Fakaaoga e Tau Lagomatai Kitia Mata ke Fakaako
1. Fakaaoga fēfē e Iehova e tau lagomatai kitia mata ke fakaako aki e tau fekafekau haana i tuai, mo e ko e heigoa e lauiaaga?
1 Ke tala age e tau vala tala aoga ke he tau fekafekau haana he vahā i tuai, ne fa fakaaoga e Iehova e tau fakakiteaga mo e tau miti. Manamanatu ke he fakakiteaga ha Esekielu ke he kariota ha Iehova he lagi. (Eseki. 1:1-28) Manamanatu la ke he logonaaga ha Tanielu he mole e moua e miti fakaperofeta ne fakatino e tau pule he lalolagi. (Tani. 7:1-15, 28) Ka e kua e kitiaaga ofoofogia he “fakakiteaga” ke he aposetolo ko Ioane hagaao ke he tau mena ka tutupu he “aho he Iki”? (Fakakite. 1:1, 10) Ne fakaako e Iehova a lautolu he fakaaoga e tau lanu ofoofogia mo e tau gahua malolō, ti tokaloto tumau ai e lautolu.
2. Ko e heigoa e tau lagomatai kitia mata kua maeke ia tautolu ke fakaaoga ke fakaako aki falu ke he tau kupu mooli he Tohi Tapu?
2 Kaeke manako a tautolu ke talahau e kupu mooli he Tohi Tapu ke he falu mo e lauiaaga ke nakai nimo vave, maeke ia tautolu ke fakaaoga foki e tau vitio ha tautolu ke fakaako. Kua putoia ke he tau vitio ha tautolu e tau mataulu kehekehe ke atihake e mauokafua ha tautolu ke he Tohi Tapu, ke he fakatokatokaaga ha Iehova, mo e tau matapatu fakaakoaga ke fakatolomaki e moui Kerisiano ha tautolu. Manamanatu la ke he falu puhala gahoa kua maeke ia tautolu ke fakaaoga e tau vitio ha tautolu ke fakaako. Hanai e tau vitio ka liga maeke ia tautolu ke fakaaoga.
3. Ko e heigoa ha tautolu ka fakaaoga ke takitaki fakahako atu e tagata fakaako Tohi Tapu ke he fakatokatokaaga?
3 He Fekafekauaga: Kua tala age nakai e koe ke he tagata fakaako Tohi Tapu hagaao ke he fakamatakainaga Kerisiano ha tautolu he lalolagi katoa? Fakakite age ki a ia e vitio Our Whole Association of Brothers. Age ki a ia ke kitekite ato hoko ke he fakaakoaga ka hau ha mua po ke kitekite tokoua he fakaakoaga ka hau. Ti fakatutala ke he tau hūhū liu fakamanatu he Ha Tautolu a Fekafekauaga he Kautu ia Iuni 2002.
4. Ko e heigoa e tau koloa fakaako ne liga ke fakaaoga he fuata Fakamoli he aoga?
4 Tau fuata, liga tutala a mutolu ke he faiaoga ko e maeke nakai ke fakakite ke he vahega e tau tala vitio Jehovah’s Witnesses Stand Firm Against Nazi Assault po ke Faithful Under Trials—Jehovah’s Witnesses in the Soviet Union. Ole ke taute e laupepa hūhū, hikihiki ke lata mo e fakatutalaaga he vahega e tau hūhū he Ha Tautolu a Fekafekauaga he Kautu ia Iuni 2001 po ke Fepuari 2003.
5. Ko e heigoa kua ha ha i ai ma e tau matua mo fakaaoga he tau fakaakoaga fakamagafaoa?
5 Magafaoa mo e Tau Kapitiga: Tau matua, manamanatu la kua lalahi tuai e tau fanau ha mutolu mogonei tali mai he fakatoka mua mai e vitio Young People Ask—How Can I Make Real Friends? Ko e ha nakai liu kitekite he fakaakoaga fakamagafaoa ha mutolu ka hau? Kua fakakite mai he Ha Tautolu a Fekafekauaga he Kautu ia Aperila 2002 e tau hūhū ma e fakatutalaaga alaala mo e mooli.
6. Maeke fēfē ia koe ke fakatoka taha magaaho atihake mo e tau kapitiga haau?
6 Kua fai kapitiga nakai he fakapotopotoaga ne manako a koe ke uiina ke he kaina haau? Ko e kitekite auloa he vitio Respect Jehovah’s Authority ka moua ai e afiafi atihake, mua atu ka oti ti liu kitekite ke he tau fakaakoaga ne moua mai ai, fakaaoga e tau hūhū ne tohi he Ha Tautolu a Fekafekauaga he Kautu ia Sepetema 2004.
7. Ko e heigoa falu puhala kua manamanatu a koe ki ai ke fakaaoga aki e tau vitio ha tautolu?
7 Falu Puhala: Fai puhala foki nakai kua maeke ia koe ke fakaaoga ha tautolu a tau vitio kehekehe ne 20? To lagomatai nakai ka fakakite taha po ke ua e vitio ke he tagata kua fa aahi atu tumau a koe ki ai ke lagomatai a ia ke tupu fakaagaga? Maeke nakai ia koe ke ole ke fakakite e vitio he kaina ne leveki po ke matakavi tolo he tau matua momotua? To liga lagomatai nakai he tau vitio ke moua e fakalilifu he tau magafaoa ne nakai ko e Tau Fakamoli, tau tuuta kaina, mo e tau kapitiga gahua? Ko e tau vitio ha tautolu kua nava ki ai, fakaako, mo e lauia mitaki e tau lagomatai kitia mata. Fakaaoga ai ke fakaako.