Tapu he kamata ke fakakite e “Photo-Drama of Creation.” Ko e kifaga valu tula nei mo e lauga ke he tau ata hulu, ne fai lanu mo e leo, ne fakamatala malolo ke he totou miliona.
3 He vaha nei, ko e tau tagata he Atua kua fakaaoga e tau matini lolomi mafiti lahi mo e tau koloa fakakomopiuta ke taute fakailoa aki e tau Tohi Tapu mo e tau tohi faka-Tohi Tapu ke he totou teau e tau vagahau. Ko e tau puhala o fenoga holo mafiti ne ta atu e tau tohi faka-Tohi Tapu ke he tau fahi mamao he lalolagi, hokotia ke he tau tagata he 235 e motu. Puhala mai he hana agaga, ne fakamalolo e Iehova hana tau fekafekau ke fakaaoga fakamitaki e tau lakau fou pihia, ke taute e kupu moli he Tohi Tapu ke moua he tokologa atu e tagata ne nakaila pihia ia tali mai.
4. Ko e heigoa e tau hikiaga nukua taute he falu ke he tau momoui ha lautolu ke hokotia ke he tokologa atu e tagata mo e tala mitaki?
4 Tau Hikiaga Fakatagata: Ne omoomoi foki e tau tagata tapuaki moli ke taute e tau hikiaga fakatagata ke maeke ke hokotia ke he tokologa atu e tagata mo e tala mitaki. Tokologa ne fakamukamuka ha lautolu a tau momoui ke maeke ke fakalahi atu e fakalataha ke he gahua fakamatala. Falu kua hiki e tau nonofoaga ke fekafekau he tau matakavi ne manako lagomatai lahi ma e tau tagata fakailoa he Kautu. Falu kua fakalahi ha lautolu a fekafekauaga he ako e vagahau kehe.
5, 6. Ko e heigoa ka taute ke hokotia ke he tokologa atu e tagata he fonua ha tautolu?
5 Ke lafi ki ai, maeke ia tautolu ke hokotia ke he tokologa atu foki e tagata mo e tala mitaki he fakamatala he magaaho ka nonofo e tau tagata i kaina mo e he matakavi ka moua e tau tagata. Kaeke nakai moua tumau e tau tagata i kaina he magahala he aho he fonua ha mutolu, maeke nakai ia koe ke hiki e setulu hau ke fakamatala he tau tula afiafi? Fai matakavi toloaga tagata nakai ne maeke ke fakamatala i ai? Kua lali nakai a koe ke fakamatala he telefoni mo e gahua he matakavi pisinisi? Kumi magaaho nakai a koe ke fakamatala he ha magaaho ni?
6 Ko e kotofaaga mitaki ha ia ma tautolu ke fakalataha ke he fakamatala mua atu nei ne taute ma e higoa ha Iehova mo e Kautu! Kia matutaki a tautolu ke folafola e kupu moli foaki moui mai he Kupu he Atua ke he tokologa atu e tagata.—Mata. 28:19, 20.